Oʻzbekiston Respublikasi Prezidentining “Oʻzbekiston Respublikasining Ustyurt mintaqasidagi Urga, Kuanish va Akchalak konlari guruhi mahsulotlari taqsimotiga oid bitimni amalga oshirish chora-tadbirlari toʻgʻrisida” 2009-yil 26-martdagi PQ-1081-son qaroriga muvofiq hamda Oʻzbekiston Respublikasi bilan “PETRONAS Carigali Overseas Sdn.Bhd.” kompaniyasi oʻrtasida 2008-yil 13-maydagi Oʻzbekiston Respublikasining Ustyurt mintaqasidagi Urga, Kuanish va Akchalak konlari guruhi mahsulotlari taqsimotiga oid bitimni amalga oshirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasining Ustyurt mintaqasidagi Urga, Kuanish va Akchalak konlari guruhi mahsulotlari taqsimotiga oid bitimni (keyingi oʻrinlarda Bitim deb ataladi) amalga oshirish doirasida 50 mln AQSH dollari miqdoridagi davlat xarajatlari xorijiy investor tomonidan bosqichma-bosqich qoplanishi nazarda tutilganligi;

xorijiy investor Bitim doirasida qoplanadigan davlat xarajatlarini “Oʻzbekneftgaz” milliy xolding kompaniyasiga xorijiy valyutada toʻlashi maʼlumot uchun qabul qilinsin.

2. Belgilab qoʻyilsinki, Bitim doirasida xorijiy investor tomonidan qoplanadigan davlat xarajatlari quyidagi tartibda taqsimlanadi:

50 foizi — Oʻzbekiston Respublikasi Davlat budjetiga;

50 foizi — Oʻzbekiston Respublikasi Iqtisodiyot vazirligi va Moliya vazirligi bilan kelishgan holda, kelgusida neft-gaz tarmogʻini rivojlantirishda foydalanish uchun “Oʻzbekneftgaz” milliy xolding kompaniyasiga.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.