Муқаддас ислом дини ривожига беқиёс ҳисса қўшган, ҳадис илмининг султони, буюк ватандошимиз Имом Бухорийнинг улкан меросини илмий асосда чуқур ўрганиш, халқимиз ва жаҳон жамоатчилиги ўртасида кенг тарғиб этиш, азалий миллий қадриятларимизни сақлаш ва улуғлаш, ёш авлоднинг руҳий ва маънавий оламини бойитиш, иймон-эътиқодини мустаҳкамлаш, уларнинг қалбида Ватанга муҳаббат ва садоқат туйғусини янада кучайтириш мақсадида:

1. Ўзбекистон мусулмонлари идораси, Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитанинг Самарқанд вилоятидаги Имом Бухорий ҳадис илми маркази ҳамда Имом Бухорий республика илмий-маърифий маркази негизида Имом Бухорий халқаро марказини ташкил этиш тўғрисидаги таклифи маъкуллансин.

2. Имом Бухорий халқаро марказининг асосий вазифалари этиб қуйидагилар белгиланиши эътиборга олинсин:

ислом динининг, Қуръони карим ва ҳадис илмининг асл моҳиятини, ҳадисшунослик мактабининг илмий-маънавий асосларини, Имом Бухорий, Имом Термизий сингари юртимиздан етишиб чиққан буюк ҳадисшунос алломалар меросини ҳар томонлама теран ўрганиш, кенг тарғиб ва ташвиқ қилиш;

юксак инсоний ғоялар ва муқаддас қадриятларимизни ўзида ифода. этган манбаларни тизимли асосда тадқиқ этиш, улардан диний таълим, маънавий-ахлоқий тарбия ишларида фойдаланиш мақсадида зарур дарслик ва ўқув қўлланмалари, илмий-амалий тавсиялар тайёрлаш юзасидан доимий иш олиб бориш;

Имом Бухорий мажмуасида мужассам топган руҳий-маънавий муҳит ва бетакрор мерос асосида диний ходимларнинг билим ва тажрибаси, касб малакасини ошириш бўйича ўқув-услубий ишларни амалга ошириш;

Имом Бухорий мероси ва ҳадис илмини ўрганиш борасида ҳамкорликни йўлга қўйиш;

юқорида кўрсатилган вазифаларни бажариш мақсадида замонавий ахборот-коммуникация технологияларидан, илм-фан ютуқларидан кенг фойдаланиш бўйича тегишли илмий ишланма ва тавсияларни тайёрлаш.

3. Ўзбекистон Республикаси Вазирлар Маҳкамасига бир ой муддатда Имом Бухорий халқаро марказининг ташкилий-бошқарув тузилмаси ва низомини тасдиқлаш, унинг белгиланган тартибда давлат рўйхатидан ўтказилишини таъминлаш топширилсин.

Вазирлар Маҳкамаси «Давархитектқурилиш» қўмитаси, Самарқанд вилояти ҳокимлиги ва Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита ҳамда мутасадди вазирлик ва идораларнинг таклифлари асосида Имом Бухорий халқаро маркази учун янги ўқув ва турар-жой бинолари қуриш, зарур моддий-техник база ва инфратузилмаларни барпо этиш ва ривожлантириш лойиҳаларини тасдиқлаш ва амалга ошириш бўйича тегишли қарорлар қабул қилсин.

4. Имом Бухорий халқаро маркази фаолиятини молиялаштириш Ўзбекистон мусулмонлари идораси, Имом Бухорий ёдгорлик мажмуаси ҳамда хорижий мамлакатлар ва халқаро диний-илмий марказларнинг маблағ ва грантлари ҳисобидан амалга оширилиши инобатга олинсин.

5. Маҳаллий ва хорижий юридик ва жисмоний шахсларнинг қурилиш ва ободонлаштириш ишларига йўналтириладиган маблағлари учун Имом Бухорий халқаро марказининг ҳисоб рақами очиқ экани қайд этилсин.

Марказни ташкил этиш ва унинг моддий-техник базасини мустаҳкамлашга йўналтирилган ҳомийлик маблағлари фойда солиғидан озод қилинсин.

6. Ўзбекистон Миллий ахборот агентлиги, Ўзбекистон миллий телерадиокомпанияси ва бошқа оммавий ахборот воситаларига Имом Бухорий халқаро маркази фаолиятини кенг ёритиб бориш тавсия этилсин.

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Н.Ханов ва Р.Қосимов зиммасига юклансин.