1. Ушбу кўрсатмалар «Ўзбекистон Республикаси Марказий банки тўғрисида»ги Қонун, «Банклар ва банк фаолияти тўғрисида»ги қонунларга мувофиқ, шунингдек Ўзбекистон Республикаси Президентининг 1998 йил 9 апрелдаги «Хусусий тадбиркорлик, кичик ва ўрта бизнесни ривожлантиришни янада рағбатлантириш чоралари тўғрисида»ги Фармонининг ва Ўзбекистон Республикаси Вазирлар Маҳкамасининг 1998 йил 28 майдаги 232-сонли «Кичик ва ўрта бизнесни ривожлантиришни рағбатлантириш механизмини яхшилаш тўғрисида»ги қарорининг ижросини таъминлаш мақсадида ишлаб чиқилди.

2. Консалтинг — хўжалик юритувчи субъектларга иқтисодий фаолият соҳасида маслаҳат бериш фаолиятидир.

3. Банклардаги консалтинг фаолияти ушбу кўрсатмалар, шунингдек банк уставига мувофиқ ишлаб чиқилган тижорат банкларининг консалтинг хизмати тўғрисидаги низом доирасида ташкил қилинади.

4. Банк консалтинг хизматининг асосий вазифаси тадбиркорларга ва хўжалик юритувчи субъектларга банк хизмати ва маблағларини энг самарали қўйиш билан боғлиқ масалалар бўйича маълумот-маслаҳат хизматларини кўрсатишдир.

5. Консалтинг хизмати тижорат (тўлов) асосида кўрсатилиши мумкин.

6. Консалтинг хизмати тадбиркорларга, кичик ва ўрта бизнес субъектларига уларнинг маблағларини энг самарали қўйиш, фаолият самарадорлигини ошириш, қўшимча ривожланиш манбаларини аниқлаш, шунингдек тадбиркорларни, шу жумладан чет эл инвесторларини инвестиция фаолиятларига кўмаклашиши бўйича маслаҳат тусидаги хизмат кўрсатиши зарур.

7. Тижорат банкларининг консалтинг хизмати хўжалик юритувчи субъектларга қуйидаги масалалар бўйича маслаҳат ва маълумот бериш хизматларини кўрсатиши мумкин:

банк хизмати турлари ҳақида;

тижорат банклари томонидан амалга ошириладиган операциялар;

бизнес бўйича ҳамкорлар билан оптимал ҳисоб-китобни ташкил қилиш;

хўжалик юритувчи субъектларни кредитлаш турлари ва усуллари;

бизнес план тузиш ва техник-иқтисодий асослаб бериш;

инвестиция таклифларни техник-иқтисодий асослаб бериш, инвестиция лойиҳаларига танлов конкурсига қатнашиш учун зарур ҳужжатларни тайёрлаш;

банк кредитларини расмийлаштириш учун зарур ҳужжатлар пакетини тузиш бўйича хизмат кўрсатиш;

хўжалик юритувчи субъектларнинг ликвидлигининг таҳлили;

тадбиркорнинг ишлаб чиқариш потенциалининг таҳлили;

кредитлаш ва ҳисоб-китоб усуллари;

инвестиция фаолияти ва пул маблағларини қўйишнинг устувор йўналишлари;

маркетинг ва маҳсулотни сотиш;

молия ва инвестицияларни бошқариш;

банк қонунчилиги ва банк тизимидаги амалдаги низомлар.

8. Мижозлар билан шартномалар йил давомида маслаҳат-маълумот хизмати ёки бир марталик хизмат кўрсатишга тузилиши мумкин.

9. Банклар кўрсатилган хизматларининг сифати ва берилган маълумотларнинг тўғрилиги учун амалдаги қонунчиликда ўрнатилган тартибда жавобгардирлар.

10. Консалтинг хизмати тавсиялари мижознинг пул маблағларини тежашга, унинг фаолияти самарадорлигини оширишга, ривожланишнинг қўшимча манбаларини аниқлашга ёрдам бериши керак.

11. Тавсиялар ёзма ҳолда тузилиши ва банк раҳбариятининг имзоси остида расмий тусда берилиши керак.

12. Мижоз консалтинг хизматига мурожаат қилганида номини, турар жойини, банк ҳисоб рақамини, хизматнинг аниқ мазмуни ва унинг мақсадини кўрсатган ҳолда ёзма шаклда буюртма беради.

13. Мижоз билан келишувга асосан, тижорат банки ўз ходимини мижознинг корхонасига қуйидаги масалалар бўйича юбориши мумкин:

бухгалтерия ҳисобини олиб борилиши ва ҳисоботнинг тузилишини ўрганиш;

молиявий мажбуриятларнинг бажарилиш тартиби ва пул маблағлари ҳаракатининг прогнозини тузиш;

молиявий режалаштириш таҳлили;

смета тузиш;

товар захираларини бошқариш;

қўшимча харажатлар.

14. Шуни алоҳида таъкидлаш керакки, консалтинг хизмати тавсиялари банк сири тусида бўлиши лозим, консалтинг хизматининг барча ходимлари банк ва мижознинг тижорат сирларини ошкор қилмаслик тўғрисида тилхат беришлари керак. Буни бузганлик ҳолларида улар амалдаги қонунчиликка мувофиқ қатъий жавобгарликка тортилишлари керак.

Банк сирини ташкил қилувчи маълумотлар ошкор қилинганда, ҳуқуқи бузилган мижоз банкдан кўрсатилган зарарни қоплашни талаб қилишга ҳақли.