Ўзбекистон Республикасининг «Ўзбекистон Республикасининг Марказий банки тўғрисида»ги (Ўзбекистон Республикаси Олий Мажлисининг Ахборотномаси, 1995 й., 12-сон, 247-модда), «Кредит ахбороти алмашинуви тўғрисида»ги (Ўзбекистон Республикаси қонун ҳужжатлари тўплами, 2011 й., 40-сон, 412-модда) қонунларига асосан Ўзбекистон Республикаси Марказий банки Бошқаруви қарор қилади:
1. Кредит бюролари ва кредит бюроларига кредит ахборотини тақдим этувчи органлар ва ташкилотлар ўртасида кредит ахбороти алмашинуви тартиби тўғрисида низом иловага мувофиқ тасдиқлансин.
2. Мазкур қарор Ўзбекистон Республикаси Адлия вазирлигида давлат рўйхатидан ўтказилган кундан бошлаб ўн кун ўтгандан кейин кучга киради.
Мазкур Низом Ўзбекистон Республикасининг «Ўзбекистон Республикасининг Марказий банки тўғрисида»ги (Ўзбекистон Республикаси Олий Мажлисининг Ахборотномаси, 1995 й., 12-сон, 247-модда) ва «Кредит ахбороти алмашинуви тўғрисида»ги (Ўзбекистон Республикаси қонун ҳужжатлари тўплами, 2011 й., 40-сон, 412-модда) қонунларига мувофиқ кредит бюролари ва кредит бюроларига кредит ахборотини тақдим этувчи органлар ва ташкилотлар ўртасида кредит ахбороти алмашинуви тартибини белгилайди.
1. Ўзбекистон Республикасининг «Кредит ахбороти алмашинуви тўғрисида»ги Қонунининг 17-моддасига мувофиқ кредит бюроларига қуйидаги органлар ва ташкилотлар (бундан буён матнда тегишли органлар ва ташкилотлар деб юритилади) томонидан кредит ахбороти тақдим этилади:
юридик шахсларни, якка тартибдаги тадбиркорларни давлат рўйхатидан ўтказувчи органлар томонидан — Юридик шахсларнинг давлат реестрига ва Якка тартибдаги тадбиркорларнинг давлат реестрига киритилган маълумотлар ҳажмида;
кўчмас мулк объектига бўлган ҳуқуқларни ва унга доир битимларни давлат рўйхатидан ўтказувчи органлар томонидан — Кўчмас мулкка бўлган ҳуқуқларнинг давлат реестрига ва кўчмас мулк ҳақидаги бошқа очиқ фойдаланиладиган маълумотлар базаларига киритилган маълумотлар ҳажмида;
давлат солиқ хизмати органлари томонидан — солиқ тўловчиларни ҳисобга олиш маълумотлари, шунингдек уларнинг молиявий ҳисоботи тўғрисида;
Олдинги таҳрирга қаранг.
ички ишлар органлари томонидан — берилган паспортлар ёки идентификацияловчи ID-карталар тўғрисида, шу жумладан йўқолган ёки амал қилиш муддати тугагани ўрнига берилган паспортлар ёки идентификацияловчи ID-карталар ҳақида, шунингдек автомототранспорт воситаларининг рўйхатдан ўтказилганлиги ҳақида ҳамда уларнинг мулкдорлари (эгалари) тўғрисида;
(1-банднинг бешинчи хатбошиси Ўзбекистон Республикаси Марказий банки Бошқарувининг 2022 йил 24 майдаги 5/24-сонли қарори (рўйхат рақами 2330-2, 07.06.2022 й.) таҳририда — Қонунчилик маълумотлари миллий базаси, 07.06.2022 й., 10/22/2330-2/0499-сон)
Олдинги таҳрирга қаранг.
нотариал идоралар томонидан — битим предмети бўлган объектни бошқа шахсга ўтказишни тақиқлаш ёки хатлов мавжуд эмаслиги тўғрисида;
(1-банднинг олтинчи хатбошиси Ўзбекистон Республикаси Марказий банки Бошқарувининг 2022 йил 24 майдаги 5/24-сонли қарори (рўйхат рақами 2330-2, 07.06.2022 й.) таҳририда — Қонунчилик маълумотлари миллий базаси, 07.06.2022 й., 10/22/2330-2/0499-сон)
лицензия ва (ёки) бошқа рухсат этувчи ҳужжатларни берувчи органлар томонидан — ушбу ҳужжатлар берилганлиги фактлари тўғрисида, лицензиянинг ва (ёки) бошқа рухсат этувчи ҳужжатларнинг амал қилиши тўхтатиб турилганлиги ёки тугатилганлиги ҳақида, шунингдек уларнинг бекор қилинганлиги ва қайта расмийлаштирилганлиги тўғрисида.
