1. Мазкур тартиб Ўзбекистон Республикаси Вазирлар Маҳкамасининг 1999 йил 10 июндаги 296-сон ва 1999 йил 26 июлдаги 362-сон қарорларига мувофиқ ишлаб чиқилган, унинг мақсади иқтисодий ночорлик белгиларини эрта босқичда аниқлаш, кичик ва ўрта бизнес корхоналарини (матн давомида — корхоналар) санациялаш ёки тугатиш бўйича тадбирларни ишлаб чиқишни амалга ошириш йўли билан корхоналар банкрот бўлишининг олдини олиш ва уларнинг тўловга қобиллигини қўллаб-қувватлашдан иборатдир.

2. Иқтисодий ҳолатига боглиқ равишда корхоналар қуйидаги гуруҳларга бўлинади:

барқарор молиявий аҳволга эга;

иқтисодий таваккалчиликга эга;

иқтисодий ночор.

3. Иқтисодий таваккалчилик белгилари аниқланганда корхоналар молия-хўжалик фаолиятини согломлаштириш бўйича тадбирлар мажмуини ишлаб чиқишлари ва амалга оширишлари керак.

4. Иқтисодий ночор корхоналар қонунга мувофиқ банкротлик тўғрисида эълон бериш йўли билан мажбуран (ихтиёрий равишда) тугатилиши керак.

5. Корхоналарнинг иқтисодий ҳолатини баҳолаш ва уларни иқтисодий ҳолатни акс эттирувчи гуруҳларга киритиш учун асосий кўрсаткичлар (мезонлар) қуйидаги тарзда белгиланади:

1) қарзларни улар тўланадиган пайтга қадар 60 кунгача реализация тушумлари билан узганда — корхоналар «молиявий барқарор корхоналар» гуруҳига киритилади;

2) улар тўланадиган пайтга қадар 180 кунгача пул мажбуриятлари ва мажбурий тўловлар бўйича муддати ўтган кредиторлик қарзлари мавжуд бўлганда - корхоналар «иқтисодий таваккалчиликли корхоналар» гуруҳига киритилади;

3) улар тўланадиган пайтга қадар олти ойгача пул мажбуриятлари ва мажбурий тўловлар бўйича муддати ўтган кредиторлик қарзлари мавжуд бўлганда - корхоналар «иқтисодий ночор корхоналар» гуруҳига киритилади.

6. Пул мажбуриятлари ва мажбурий тўловлар бўйича муддати ўтган қарзлар қонунга мувофиқ мажбурий тўловларни тўлаш мажбуриятлари ва пул мажбуриятлари бўйича кредиторларнинг талабларини бажариш пайти келиши билан белгиланади (масалан, солиқларни бюджетга ҳар ойда ёки ҳар чоракда, ҳисобот давридан кейинги муайян санада тўлаш муддатлари).

7. Қарзлар суммасини белгилаш пайтида муддати ўтмаган, узоқ муддатли ва қисқа муддатли кредитлар ва заёмлар, яъни тўлаш муддати келмаган узоқ муддатли ва қисқа муддатли кредитлар ва заёмлар суммалари чиқариб ташланиши мумкин.

8. Муддати олти ойдан ошиб кетган қарзлар тўғрисидаги маълумотлар «Дебиторлик ва кредиторлик қарзлари тўғрисидаги маълумотнома» деган 2-а-Молиявий ҳисобот шаклидан олинади.

9. Иқтисодий ночорликни белгилаш учун мазкур ҳужжат билан тасдиқланган коэффициентларнинг меъёрий қийматлари барча кичик ва ўрта корхоналар учун ягонадир. Бунда алоҳида тармоқларнинг ўзига хос жиҳатларини ҳисобга олган ҳолда уларни ҳисоблаш усули, Макроиқтисодстат вазирлиги қошидаги Иқтисодий ночор корхоналар ишлари қўмитаси ва Товар ишлаб чиқарувчилар ҳамда тадбиркорлар Палатаси билан келишган ҳолда, ўзгариши мумкин.

10. Мазкур мезонлар тизими у Ўзбекистон Республикаси Адлия вазирлигида рўйхатга олинган пайтдан бошлаб амалга киритилади.