Ўзбекистон Республикаси Президентининг «Тошкент шаҳрида «ММФИ» миллий тадқиқот ядро университети» Федерал давлат автоном олий таълим муассасасини ташкил этиш ва унинг фаолиятини ташкил этиш тўғрисида» 2018 йил 20 июлдаги ПҚ-3875-сон қарорига мувофиқ, шунингдек, «ММФИ» миллий тадқиқот ядро университети» Федерал давлат автоном олий таълим муассасасининг Тошкент шаҳридаги филиалида республика атом соҳаси учун олий маълумотли малакали кадрлар тайёрлашни таъминлаш мақсадида Вазирлар Маҳкамаси қарор қилади:

1. Ўзбекистон Республикаси Энергетика вазирлиги ҳузуридаги Атом энергетикасини ривожлантириш агентлигининг Ўзбекистон Республикаси ҳудудида атом электр станциясини қуриш лойиҳасини амалга ошириш учун атом энергетикаси ва ядро технологиялари соҳасида олий малакали кадрларга бўлган эҳтиёжини ҳисобга олган ҳолда:

2019/2020 ўқув йилида «ММФИ» миллий тадқиқот ядро университети» федерал давлат автоном олий таълим муассасасининг Тошкент шаҳридаги филиалида (кейинги ўринларда — Филиал) бакалаврлар тайёрлаш бўйича 100 нафар қабул квотаси иловага мувофиқ;

Филиалда кадрлар тайёрлаш фақат грант асосида амалга оширилиши маълумот учун қабул қилинсин.

2. Ўзбекистон Республикаси Олий ва ўрта махсус таълим вазирлиги, Энергетика вазирлиги ҳузуридаги Атом энергетикасини ривожлантириш агентлиги «ММФИ» миллий тадқиқот ядро университети» Федерал давлат автоном олий таълим муассасаси билан биргаликда 2019/2020 ўқув йилида Филиалга кириш имтиҳонларини ўтказиш бўйича ташкилий-техник тадбирларнинг белгиланган тартибда бажарилишини таъминласин.

3. Мазкур қарорнинг бажарилишини назорат қилиш Ўзбекистон Республикаси энергетика вазири А.С. Султонов ва Ўзбекистон Республикаси олий ва ўрта махсус таълим вазири И.У. Маджидов зиммасига юклансин.