LexUZ шарҳи
Мазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Кадрлар тайёрлаш миллий дастурида белгиланган вазифаларни амалга ошириш, замон талабларига жавоб берадиган юқори малакали мутахассисларни тайёрлашни ташкил этиш, умумтаълим мактаблари, академик лицей ва касб-ҳунар коллежларини олий маълумотли педагог кадрлар билан таъминлаш, абитуриентларга тест синовларидан ўтишда қулайликлар яратиш ҳамда олий таълим муассасаларига иқтидорли ва қобилиятли ёшларни танлаб олиш мақсадида Вазирлар Маҳкамаси қарор қилади:
бакалаврлар тайёрлаш бўйича умумий қабул сони 49500, шу жумладан 19800 давлат грантлари ва 29700 тўлов-контракт асосида белгиланиб, улар олий таълим муассасалари ва таълим йўналишлари бўйича 1-иловага* мувофиқ;
магистрлар тайёрлаш бўйича умумий қабул сони 4200, шу жумладан 1400 давлат грантлари ва 2800 тўлов-контракт асосида белгиланиб, улар олий таълим муассасалари ва мутахассисликлар бўйича 2-иловага* мувофиқ тақсимлансин.
2. 2001/2002 ўқув йилида тиббиёт олий таълим муассасалари ҳузурида ташкил этилган 3 йиллик олий малакали ҳамширалар тайёрлаш бўлимларига умумий қабул квоталари 200, шу жумладан давлат грантлари бўйича 100 ва тўлов-контракт асосида 100 квота белгиланиб, улар республика тиббиёт олий таълим муассасалари бўйича 3-иловага* мувофиқ тақсимлансин.
3. 2001/2002 ўқув йилида Ўзбекистон Республикаси таълим муассасаларига қабул қилиш бўйича Давлат комиссиясининг таркиби 4-иловага* мувофиқ тасдиқлансин.
4. Олий таълим муассасаларига эга бўлган вазирликлар ва идоралар Давлат тест маркази билан биргаликда ўзларига қарашли таълим муассасаларида давлат грантлари ва тўлов-контракт асосидаги бакалавриат ва магистратура бўйича ўринлар квотасини таълим шакллари ва тиллари бўйича тақсимлаш тўғрисидаги таклифларни бир ҳафта муддатда Давлат комиссиясига тасдиқлаш учун киритсинлар.
5. Республика умумтаълим мактаблари, академик лицейлар ва касб-ҳунар коллежларини олий маълумотли ўқитувчилар ва педагог-муҳандислар билан таъминлаш мақсадида 2001/2002 ўқув йилидан бошлаб Тошкент давлат педагогика университети, Бухоро озиқ-овқат ва енгил саноат технологияси институти, Наманган муҳандислик-педагогика институти, шунингдек Урганч, Қорақалпоқ, Андижон, Самарқанд ва Фарғона давлат университетлари таркибида ўрта махсус маълумотга ва тегишли таълим тури бўйича камида уч йил амалий педагогик стажга эга бўлган педагог кадрларни давлат грантлари асосида тест синовлари орқали қабул қилиш ва бакалавриатда ўқитиш учун махсус сиртқи бўлимлар очилсин.
Белгилансинки, ушбу тоифадаги педагог кадрларга олий маълумот бериш учун бакалавр даражасига мўлжалланган уч йиллик ўқув дастурлари ишлаб чиқилади ва таълимнинг блокли тизими жорий этилади.
Ўзбекистон Республикаси Олий ва ўрта махсус таълим вазирлиги 10 кун муддатда қайд этилган олий таълим муассасаларининг махсус сиртқи бўлимларига қабул квоталари юзасидан, уларнинг моддий-техника ва ўқув-методик базаси имкониятларини ҳисобга олган ҳолда, ҳукуматнинг тегишли қарори лойиҳасини тайёрласин ва белгиланган тартибда тасдиқлаш учун Вазирлар Маҳкамасига киритсин.
