Ўзбекистон Республикаси Ҳукумати ва Латвия Республикаси Ҳукумати, бундан буён Томонлар деб юритиладилар,

1992 йилнинг 18 августидаги Ўзбекистон Республикаси ва Латвия Республикаси ўртасида савдо-иқтисодий ҳамкорлик тўғрисидаги Битимни ҳамда 1995 йилнинг 6 июнидаги Ўзбекистон Республикаси Ҳукумати ва Латвия Республикаси Ҳукумати ўртасида илмий-техникавий ҳамкорлик тўғрисидаги Битимни амалга ошириш мақсадида,

ҳар икки мамлакат ўртасидаги савдо-иқтисодий ва илмий-техникавий ҳамкорликни мустаҳкамлаш ва ривожлантиришни истаб,

қуйидагилар хусусида аҳдлашиб олдилар:

Ўзбекистон Республикаси ва Латвия Республикаси ўртасида савдо-иқтисодий муносабатлар ва илмий-техникавий алоқалар соҳасидаги ҳамкорликни ривожлантириш вазифаларини тўлақонли ва оператив равишда бажариш мақсадида, Томонлар қуйида «Комиссия» деб юритилувчи савдо-иқтисодий ва илмий-техникавий ҳамкорлик бўйича Ўзбекистон-Латвия ҳукуматлараро комиссиясини тузадилар.

Комиссия ўз фаолиятини мазкур Битим, шунингдек комиссия томонидан ишлаб чиқилган ва унинг дастлабки йиғилишида тасдиқланган Ўзбекистон-Латвия ҳукуматлараро комиссиясининг фаолият регламенти тўғрисидаги Низомга мувофиқ амалга оширади.

Комиссия:

1. Ҳар икки мамлакатнинг манфаатдорлигини эътиборга олган ҳолда, тенглик ва ўзаро манфаатдорлик асосидаги икки томонлама савдо-иқтисодий ҳамкорликни кенгайтириш ва такомиллаштиришга қаратилган таклифлар тайёрлайди ва чора-тадбирлар кўради.

2. Ўзбекистон Республикаси ва Латвия Республикаси ўртасида илмий-техникавий ҳамкорликни кенгайтириш ва чуқурлаштиришга қаратилган таклифларни ишлаб чиқиш, ҳар икки мамлакатнинг илмий-техника соҳасидаги ютуқлари хусусида тегишли маълумотлар алмашувида кўмаклашади.

3. Ҳар икки давлатнинг вазирликлари, идоралари, ташкилотлари, муассасалари ва хўжалик юритувчи субъектлари ўртасида ўзаро манфаатларни ифодаловчи масалалар бўйича турли даражадаги ҳамкорлик дастурларини ишлаб чиқиш ва бажаришда кўмаклашади.

4. Ҳар икки мамлакат ўртасида тузилган савдо-иқтисодий ва илмий-техникавий ҳамкорлик бўйича битимлар, шунингдек ушбу соҳалардаги ўз қарорларининг бажарилиши жараёнини назорат қилади, уларнинг муваффақиятли равишда бажарилишига қаратилган чоралар кўради.

Комиссияни. Томонларнинг Ҳукуматлари тайинлайдиган Ҳамраислар бошқарадилар. Комиссия аъзоларининг шахсий таркиби ҳар бир Томоннинг Ҳамраислари томонидан тузилади, уни Томонларнинг Ҳукуматлари тасдиқлайди.

Комиссия доирасида савдо-иқтисодий ва илмий-техникавий ҳамкорликнинг турли йўналишлари бўйича кичик комиссиялар ва ишчи гуруҳлари тузилиши мумкин.

Ҳамраислар Комиссиядаги ўз қисмларининг шахсий таркиби ва ундаги кейинги ўзгаришлар тўғрисида бир-бирларини ўзаро хабардор қиладилар.

Томонлар қуйидагилар хусусида келишиб олдилар:

Комиссия ўз йиғилишларини келишилган муддатларда, камида ҳар йили бир марта ўтказади;

Комиссия йиғилишлари навбати билан Ўзбекистонда ва Латвияда ўтказилади, йиғилишларда қабул қилувчи Томон раислик қилади;

Комиссия йиғилишлари заруратга кўра, Ҳамраислар ўртасидаги келишувга мувофиқ, шунингдек Томонлардан бирининг мурожаатига биноан ўтказилади;

ўзаро келишувга кўра Комиссия ишида иштирок этиш учун ҳар икки Томоннинг консультантлари ва экспертлари, шунингдек халқаро ташкилотлар ва бошқа мамлакатларнинг консультантлари ва экспертлари таклиф этилиши мумкин;

Комиссия йиғилишларини ўтказиш учун сарфланадиган харажатларни мамлакати ҳудудида йиғилиш ўтказилаётган Томон тўлайди;

Комиссия йиғилишлари қатнашчилари учун сарфланадиган йўл харажатлари ва ўзга чиқимлар, шу жумладан меҳмонхона ҳақи, шунингдек Комиссиянинг доимий ва муваққат органлари аъзолари учун зарурий сарф-харажатларни ўз вакилларини хизмат сафарига йўллаган Томон тўлайди.

Ушбу Битимга Томонларнинг ўзаро келишувига биноан ўзгартириш ва қўшимчалар киритилиши мумкин. Ушбу Битим чекланмаган муддатга тузилмоқда, у имзоланган кунидан бошлаб қонуний кучга киради ва Томонлардан бири ушбу Битимни ҳаракатдан тўхтатиш нияти тўғрисида бошқа Томондан ёзма равишда хабарнома олган кундан бошлаб 6 ой ўтгунга қадар амалда бўлади.

Тошкент шаҳрида 1997 йил 11 апрелда икки нусхада, ҳар бири ўзбек, латиш ва рус тилларида тузилди, бунда барча матнлар бир хил кучга эгадир.

Ушбу Битим қоидаларини талқин қилишда рус тилидаги матндан фойдаланилади.