LexUZ шарҳи
Мазкур қарор Ўзбекистон Республикаси Вазирлар Маҳкамасининг 2018 йил 7 декабрдаги 995-сонли «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида (Ўзбекистон Республикаси Президентининг «Қишлоқ ва сув хўжалиги давлат бошқаруви тизимини тубдан такомиллаштириш чора-тадбирлари тўғрисида» 2018 йил 17 апрелдаги ПФ-5418-сон Фармони, Ўзбекистон Республикаси Президентининг «Ўзбекистон Республикаси Қишлоқ хўжалиги вазирлиги фаолиятини ташкил этиш чора-тадбирлари тўғрисида» 2018 йил 17 апрелдаги ПҚ-3671-сон қарори, «Ўзбекистон Республикаси Сув хўжалиги вазирлиги фаолиятини ташкил этиш чора-тадбирлари тўғрисида» 2018 йил 17 апрелдаги ПҚ-3672-сон қарори)»ги қарорига асосан ўз кучини йўқотган.
Бошоқли Дон экинларининг ўзимизда етиштирилган уруғларининг мустаҳкам асосини яратиш, республика хўжаликларини бошоқли дон экинлари юқори ҳосилли навларининг сифатли уруғлиги билан кафолатли таъминлаш мақсадида Вазирлар Маҳкамаси қарор қилади:
ходимларнинг умумий сони доирасида вазирлик ҳузурида Бошоқли дон экинлари уруғчилиги республика бошқармасини ташкил этсин;
ўн кун муддатда Қишлоқ ва сув хўжалиги вазирлиги ҳузуридаги Бошоқли дон экинлари уруғчилиги республика бошқармаси тўғрисидаги низомни ишлаб чиқсин ва белгиланган тартибда тасдиқласин.
2. Ўзбекистон Республикаси Қишлоқ ва сув хўжалиги вазирлиги Қорақалпоғистон Республикаси Вазирлар Кенгаши, вилоятлар ҳокимликлари билан биргаликда Андижон дон ва дуккакли дон экинлари илмий-тадқиқот, институтининг юридик шахс ҳуқуқига эга бўлган Қорақалпоғистон республика ва вилоятлар филиалларини ҳамда давлат нав синаш участкаларини хўжаликлар негизида 1-иловага* мувофиқ ташкил этсин.
Кўрсатиб ўтилган институтнинг Вазирлар Маҳкамасининг 1997 йил 25 августдаги 413-сон қарорига мувофиқ ташкил этилган Қорақалпоғистон, Фарғона, Бухоро, Сирдарё, Сурхондарё, Хоразм бўлимлари тугатилсин.
3. Андижон илмий-тадқиқот институтининг филиаллари томонидан давлат илмий-техника дастурлари доирасида бажариладиган илмий-техника дастурларини маблағ билан таъминлаш «Фан» тармоғи бўйича ажратиладиган бюджет маблағлари ва ўз хўжалик фаолияти ҳисобига амалга оширилсин.
4. Ўзбекистон Республикаси Фан ва техника давлат қўмитаси Қишлоқ ва сув хўжалиги вазирлиги ҳузуридаги Қишлоқ хўжалиги илмий ишлаб-чиқариш маркази билан биргаликда 1999 йилги илмий-тадқиқот ишлари прогнозида Андижон дон илмий-тадқиқот институти ва унинг филиаллари томонидан тегишли давлат илмий-техника дастурлари бажарилишини назарда тутсин.
5. «Элита» Ўзбекистон—Ирландия қўшма корхонаси («Элита» Қ.К, Самарқанд вилояти) томонидан 1998 йилда бошоқли дон экинларининг 18 минг тонна элита ва суперэлита уруғлари етиштирилганлиги, 1999 йилда уруғ етиштириш ҳажми 32,0 минг тоннага етказилиши маълумот учун қабул қилинсин.
«Ўздонмаҳсулот» давлат корпорацияси 1999 йил ҳосилидан бошлаб Андижон вилояти хўжаликларидан уруғ сотиб олиш ҳажмини тегишли равишда қисқартирган ҳолда кўрсатилган уруғ миқдорини «Элита» қўшма корхонасидан сотиб олсин.
Ўзбекистон Республикаси Қишлоқ ва сув хўжалиги вазирлиги 1999 йил ҳосилидан бошлаб Бошоқли дон экинлари уруғини Самарқанд вилоятида ишлаб чиқарилган ҳажмни ҳисобга олган ҳолда тақсимласин.
6. Қўшма корхона қатнашчилари бўлган хўжаликларнинг илмий-тадқиқот ишлари олиб бориш мақсадида бошоқли дон экинлари экилган ерларига, ушбу ерлар ер солиғидан озод қилинган ҳолда, илмий муассасалар учун белгиланган солиқ солиш шартлари татбиқ этилсин.
Кейинги таҳрирга қаранг.
1-иловада кўрсатилган хўжаликларнинг бюджет, Пенсия жамғармаси ва Иш билан таъминлашга кўмаклашиш жамғармаси олдидаги қарзларини қайтаришни 1998 йил 1 январдаги ҳолатига кўра пеня ҳисобламасдан 3 йилга кечиктирсинлар;
бюджетга муддатида тўланмаган тўловлар бўйича ҳисобланган пенялар 1998 йил 1 январдаги ҳолатига кўра ҳисобдан чиқарилсин;
Андижон дон илмий-тадқиқот институти филиалларига алмашлаб экиш ва қишлоқ хўжалиги экинлари навини алмаштиришнинг амалдаги схемалари доирасида хўжаликларнинг ҳар бир филиал учун 300 гектаргача ажратиладиган ерлари ер солиғи тўлашдан 1999 йил 1 январдан бошлаб 3 йилга озод этилсин.
8. «Ўздонмаҳсулот» давлат корпорацияси Андижон илмий-тадқиқот институти филиаллари ва нав синаш участкалари ташкил этилган хўжаликларга ва синов ўтказиладиган бошқа хўжаликларга бошоқли дон экинларининг истиқболли ва юқори ҳосилли навлари уруғларини 2-иловага* мувофиқ етказиб берсин.
Қорақалпоғистон Республикаси Вазирлар Кенгаши, вилоятлар ҳокимликлари Қишлоқ ва сув хўжалиги вазирлиги билан биргаликда бошоқли дон экинларининг кенг ишлаб чиқариш синови ўтказиладиган хўжаликларни аниқласинлар.
9. «Ўздонмаҳсулот» давлат корпорацияси Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда бошоқли дон экинлари уруғларини қабул қиладиган, сақлайдиган ва сотадиган ихтисослаштирилган дон қабул қилиш корхоналари рўйхатини аниқласин, бошоқли дон экинлари уруғларини эса фақат Қишлоқ ва сув хўжалиги вазирлиги ҳузуридаги «Ўздавуруғназоратмарказ»нинг хулосаси бўйича сотсин.