Қишлоқ хўжалиги машинасозлиги соҳасида илмий-техникавий салоҳиятни янада ривожлантириш, қишлоқ хўжалиги техникасининг янги турларини ўзлаштиришга йўналтирилган ягона илмий-техникавий ва инвестициявий сиёсатни олиб бориш, республиканинг қишлоқ хўжалигида ресурсларни тежайдиган агротехнологияларни жорий этишни таъминлайдиган юқори қувватга эга қишлоқ хўжалиги техникаси ва механизация воситаларини ишлаб чиқариш бўйича замонавий ишлаб чиқаришларни барпо этиш мақсадида:

1. Маълумот учун қабул қилинсинки:

Ўзбекистон Республикаси Ташқи иқтисодий алоқалар, инвестициялар ва савдо вазирлиги ҳамда Корея Республикаси Савдо, саноат ва энергетика вазирлиги ўртасида 2016 йилнинг 28 сентябрида мамлакатларимиз ўртасида ўзаро ҳамкорликни мустаҳкамлаш ва илғор технологиялар билан алмашишни, шунингдек, Ўзбекистонда қишлоқ хўжалиги машинасозлиги конструкторлик-технологик ўзбек-корея марказини ташкил этишни назарда тутадиган Қишлоқ хўжалиги машинасозлиги тармоғида ҳамкорлик қилиш масалалари бўйича ўзаро англашув Меморандуми (кейинги ўринларда — Меморандум) имзоланди;

Меморандумга мувофиқ Ўзбекистон томони ишлаб чиқариш майдонларини ва уларни реконструкция қилишни, Корея томони — қўшма марказ фаолиятини ташкил этиш учун зарур ускуналари тақдим этилишини таъминлайди;

имзоланган Меморандумни амалга оширишда Ўзбекистон томонидан масъул ташкилотлар этиб «Ўзагротехмаш» АЖ, Корея томонидан — Корея Республикаси Савдо, саноат ва энергетика вазирлиги ҳузуридаги Технологияларни ривожлантириш Корея институти белгиланди;

Ўзбекистон Республикаси Президентининг «2015 — 2019 йилларда таркибий ўзгартиришларни таъминлаш, ишлаб чиқаришни модернизация ва диверсификация қилиш чора-тадбирлари Дастури тўғрисида» 2015 йил 4 мартдаги ПФ-4707-сонли Фармонида назарда тутилган «Тажрибавий ишлаб чиқаришни ўз ичига олган конструкторлик бюросини ташкил этиш» инвестиция лойиҳасини амалга ошириш мақсадида «Ўзагротехсаноатхолдинг» АЖ тузилмасида «Agrosanoatmashinjiniring» МЧЖ ташкил этилди;

тугатилаётган «Тошкент трактор заводи» АЖ кредиторлари қўмитаси йиғилишида Ўзбекистон Республикасининг «Банкротлик тўғрисида»ги Қонунига, шу жумладан, «Трактор» ҚКБ» УК ва «ЎзАгротех КБ» МЧЖ мувофиқ акциядорлик жамиятининг сотилмаган ва кредиторлар томонидан талаб этилмаётган активларини Тошкент шаҳри ҳокимлигига топшириш таклифи маъкулланган.

2. «Ўзагротехсаноатхолдинг» АЖ, Ўзбекистон Республикаси Хусусий корхоналарга кўмаклашиш ва рақобатни ривожлантириш давлат қўмитаси ва Тошкент шаҳар ҳокимлигининг:

«Трактор» ҚКБ» УК ва «ЎзАгротех КБ» МЧЖнинг устав капиталларидаги «Тошкент трактор заводи» АЖ улушини давлат улушини шакллантириш учун «Ўзагротехмаш» АЖ устав капиталига белгиланган тартибда топшириш орқали кейинчалик номинал нархи бўйича «Ўзагротехсаноатхолдинг» АЖнинг устав капиталига топшириш ҳисобига уларни Тошкент шаҳри ҳокимлигига топшириш;

