Birlashgan Millatlar Tashkilotining narkotik moddalar ustidan nazorat qilish bo‘yicha Xalqaro dasturining asosiy qoidalariga muvofiq hamda narkotik moddalarga qarshi kurash olib borish ishlarini muvofiqlashtirish va O‘zbekiston o‘z zimmasiga olgan xalqaro majburiyatlarni bajarish maqsadida Vazirlar Mahkamasi qaror qiladi:
1. Narkotik moddalar ustidan nazorat qilish bo‘yicha O‘zbekiston Respublikasi Davlat komissiyasi tuzilsin.
2. Narkotik moddalar ustidan nazorat qilish bo‘yicha O‘zbekiston Respublikasi Davlat komissiyasi to‘g‘risidagi Nizom va komissiyaning tarkibi 1*, 2-ilovalarga muvofiq tasdiqlansin.
3. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari narkotik moddalar ustida nazorat qilish bo‘yicha mintaqa komissiyalarini tashkil etsinlar.
4. O‘zbekiston Respublikasi vazirliklari va idoralari Narkotik moddalar ustidan nazorat qilish bo‘yicha O‘zbekiston Respublikasi Davlat komissiyasiga yuklatilgan vazifalarni hal etishda unga yordam ko‘rsatsinlar.
1. Narkotik moddalar ustidan nazorat qilish bo‘yicha O‘zbekiston Respublikasi Davlat komissiyasi (matnda keyingi o‘rinlarda Komissiya deb yuritiladi) narkotik moddalarning noqonuniy muomalada bo‘lishiga qarshi kurashni muvofiqlashtirish, ham milliy, ham mintaqalar darajasida narkotik moddalar tarqalishi oldini olishning samarali chora-tadbirlarini ishlab chiqish va amalga oshirish, narkotik moddalar ustidan nazorat qilish yuzasidan xalqaro majburiyatlarni bajarish masalalari bo‘yicha idoralararo organ hisoblanadi.
2. Komissiya o‘z faoliyatida O‘zbekiston Respublikasi qonunlariga, O‘zbekiston Respublikasi Prezidenti farmonlariga, Vazirlar Mahkamasining qarorlari va farmoyishlariga, narkotik moddalar ustidan nazorat qilish bo‘yicha xalqaro — huquqiy normalarga, mazkur Nizomga amal qiladi hamda O‘zbekiston Respublikasi Prezidenti va Hukumatiga hisob beradi.
Barcha davlat organlari, mulkchilik shaklidan qat’i nazar, korxonalar, muassasalar va tashkilotlar, fuqarolarning jamoat birlashmalari Komissiyaga yordam berishlari shart.
narkotik moddalar ustidan nazorat qilish bo‘yicha umumdavlat dasturini ishlab chiqish va uni amalga oshirishga ko‘maklashish;
barcha davlat organlari, jamoat tashkilotlari, mehnat jamoalari va fuqarolarning sa’y-harakatlarini narkotik vositalarning noqonuniy muomalada bo‘lishiga qarshi kurash olib borishning kechiktirib bo‘lmaydigan vazifalarini hal etishga birlashtirish va jamlash va mana shu maqsadlarda jamiyat va davlatning siyosiy, iqtisodiy, ijtimoiy va madaniy-tarbiyaviy imkoniyatlaridan keng foydalanish;
doimiy ravishda tegishli hududda, zaruriyat bo‘lganda esa — alohida joylarda narkotik vositalarning noqonuniy muomalada bo‘lishiga qarshi kurashning ahvolini kompleks baholash; uning yomonlashuviga munosabat bildirish bo‘yicha aniq chora-tadbirlar ishlab chiqish;