6. Ўзбекистон Республикаси Олий ва ўрта махсус таълим вазирлиги Халқ таълими вазирлиги ва Давлат тест маркази билан биргаликда:
икки ҳафта муддатда педагогика ва касбий-педагогик тайёргарлик йўналишлари бўйича уч йиллик дастурлар асосида сиртқи бўлимларда бакалаврлар тайёрлаш бўйича қабул қилиш тартиби ва қоидалари тўғрисидаги низомни ишлаб чиқсин ва белгиланган тартибда Давлат комиссиясига тасдиқлаш учун киритсин;
бир ой муддатда Давлат таълим стандартлари талаблари асосида уч йиллик ўқув режалари ва дастурларини ишлаб чиқсин ва тасдиқласин.
7. «Ўзбекистон темир йўллари» давлат-акциядорлик компанияси Қорақалпоғистон Республикаси ва Хоразм вилоятида яшаётган ва Тошкент шаҳри ҳамда вилоят марказларида жойлашган олий таълим муассасаларига ўқишга кириш истагини билдирган абитуриентларни 10 июлдан 10 августгача бўлган муддатда, олий таълим муассасалари қабул комиссиясига тақдим этиладиган тасдиқловчи ҳужжатлар асосида, тегишли манзилга бир маротаба бориб келиши учун бепул темир йўл чипталари билан таъминласин.
Қорақалпоғистон Республикаси Вазирлар Кенгаши ва Хоразм вилояти ҳокимлиги «Ўзбекистон темир йўллари» давлат-акциядорлик компаниясини абитуриентларнинг сони ва йўналишлар ҳақидаги тасдиқловчи маълумотлар билан ўз вақтида таъминласинлар.
8. Давлат комиссиясига, Вазирлар Маҳкамаси билан келишилган ҳолда, олий таълим муассасалари бакалавриати ва магистратурасига қабул қилиш тартиби ва қоидалари тўғрисидаги низомлар иловаларига ҳамда тест синовлари натижаларидан келиб чиқиб, тўлов-контракт асосида белгиланган умумий қабул квоталари доирасида, қабул кўрсаткичларига зарур бўлган ўзгартиришлар киритишга рухсат берилсин.
Олдинги таҳрирга қаранг.
9. Олий таълим муассасаларининг тўлов-контракт асосида кадрлар тайёрлашдан тушган маблағлари, улардан моддий-техника базани мустаҳкамлаш, ўқув жараёнини ўқитишнинг янги воситалари билан таъминлаш, олий таълим муассасалари ходимларини моддий рағбатлантириш учун мақсадли фойдаланилган тақдирда, истисно тариқасида, солиқлардан ва Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси, Республика йўл жамғармаси, бюджетдан ташқари Мактаб таълими жамғармасига мажбурий ажратмалардан 2015 йил 1 январгача озод қилинсин.
(9-банд Ўзбекистон Республикаси Президентининг 2009 йил 22 декабрдаги ПҚ-1245-сонли қарори таҳририда — ЎР ҚҲТ, 2009 й., 52-сон, 560-модда)
Кейинги таҳрирга қаранг.
10. Ўзбекистон Республикаси Молия вазирлиги 2001/2002 ўқув йилида давлат грантлари асосида бакалавриат ва магистратурага ҳамда олий малакали ҳамширалар тайёрлаш учун белгиланган қабулни ҳисобга олган ҳолда бюджетдан зарур маблағлар ажратилишини таъминласин.
11. Ўзбекистон Республикаси Вазирлар Маҳкамасининг «2000/2001 ўқув йилида Ўзбекистон Республикасининг олий таълим муассасаларига қабул тўғрисида» 2000 йил 8 июндаги 222-сон қарори ўз кучини йўқотган деб ҳисоблансин.
12. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ҳ.С.Кароматов зиммасига юклансин.