«Agrosanoatmashinjiniring» МЧЖни «Қишлоқ хўжалиги машинасозлиги конструкторлик-технологик маркази» МЧЖ (кейинги ўринларда — Марказ) этиб қайта номлаш, кейинчалик унга илмий-текшириш ва тажриба-конструктор ишлари, технологик лойиҳалаштириш ҳамда замонавий технологияларни жорий этиш, шунингдек, тажриба-экспериментал ишлаб чиқариш бўйича бўлинмаларни ўз ичига олган «Трактор» ҚКБ» УК ва «ЎзАгротех КБ» МЧЖни бирлаштириш;

«Агромаш-БМКБ» АЖ устав капиталидаги «Ўзагротехмаш» АЖ акциялар пакетини баҳолаш ташкилоти томонидан белгиланган нархда Марказнинг устав капиталига топшириш тўғрисидаги таклифларига розилик берилсин.

3. Қуйидагилар Марказнинг асосий вазифалари этиб белгилансин:

қишлоқ хўжалиги техникасининг амалий масалалари бўйича илмий-текшириш ва инновация ишларини олиб бориш;

ресурс тежовчи агротехнологиялар бўйича пахта, ғалла, боғдорчилик-узумчилик, сабзавот-дуккакли ўсимликларни қайта ишлаш учун замонавий қишлоқ хўжалиги техникасининг янги турларини, шунингдек, махсус техниканинг бошқа турларини ишлаб чиқиш;

янги машиналар ва ускуналарнинг тажриба намуналарини ишлаб чиқариш учун технологик асбоб-ускуналарни ишлаб чиқиш ва тайёрлаш;

тармоқ корхоналарида уларни кейинчалик жорий этиш мақсадида, замонавий технологиялар ва ускуналардан фойдаланган ҳолда янги қишлоқ хўжалиги техникаси тажриба намуналарини тайёрлаш;

қишлоқ хўжалиги техникасининг янги намуналарини синовдан ўтказишни ўз ичига олган тармоқдаги илмий-текшириш, инновация ва тажриба-конструкторлик ишларини мувофиқлаштириш;

тармоқ корхоналари ва республиканинг бошқа ташкилотлари ўртасида илмий-техникавий кооперацияни ривожлантириш;

Корея Республикаси Савдо, саноат ва энергетика вазирлиги ҳузуридаги Технологияларни ривожлантириш Корея институтини ҳисобга олган ҳолда, машинасозлик соҳасидаги илғор хорижий илмий-текшириш институтлари, инжиниринг марказлари, ишлаб чиқарувчи компаниялар ва халқаро ташкилотлар билан ҳамкорлик ўрнатиш.

4. Белгилансинки, Марказ қайта ташкил этилаётган «Трактор» ҚКБ» УК ва «ЎзАгротех КБ» МЧЖнинг интеллектуал мулки объектлари, илмий-конструкторлик ишланмалари ва бошқа техник ҳужжатлар, шунингдек, илмий-техник лойиҳалар ва мазкур ташкилотларнинг тузилган шартномаларини амалга оширишни ҳисобга олган ҳолда ҳуқуқлари ва мажбуриятлари бўйича ҳуқуқий вориси ҳисобланади.

5. «Ўзагротехсаноатхолдинг» АЖ Марказнинг таъсис ҳужжатларини, унинг тузилмаси, штат жадвалини белгиланган тартибда тасдиқланишини, шунингдек, уни юқори малакали мутахассислар билан бутлашни таъминласин.

6. Маълумот учун қабул қилинсинки, Корея томонининг Меморандумига мувофиқ 2016 йилнинг декабрь ойида — 2017 йилнинг февраль ойида «Agrosanoatmashinjiniring» МЧЖ манзилига 364,4 минг АҚШ доллари миқдоридаги дастурий таъминот, ҳисоблаш ва ўлчаш ускуналари етказиб берилди.

