Ўзбекистон Республикаси Президентининг «Ўзбекистон Республикасининг Устюрт минтақасидаги Урга, Куаниш ва Акчалак конлари гуруҳи маҳсулотлари тақсимотига оид битимни амалга ошириш чора-тадбирлари тўғрисида» 2009 йил 26 мартдаги ПҚ-1081-сон қарорига мувофиқ ҳамда Ўзбекистон Республикаси билан «PETRONAS Carigali Overseas Sdn.Bhd.» компанияси ўртасида 2008 йил 13 майдаги Ўзбекистон Республикасининг Устюрт минтақасидаги Урга, Куаниш ва Акчалак конлари гуруҳи маҳсулотлари тақсимотига оид битимни амалга ошириш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикасининг Устюрт минтақасидаги Урга, Куаниш ва Акчалак конлари гуруҳи маҳсулотлари тақсимотига оид битимни (кейинги ўринларда Битим деб аталади) амалга ошириш доирасида 50 млн АҚШ доллари миқдоридаги давлат харажатлари хорижий инвестор томонидан босқичма-босқич қопланиши назарда тутилганлиги;

хорижий инвестор Битим доирасида қопланадиган давлат харажатларини «Ўзбекнефтгаз» миллий холдинг компаниясига хорижий валютада тўлаши маълумот учун қабул қилинсин.

2. Белгилаб қўйилсинки, Битим доирасида хорижий инвестор томонидан қопланадиган давлат харажатлари қуйидаги тартибда тақсимланади:

50 фоизи — Ўзбекистон Республикаси Давлат бюджетига;

50 фоизи — Ўзбекистон Республикаси Иқтисодиёт вазирлиги ва Молия вазирлиги билан келишган ҳолда, келгусида нефть-газ тармоғини ривожлантиришда фойдаланиш учун «Ўзбекнефтгаз» миллий холдинг компаниясига.

3. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов ва Ўзбекистон Республикаси Бош вазирининг ўринбосари Ғ.И. Ибрагимов зиммасига юклансин.