LexUZ шарҳи
Мазкур қарор Ўзбекистан Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Ёш авлодни миллий мафкура ва истиқлол ғоялари руҳида тарбиялаш, узлуксиз таълим тизимига миллий ва умуминсоний қадриятларни изчил жорий этиш учун ижтимоий-гуманитар йўналишдаги мавжуд ўқув дастурлари, дарсликлар ва ўқув адабиётларини замонавий талаблар асосида қайта кўриб чиқиш ва янгиларини яратишни мувофиқлаштириш мақсадида Вазирлар Маҳкамаси қарор қилади:
1. Фалсафа, тарих, адабиёт, сиёсатшунослик, диншунослик ва бошқа ижтимоий-гуманитар соҳалардаги мавжуд ўқув дастурлари, дарсликлар ва ўқув қўлланмаларини қайта кўриб чиқиш ва янгиларини яратиш бўйича республика мувофиқлаштириш комиссияси ва муаллифлик ишчи гуруҳлари иловага* биноан тузилсин.
Кадрлар тайёрлаш миллий дастури талаблари асосида мактабгача, умумий ўрта таълим, ўрта махсус, касб-ҳунар таълими ва олий таълим муассасалари учун ижтимоий-гуманитар йўналишдаги мавжуд ўқув дастурлари, дарсликлар ва ўқув адабиётларини миллий мафкура тамойиллари ва замон талабларига мувофиқ қайта кўриб чиқиш;
жамиятнинг турли тоифаларига мўлжалланган илмий-оммабоп рисолалар, тўпламлар яратиш бўйича тавсиялар бериш;
идоравий ва мулкий бўйсунишидан қатъий назар, дарсликлар ва адабиётларни нашрга тавсия этиш ҳуқуқига эга бўлган турли марказлар ва тузилмалар фаолиятини мувофиқлаштириш.
Кейинги таҳрирга қаранг.
2. Республика комиссияси бир ой муддатда мавжуд илмий-педагогик салоҳиятдан самарали фойдаланган ҳолда тегишли йўналишлар бўйича шартномалар асосида дарслик ва ўқув адабиётлари яратишнинг аниқ босқичлари ва муддатларини белгиласин.
Кейинги таҳрирга қаранг.
3. Ўзбекистон Республикаси Халқ таълими вазирлиги, Олий ва ўрта махсус таълим вазирлиги Фан ва техника давлат қўмитаси билан биргаликда Республика комиссияси тавсиясига кўра яратилаётган дарслик ва ўқув адабиётлари учун грантлар ажратсинлар.
4. Ўзбекистон Республикаси Халқ таълими вазирлиги, Олий ва ўрта, махсус таълим вазирлиги, Фан ва техника давлат қўмитаси, Давлат матбуот қўмитаси, тасарруфида таълим муассасалари бўлган вазирликлар ва идоралар яратилган ўқув дастурлари, дарсликлар ва ўқув адабиётларининг ўз вақтида нашр этилиши ва ўқув жараёнига тўла жорий этилишини таъминласинлар.
5. Ўзбекистон Республикаси Халқ таълими вазирлиги тасдиқланган ва амалда қўлланилаётган давлат таълим стандартлари, ўқув режалари ва дастурларига Республика комиссияси ишлаб чиққан талаблар асосида тегишли ўзгартиришлар ҳамда қўшимчалар киритиш ҳақида Вазирлар Маҳкамасига белгиланган тартибда таклифлар берсин.
Олий ва ўрта махсус таълим вазирлиги тажриба-синовдан ўтаётган ва лойиҳа сифатида ишлаб чиқилган давлат таълим стандартлари, ўқув режалари ва дастурларига Республика комиссияси ишлаб чиққан талаблар асосида тегишли ўзгартиришлар киритсин.
6. Ўзбекистон Республикаси Олий ва ўрта махсус таълим вазирлиги, Халқ таълими вазирлиги, Давлат тест маркази тасарруфида таълим муассасалари бўлган вазирликлар ва идоралар билан биргаликда:
бир ой муддатда «Кафедра тўғрисида низом»ни қайта кўриб чиқсинлар ҳамда «Ижтимоий-гуманитар фанлари кафедраси тўғрисида низом»ни ишлаб чиқсинлар ва уларни белгиланган тартибда тасдиқлаб, амалга оширсинлар;
икки ой муддатда олий таълим муассасалари ижтимоий-гуманитар кафедралар мудирларини ва босқичма-босқич профессор-ўқитувчилар таркибини Маънавият ва мустақиллик мафкураси асосида аттестациядан ўтказсинлар.
7. Ўзбекистон Республикаси Молия вазирлиги Республика комиссияси буюртмасига мувофиқ давлат бюджетида дарсликлар ва ўқув қўлланмаларини яратиш ва нашр этиш учун режалаштирилган маблағлар доирасида молиялаштиришни таъминласин.