2. Кредит бюролари кредит ахбороти субъектларининг кредит тарихини шакллантириш учун тегишли органлар ва ташкилотлардан ўзаро тузилган кредит ахбороти алмашинуви тўғрисидаги шартнома (бундан буён матнда шартнома деб юритилади) асосида кредит ахборотини олишга ҳақли.
Олдинги таҳрирга қаранг.
3. Тегишли органлар ва ташкилотлар кредит бюролари билан қонунчилик ҳужжатлари талабларига мос бўлган шартномани тузишни асоссиз равишда рад этишга ҳақли эмас.
(3-банд Ўзбекистон Республикаси адлия вазирининг 2021 йил 28 июлдаги 16-мҳ-сонли буйруғи (рўйхат рақами 3313, 28.07.2021 й.) таҳририда — Қонунчилик маълумотлари миллий базаси, 28.07.2021 й., 10/21/3313/0724-сон)
4. Кредит бюролари тегишли органлар ва ташкилотларга кредит ахборотини олиш учун ёзма ёки электрон шаклда сўров юборади. Сўровда олинадиган кредит ахборотининг таркиби кўрсатилиши лозим.
Олдинги таҳрирга қаранг.
5. Кредит ахбороти алмашинувида кредит ахборотининг бутлигини, ишончлилигини, махфийлигини таъминлаш учун Кредит бюроларини рўйхатга олиш ва уларнинг фаолиятини лицензиялаш тартиби тўғрисидаги низомга (рўйхат рақами 3042, 2018 йил 25 июль) мувофиқ хавфсизлик чоралари кўрилиши лозим.
(5-банд Ўзбекистон Республикаси Марказий банки Бошқарувининг 2019 йил 8 июндаги 13/6-сонли қарори (рўйхат рақами 2330-1, 20.06.2019 й.) таҳририда — Қонун ҳужжатлари маълумотлари миллий базаси, 20.06.2019 й., 10/19/2330-1/3314-сон)
6. Тегишли органлар ва ташкилотлар кредит бюроларига қоида тариқасида кредит ахборотини электрон шаклда тақдим этади. Кредит ахборотининг қоғозда тақдим этилиши шартномада белгиланади.
7. Кредит бюроларида мавжуд бўлган кредит ахборотига зарар етганда ёки улар йўқолганда кредит бюролари тегишли органлар ва ташкилотлардан зарар етган ёки йўқолган кредит ахбороти ҳажмида қўшимча сўров асосида кредит ахборотини олиши лозим.
8. Кредит бюролари тегишли органлар ва ташкилотлардан олинаётган кредит ахборотининг махфийлигини таъминлаш учун ундан фойдаланиш ҳуқуқига эга бўлган ходимлари доирасини белгилайди.
9. Кредит бюролари тегишли органлар ва ташкилотлардан олинган кредит ахборотини йиғади, таҳлил қилади ва ундан кредит ахбороти субъектининг кредит тарихини шакллантиради.
10. Тегишли органлар ва ташкилотлар томонидан кредит бюроларига тақдим этилган кредит ахборотининг тўғри эканлигига кредит бюроларида шубҳа туғилса, улар тегишли органлар ва ташкилотларга бу ҳақида сўров юборишлари лозим. Кредит ахборотининг тўғрилиги юзасидан туғилган шубҳа ўз тасдиғини топган тақдирда тегишли органлар ва ташкилотлар кредит ахборотини уч иш куни муддатида тузатиб, бу ҳақда кредит бюроларини хабардор қилишлари лозим.
11. Тегишли органлар ва ташкилотлардан олинган кредит ахборотига кредит бюролари томонидан ўзгартириш киритиш тақиқланади, мазкур Низомнинг 10-банди бундан мустасно.
Олдинги таҳрирга қаранг.
12. Мазкур Низом талабларини бузишда айбдор бўлган шахслар қонунчилик ҳужжатларига мувофиқ жавобгар бўладилар.
(12-банд Ўзбекистон Республикаси адлия вазирининг 2021 йил 28 июлдаги 16-мҳ-сонли буйруғи (рўйхат рақами 3313, 28.07.2021 й.) таҳририда — Қонунчилик маълумотлари миллий базаси, 28.07.2021 й., 10/21/3313/0724-сон)
13. Мазкур Низом Ўзбекистон Республикаси Давлат солиқ қўмитаси, Ички ишлар вазирлиги ва Ер ресурслари, геодезия, картография ва давлат кадастри давлат қўмитаси билан келишилган.