Aholi o‘rtasida sport-sog‘lomlashtirish ishlarini yanada rivojlantirish, ichki ishlar organlari va O‘zbekiston Respublikasi Ichki ishlar vazirligi bo‘linmalarining shaxsiy tarkibi jismoniy tayyorgarligini takomillashtirish, shuningdek kompleksning sport va moddiy-texnika bazasini xalqaro talablarga mos yuqori darajada saqlash maqsadida Vazirlar Mahkamasi qaror qiladi:
1. Qurilishi tugallangan «Jar» sport-sog‘lomlashtirish kompleksi obyektlari Toshkent shahar hokimligining Kapital qurilish bosh boshqarmasi balansidan O‘zbekiston Respublikasi Ichki ishlar vazirligi balansiga tekin byerilsin.
2. Toshkent shahar hokimligi (To‘laganov), O‘zbekiston Respublikasi Ichki ishlar vazirligi (Almatov) manfaatdor vazirliklar va idoralar vakillari ishtirokida «Jar» sport-sog‘lomlashtirish kompleksini qabul qilib olish va topshirish bo‘yicha qo‘shma komissiya tashkil etsinlar.
3. «Jar» sport-sog‘lomlashtirish kompleksini saqlash va unga xizmat ko‘rsatish uchun xodimlarning umumiy soni 150 nafardan iborat etib tasdiqlansin, shu jumladan 75 nafari — ichki ishlar organlari va ichki qo‘shinlar bo‘yicha xodimlarning umumiy soni doirasida; 75 nafari — respublika budjeti mablag‘lari hisobiga saqlangan holda qo‘shimcha ravishda ajratiladi (ilova qilinadi).
Keyingi tahrirga qarang.
4. O‘zbekiston Respublikasi Ichki ishlar vazirligi Davlat sport qo‘mitasi bilan birgalikda Moliya vazirligi bilan kelishgan holda «Jar» sport-sog‘lomlashtirish kompleksi to‘g‘risidagi nizomni bir oy muddatda ishlab chiqsin va tasdiqlasin.
5. O‘zbekiston Respublikasi Ichki ishlar vazirligi «Jar» sport-sog‘lomlashtirish kompleksiga sarflanadigan xarajatlarni 1998-yil uchun tasdiqlangan mablag‘lar doirasida amalga oshirsin.