LexUZ шарҳи
Мазкур Фармон Ўзбекистон Республикаси Президентининг 2018 йил 18 июлдаги ПФ-5483-сонли «Ўзбекистон Республикаси Президентининг айрим ҳужжатларига ўзгартиш ва қўшимчалар киритиш, шунингдек айрим ҳужжатларини ўз кучини йўқотган деб топиш тўғрисида (Ўзбекистон Республикаси Президентининг 2018 йил 2 апрелдаги «Қурилиш соҳасида давлат бошқаруви тизимини тубдан такомиллаштириш чора-тадбирлари тўғрисида»ги ПФ-5392-сон Фармони ва Ўзбекистон Республикаси Президентининг 2018 йил 2 апрелдаги «Ўзбекистон Республикаси Қурилиш вазирлиги фаолиятини ташкил этиш тўғрисида»ги ПҚ-3646-сон қарори)»ги Фармонига асосан ўз кучини йўқотган.
Инвестиция фаолиятини бошқаришнинг ташкилий шаклларини такомиллаштириш, қурилиш комплексининг самарали фаолият кўрсатишини таъминлаш, янги архитектура ва шаҳарсозлик сиёсатини ишлаб чиқиш ҳамда амалга ошириш мақсадида:
1. Ўзбекистон Республикаси Давлат қурилиш ишлари қўмитаси ҳамда Давлат қурилиш ишлари қўмитаси ҳузуридаги Давлат архитектура ва шаҳарсозлик қўмитаси негизида Ўзбекистон Республикаси Давлат архитектура ва қурилиш қўмитаси ташкил этилсин.
2. Ўзбекистон Республикаси Давлат архитектура ва қурилиш қўмитаси зиммасига қуйидаги асосий вазифаларни ҳал этиш юклатилсин:
архитектура ва қурилиш соҳасида ягона илмий-техника сиёсатини ўтказиш, шаҳарсозлик, архитектура, лойиҳа ва қурилиш фаолияти, давлат нормалари ва стандартлари тизимининг норматив-ҳуқуқий асосларини такомиллаштириш;
лойиҳалаш, қурилиш ҳамда бинокорлик материаллари ва конструкцияларини ишлаб чиқаришда давлат шаҳарсозлик интизомига, нормалари ва стандартларига риоя этилишини, бинолар ва иншоотлар қуриш сифатини назорат қилиш;
аҳоли истиқомат қиладиган жойларни режалаштириш ва қуришнинг республика ҳамда минтақа схемаларини ишлаб чиқиш ва амалга ошириш;
қурилишнинг техник даражасини ошириш ва саноатлаштириш, ресурсларни тежаш, бинокорлик маҳсулотига нисбатан нарх сиёсатини ўрганиш ва истиқболни белгилашга оид ишларни ташкил этиш, лойиҳалар қайси идорага қарашли эканлигидан қатъи назар, уларни давлат экспертизасидан ўтказиш;
хорижий мамлакатлар ва халқаро ташкилотлар билан иқтисодий, илмий-техникавий ҳамкорликни амалга ошириш.
Кейинги таҳрирга қаранг.
3. Белгилаб қўйилсинки, Ўзбекистон Республикаси Давлат архитектура ва қурилиш қўмитасининг ўз ваколатлари доирасида қабул қилган қарорлари вазирликлар, идоралар, концернлар, корпорациялар, уюшмалар, корхоналар (бирлашмалар), муассасалар ва ташкилотлар, маҳаллий бошқарув идоралари, мансабдор шахслар ва фуқаролар ижро этишлари учун мажбурийдир.
4. Ўзбекистон Республикасининг Вазирлар Маҳкамаси 10 кун муддат ичида Ўзбекистон Республикаси Давлат архитектура ва қурилиш қўмитасини ташкил этиш ва унинг фаолияти масалаларига доир қарор қабул қилиб, қўмитанинг Низоми ва тузилмасини тасдиқласин.
LexUZ шарҳи
Ўзбекистон Республикаси Вазирлар Маҳкамасининг 1993 йил 30 августдаги 441-сонли «Ўзбекистон Республикаси Давлат архитектура ва қурилиш («Давархитектқурилишназорат») қўмитасини ташкил этиш ва унинг фаолияти масалалари тўғрисида»ги қарорига ва Ўзбекистон Республикаси Вазирлар Маҳкамасининг 1993 йил 1 декабрдаги 580-сонли «Ўзбекистон Республикаси Давлат архитектура ва қурилиш қўмитаси тўғрисидаги низомни ҳамда вилоятлар ва Тошкент шаҳар архитектура ва шаҳарсозлик бош бошқармалари ҳамда шаҳар (туман) архитектура ва шаҳарсозлик бўлимларини намунавий низомларини тасдиқлаш тўғрисида»ги қарорига қаранг.