LexUZ шарҳи
Мазкур қарор Ўзбекистон Республикаси Вазирлар Маҳкамасининг 2022 йил 21 июлдаги 396-сонли «Қонунчилик базасини янада тизимлаштириш чора-тадбирлари тўғрисида»ги қарорига асосан ўз кучини йўқотган.
Республика корхоналарида тайёрланаётган тери, мўйна хом ашёси ва қоракўлни янада тўлиқ қайта ишлаш мақсадида ва Ўзбекистон Республикаси Президентининг «Тери, мўйна хом ашёси ва қоракўл экспортини тартибга солиш тўғрисида»ги Фармонига мувофиқ Вазирлар Маҳкамаси қарор қилади:
1. Белгилаб қўйилсинки, республика бож чегараси орқали тери (ТИФ ТН бўйича кодлар 41044109) олиб чиқиб кетиш Вазирлар Маҳкамасининг рухсати билан амалга оширилади.
Кейинги таҳрирга қаранг.
2. Ўзбекистон Республикаси Марказий банки «Ўзбекенгилсаноат» давлат уюшмаси ва «Ўзбек қоракўли» компанияси билан биргаликда аҳолининг тери, қоракўл ва мўйна хом ашёсини туман савдо-тайёрлов кооперативларига (ширкатларга) топширишини рағбатлантириш мақсадида аҳолидан сотиб олинадиган тери, қоракўл ва мўйна хом ашёси учун ширкатларнинг муассислари бўлган жисмоний шахслар томонидан уларнинг устав жамғармаларига қўйилган нақд пул доирасида ўз нақд пуллари билан ҳисоб-китоб қилиши тартибини бир ой муддатда ишлаб чиқсин.
Кейинги таҳрирга қаранг.
3. Тайёрланаётган хом ашёни рақобатбардош маҳсулот қилиб янада чуқурроқ қайта ишлаш учун шарт-шароитлар яратиш мақсадида «Ўзбекенгилсаноат» давлат уюшмаси, Ўзбекистон Республикаси Қишлоқ ва сув хўжалиги вазирлиги, Ўзбекбирлашув, «Маҳаллий саноат» ҳудудий акциядорлик компаниялари Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда икки ой муддатда кўрсатиб ўтилган хом ашёни қайта ишловчи мавжуд ишлаб чиқариш қувватларини қайта рўйхатдан ўтказсинлар, улардан самарали фойдаланиш, уларни техника билан қайта жиҳозлаш, шу жумладан хорижий инвестицияларни жалб этган ҳолда қайта жиҳозлаш чора-тадбирларини белгиласинлар.
4. Ўзбекистон Республикаси Давлат божхона қўмитаси қўшни давлатлар билан бож чегарасида назоратни кучайтирсин ва хом ашёнинг кўрсатиб ўтилган турлари Ўзбекистон Республикаси Президентининг «Тери, мўйна хом ашёси ва қоракўл экспортини тартибга солиш тўғрисида»ги Фармонига ва мазкур қарорнинг 1-бандига қатъий мувофиқ ҳолда республика ташқарисига олиб чиқиб кетилишига йўл қўйсин.
Кейинги таҳрирга қаранг.
5. Ўзбекистон Республикаси Вазирлар Маҳкамасининг «Ўзбекистон товар-хом ашё биржасида савдони янада ривожлантириш чора-тадбирлари тўғрисида» 1996 йил 20 сентябрдаги 329-сон қарорига 1-иловадан 5-банд чиқариб ташлансин.