«Ўзагротехсаноатхолдинг» АЖ:

Корея томони билан белгиланган тартибда Ўзбекистон — Корея қишлоқ хўжалиги машинасозлиги конструкторлик-технологик Марказини ташкил этиш лойиҳасини янада амалга ошириш бўйича ишларни давом этсин;

лойиҳанинг амалга оширилиб борилиши тўғрисидаги ахборотни ҳар чоракда Ўзбекистон Республикаси Вазирлар Маҳкамасига тақдим этиб борсин.

7. «Ўзагротехсаноатхолдинг» АЖ, Фанлар академияси, Фан ва технологиялар агентлиги, Ўзбекистон Республикаси Қишлоқ ва сув хўжалиги вазирлигининг тармоқда ягона техник сиёсатни самарали олиб боришни таъминлаш, илмий-техник ва технологик ривожлантиришда устувор ва истиқболли йўналишларни белгилаш, техник ва иқтисодий асосланган қарорларни ишлаб чиқиш, шунингдек, ушбу ташкилотларнинг юқори малакали мутахассислари, олимлар, муҳандислар ва конструкторлари, шу жумладан, манфаатдор бошқа вакиллар ичидан шакллантириладиган тегишли маҳаллий ва хорижий илмий-текшириш муассасалари билан самарали ўзаро баҳамжиҳат ҳаракатларни амалга ошириш учун «Ўзагротехсаноатхолдинг» АЖ ҳузурида Илмий-техникавий кенгашни ташкил этиш тўғрисидаги таклифига розилик берилсин.

«Ўзагротехсаноатхолдинг» АЖ Фанлар академияси, Фан ва технологиялар агентлиги, Ўзбекистон Республикаси Қишлоқ ва сув хўжалиги вазирлиги билан биргаликда икки ой муддатда Илмий-техникавий кенгаш тўғрисидаги Низомни, шунингдек, 2020 йилгача илмий-текшириш, инновация ва тажриба-конструкторлик ишларининг тармоқ дастурларини тасдиқласин.

8. Марказ 2020 йилнинг 1 январигача қўшилган қиймат солиғи, мулк солиғи ва Ўзбекистон Республикаси Вазирлар Маҳкамаси ҳузуридаги Республика йўл жамғармаси ва Ўзбекистон Республикаси Молия вазирлиги ҳузуридаги Таълим ва тиббиёт муассасаларининг моддий-техник базасини ривожлантириш бюджетдан ташқари жамғармасига бўлган мажбурий ажратмалардан озод этилсин.

9. Ўзбекистон Республикаси Ташқи ишлар вазирлиги Марказ талабномаларига кўра Марказ лойиҳаларини амалга оширишда иштирок этадиган чет эллик мутахассисларга консуллик ва бошқа йиғимлар ундирилмаган ҳолда кўп марталик визалар расмийлаштирилишини таъминласин.

10. Ўзбекистон Республикаси Ички ишлар вазирлиги Марказ талабномаларига кўра Марказ лойиҳаларини амалга оширишда иштирок этадиган чет эллик мутахассисларга давлат божларини ундирмаган ҳолда кўп марталик визалар берилишини ва визалар муддати узайтирилишини, шунингдек, уларнинг вақтинчалик яшаш жойига прописка қилинишини ва вақтинчалик прописка муддати узайтирилишини таъминласин.

11. Ўзбекистон Республикаси Меҳнат вазирлиги Марказ талабномаларига кўра Марказ лойиҳаларини амалга оширишда иштирок этаётган мутахассисларга Ўзбекистон Республикасига жалб қилиш учун белгиланган тартибдаги рухсатномалар берилишини (муддати узайтирилишини), шунингдек, ушбу чет эллик фуқароларга Ўзбекистон Республикаси ҳудудида меҳнат фаолиятини амалга ошириш ҳуқуқига тасдиқномалар берилишини (муддати узайтирилишини) таъминласин.

12. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов зиммасига юклансин.