O‘zbekiston Respublikasi Hukumati va Rossiya Federatsiyasi Hukumati (keyingi o‘rinlarda “Tomonlar” deb ataluvchilar),
o‘zaro manfaatdorlik va teng huquqlilik asosida ikki tomonlama iqtisodiy munosabatlarni saqlab qolish va rivojlantirish zaruriyatini anglagan holda,
O‘zbekiston Respublikasi bilan Rossiya Federatsiyasi o‘rtasida strategik sherikchilik to‘g‘risida 2004-yil 16-iyundagi Shartnoma hamda O‘zbekiston Respublikasi bilan Rossiya Federatsiyasi o‘rtasida ittifoqchilik munosabatlari to‘g‘risida 2005-yil 14-noyabrdagi Shartnomaga tayangan holda, shuningdek O‘zbekiston Respublikasi bilan Rossiya Federatsiyasi o‘rtasida strategik sherikchilikni chuqurlashtirish to‘g‘risida 2012-yil 4-iyundagi Deklaratsiya qoidalarini amalga oshirish maqsadida,
Mazkur Dastur Tomonlar tarafidan o‘zaro manfaatli iqtisodiy munosabatlarni rivojlantirish, ikki mamlakat iqtisodiyotining yetakchi tarmoqlarida yuqori texnologiyali ishlab chiqarish sohalarida hamkorlikni kengaytirish, shu asosda o‘zaro tovar ayirboshlash va investitsiyaviy hamkorlikni kuchaytirish bo‘yicha kelishilgan chora-tadbirlar kompleksining bajarilishini ta’minlash maqsadida ishlab chiqildi.
oliy darajadagi uchrashuvlar, shuningdek iqtisodiy hamkorlik bo‘yicha Hukumatlararo komissiya yig‘ilishlarida savdo-iqtisodiy va investitsiyaviy hamkorlik sohasida erishilgan kelishuvlarning keng ko‘lamda amalga oshirilishini ta’minlash;
ikkala davlat iqtisodiyotini yuksaltirishga qaratilgan iqtisodiy hamkorlikning barqaror rivojlanishini ta’minlash;
teng huquqlilik va o‘zaro manfaatdorlik asosida savdo-iqtisodiy hamkorlikni yanada rivojlantirish va investitsiyaviy hamkorlikni diversifikatsiya qilish;
Tomonlarning xalqaro majburiyatlarini keng ko‘lamda amalga oshirish asosida ikki mamlakat o‘rtasida to‘laqonli amal qiluvchi erkin savdo rejimini shakllantirish, shuningdek o‘zaro manfaatli savdoni rivojlantirish uchun qulay shart-sharoitlar yaratish;
savdo-iqtisodiy, investitsiyaviy, shuningdek ilmiy-texnikaviy xususiyatdagi o‘zaro ahamiyatga molik bo‘lgan ochiq ma’lumotlar bilan almashish;
ishlab chiqarishning o‘sishi, uning rivojlanishi uchun investitsiyalar kiritish, fanning eng yangi yutuqlari va ilg‘or texnologiyalarni joriy qilish hamda ishlab chiqarilayotgan mahsulotlarning sifati va raqobatbardoshligini oshirish uchun rag‘batlantiruvchi omillar yaratish;
ikkala davlat hududida joylashgan xo‘jalik yurituvchi subyektlar faoliyati uchun, shu jumladan O‘zbekiston Respublikasi Hukumati bilan Rossiya Federatsiyasi Hukumati o‘rtasida investitsiyalarni rag‘batlantirish va o‘zaro himoya qilish to‘g‘risida 2013-yil 15-apreldagi Bitimga muvofiq o‘zaro investitsiyalarni kengaytirish maqsadida qulay shart-sharoitlar yaratish.
amaldagi transport yo‘laklarining raqobatbardoshligini oshirish uchun ikkala Tomon davlatlarining qulay geografik o‘rnidan foydalangan holda, transport-kommunikatsiya sohasidagi hamkorlikni rivojlantirish;
sanoatning turli tarmoqlarida, xususan yoqilg‘i-energetika kompleksi, kimyo, mashinasozlik, elektrotexnika, yengil sanoat, aviatsiya, tog‘-kon va qayta ishlash sanoatlarida hamda qurilish materiallari ishlab chiqarish sohalarida hamkorlikni kengaytirish;
ilmiy-texnikaviy hamkorlik va axborot-kommunikatsiya texnologiyalari sohasida o‘zaro manfaatli hamkorlikni rivojlantirishdagi urinishlarni muvofiqlashtirish;
Mazkur Dastur Tomonlar davlatlarining tegishli vazirliklari, idoralari va xo‘jalik yurituvchi subyektlari tarafidan, O‘zbekiston Respublikasi bilan Rossiya Federatsiyasi o‘rtasidagi iqtisodiy hamkorlik bo‘yicha Hukumatlararo komissiyasi tasdiqlaydigan Tadbirlar rejasida belgilanadigan muayyan harakatlarning bajarilishi orqali amalga oshiriladi.
Mazkur Dastur va Tadbirlar rejasining bajarilishini muvofiqlashtirish va nazorat qilish O‘zbekiston Respublikasi bilan Rossiya Federatsiyasi o‘rtasidagi iqtisodiy hamkorlik bo‘yicha Hukumatlararo komissiyasi tomonidan amalga oshiriladi.