LexUZ шарҳи
Мазкур қарор Ўзбекистон Республикаси Вазирлар Маҳкамасининг 2018 йил 19 декабрдаги 1034-сонли «Ўзбекистон Республикаси Қизил китобини тайёрлаш, нашр этиш ва юритишни ташкил қилиш чора-тадбирлари тўғрисида»ги қарорига асосан ўз кучини йўқотган.
Вазирлар Маҳкамаси қарор қилади:
Олдинги таҳрирга қаранг.
1. Ноёб ва йўқолиб кетиш хавфи остидаги ҳайвонлар ва ўсимликларнинг Қизил китоби — «Ўзбекистон Республикасининг Қизил китоби»ни юритиш Ўзбекистон Республикаси Фанлар академияси, «Ўзбекбалиқ» концерни, Ўзбекистон балиқчилик хўжалиги илмий-тадқиқот институти, Мирзо Улуғбек номидаги Ўзбекистон миллий университети, Ўзбекистон Республикаси Қишлоқ ва сув хўжалиги вазирлиги ҳузуридаги Ўрмон хўжалиги бош бошқармаси иштирокида Ўзбекистон Республикаси Давлат табиатни муҳофаза қилиш қўмитасига юклатилсин.
Кейинги таҳрирга қаранг.
Қизил китоб Ўзбекистоннинг ёввойи ҳайвонлари ва ўсимликларини сақлаб қолиш ва улардан оқилона фойдаланиш тадбирларини ишлаб чиқиш ва амалга ошириш учун зарур бўлган бундай ҳайвонлар ва ўсимликларнинг ноёб ва йўқолиб кетиш хавфи остидаги турлари (кенжа турлари, популяциялари)нинг аҳволи ва уларни муҳофаза қилиш чора-тадбирлари тўғрисидаги маълумотлар мажмуидан иборат бўлиши керак.
(1-банд Ўзбекистон Республикаси Вазирлар Маҳкамасининг 2000 йил 14 апрелдаги 149-сонли қарори таҳририда)
2. Ўзбекистон Республикаси Молия вазирлиги Ўзбекистон Давлат табиатни муҳофаза қилиш қўмитаси билан биргаликда Қизил китобни юритиш билан боғлиқ ишларни маблағ билан таъминлаш тартибини ишлаб чиқсин.
3. Ўзбекистон Республикаси Давлат табиатни муҳофаза қилиш қўмитаси Ўзбекистон Республикаси Фанлар академияси ва бошқа манфаатдор ташкилотлар билан биргаликда «Ўзбекистон Республикасининг Қизил китоби» тўғрисидаги Низомни ишлаб чиқсин ва тасдиқласин.
4. Ҳайвонлар ва ўсимликлар турлари ҳолатини таҳлил қилиш ва уларни Қизил китобга киритиш ёки ундан чиқариш ҳақидаги тавсияларни ишлаб чиқиш учун Ўзбекистон Республикаси Давлат табиатни муҳофаза қилиш қўмитаси ҳузурида «Ўзбекистон Республикасининг Қизил китоби»ни юритиш бўйича идоралараро комиссия тузилсин.
Ўзбекистон Республикаси Давлат табиатни муҳофаза қилиш қўмитаси Идоралараро комиссиянинг шахсий таркибини ва у ҳақдаги Низомни тасдиқласин. Идоралараро комиссиянинг тақдими бўйича ҳайвонлар ва ўсимликларни Қизил китобга киритиш ёки ундан чиқариш тўғрисидаги қарор Ўзбекистон Республикаси Давлат табиатни муҳофаза қилиш қўмитаси ва Ўзбекистон Республикаси Фанлар академияси томонидан бошқа манфаатдор ташкилотлар билан келишилган ҳолда қабул қилинади.
Давлатлараро ва Халқаро Қизил китобларга киритилган ҳайвонлар ва ўсимликларнинг турлари, агар ҳайвонлар ва ўсимликларнинг бу турлари республика ҳудудида вақтинча ёки доимий яшаса ёки ўсса, «Ўзбекистон Республикасининг Қизил китоби»га киритилиши керак.
Олдинги таҳрирга қаранг.
5. Ўзбекистоннинг бутун ҳудудида Қизил китобга киритилган ҳайвонларни овлаш ва ўсимликларни йиғиштириб олиш ман этилсин, Ўзбекистон Республикаси қонунларида назарда тутилган ҳоллар бундан мустаснодир.
(5-банднинг биринчи хатбошиси Ўзбекистон Республикаси Вазирлар Маҳкамасининг 2000 йил 14 апрелдаги 149-сонли қарори таҳририда)
Кўрсатиб ўтилган ҳайвонлар ва ўсимликларни, уларнинг инлари, тухумлари, мевалари, уруғларини, шу ҳайвонлар ва ўсимликларнинг бўлаклари ҳамда ҳаёт фаолияти маҳсулотларини овлаш (йиғиштириб олиш), ташқарига олиб кетиш ҳамда Қизил китобга киритилган ҳайвонлар ва ўсимликларга зарар етказадиган ҳайвонлар ва ўсимликларни олиб келиш фавқулодда ҳолларда ва фақат Ўзбекистон Республикаси Давлат табиатни муҳофаза қилиш қўмитасининг рухсати билан амалга оширилиши мумкин.
6. Ўзбекистон Республикаси Давлат матбуот қўмитаси Ўзбекистон Республикаси Давлат табиатни муҳофаза қилиш қўмитасининг буюртмасига кўра Қизил китобнинг 10 йилда камида бир марта қайта нашр этилишини таъминласин.
7. Давлат, кооператив, бошқа жамоат ташкилотлари ҳамда фуқаролар Қизил китобга киритилган ҳайвонлар ва ўсимликларнинг нобуд бўлиши ҳақидаги аниқланган барча ҳоллар ҳақида давлат табиатни муҳофаза қилиш органларига хабар қилишлари шарт, бундан ташқари ҳайвонларнинг оммавий нобуд бўлиши ёки оммавий касалланиши ҳоллари ҳақида эса зудлик билан ветеринария ва санитария назорати органларига хабар беришлари керак.
8. «Ўзбекистон Республикасининг Қизил китоби»га киритилган ҳайвонлар ва ўсимликларни ғайриқонуний овлаш ёки йўқ қилиш натижасида етказилган зарар миқдорини ундириб олиш учун қатъий баҳолар Ўзбекистон Республикаси Молия вазирлиги билан келишилган ҳолда Ўзбекистон Республикаси Давлат табиатни муҳофаза қилиш қўмитаси томонидан тасдиқланади.
9. Ўзбекистон ССР Министрлар Советининг «Ўзбекистон ССРнинг камдан-кам учрайдиган ва йўқолиб кетиши хавфи бўлган ҳайвон ва ўсимликлари турлари дафтари — «Ўзбекистон ССРнинг Қизил дафтари»ни таъсис этиш тўғрисида» 1978 йил 27 сентябрдаги 564-сон қарори ўз кучини йўқотган деб ҳисоблансин (ЎзССР ҚТ, 1978 й., 9-сон, 33-модда).