narkotik vositalar ustidan nazorat qilish bo‘yicha respublika operativ axborot markazini tashkil etishga va uning faoliyatini takomillashtirishga, O‘zbekiston Respublikasining manfaatdor vazirliklari va idoralari bilan, shuningdek, MDH qatnashchisi bo‘lgan mamlakatlar va boshqa xorijiy davlatlarning huquqni muhofaza qiluvchi organlari bilan axborotni erkin va to‘siqsiz ayirboshlashni ta’minlash uchun markaz bilan narkotik moddalar ustidan nazoratni amalga oshiruvchi tashkilotlar o‘rtasida yagona tarmoq tashkil etishga ko‘maklashish;
narkotik moddalar ustidan nazorat qilish bilan bog‘liq bo‘lgan barcha tashkilotlarga xizmatlar ko‘rsatish uchun respublika sud ekspertizasi xizmati (kriminalistik laboratoriyani tashkil etishga va uning faoliyatini takomillashtirishga ko‘maklashish;
narkotik moddalar ustidan nazorat qilish masalalari bo‘yicha ilmiy tadqiqotlarning yo‘nalishini belgilash va bu tadqiqotlarni muvofiqlashtirish;
xizmat-qidiruv itlari tayyorlash bo‘yicha respublika markazini tashkil etishga va uning faoliyatini takomillashtirishga ko‘maklashish;
narkotik moddalar ustidan nazorat qilish bo‘yicha dasturlarni mablag‘ bilan ta’minlash uchun mablag‘larni jalb etish ishida davlat, jamoat, diniy va xayriya tashkilotlari, muassasalar va korxonalarning o‘zaro hamkorligini ta’minlash;
huquqni muhofaza qilish organlarini malakali xodimlar bilan mustahkamlash tadbirlarini ishlab chiqish va amalga oshirish. Bu organlarga moddiy-texnikaviy va moliyaviy yordam ko‘rsatish; ularning ish amaliyotiga narkotik moddalarni izlash, topish va identifikatsiyalash bo‘yicha ilmiy yutuqlar va ilg‘or tajribani joriy etish;
narkotik moddalarning respublika orqali MDH mamlakatlariga va G‘arb davlatlariga noqonuniy olib o‘tiladigan yo‘llarni to‘sib qo‘yish, mahalliy xomashyodan tayyorlanadigan narkotik moddalar yetkazib berilishiga barham berish bo‘yicha birgalikdagi chora-tadbirlarni amalga oshirish uchun O‘zbekiston Respublikasining narkotik moddalar ustidan nazorat qilish bilan bog‘lik tashkilotlarining xorijiy mamlakatlarning tegishli tashkilotlari bilan hamkorligini ta’minlash;
BMTning 1961, 1971 va 1988-yillardagi Konvensiyalariga va boshqa xalqaro bitimlarga muvofiq xalqaro va milliy nazorat ostiga olinishi kerak bo‘lgan narkotik vositalar, boshqa moddalar ro‘yxatini tasdiqlash, ushbu ro‘yxatlar bo‘yicha rasmiy tushuntirishlar berish;
noqonuniy muomalaga chiqarish ma’muriy yoki jinoiy javobgarlikka olib keladigan xalqaro va milliy nazoratda bo‘lgan narkotik vositalar va boshqa moddalar hajmlarini aniqlash;
tarkibida narkotik vositalar mavjud bo‘lgan dori-darmonlar va preparatlarni ishlab chiqarish, saqlash, transportda tashish va qonuniy foydalanishni tartibga soluvchi huquqiy va nazorat-texnik qoidalarni ishlab chiqish, ularni qo‘llashga vakolat berilgan davlat organlari tomonidan ularning qo‘llanishi ustidan nazorat qilishni tashkil etish;
narkotik vositalarning noqonuniy muomalada bo‘lishiga qarshi kurash olib borish chora-tadbirlarini amalga oshirishga yo‘naltiriladigan moliyaviy mablag‘lar va moddiy resurslarni taqsimlash;
narkotik moddalar muomalasining turli jihatlariga tegishli bo‘lgan O‘zbekiston Respublikasi qonunlari va boshqa normativ hujjatlar loyihalari bo‘yicha xulosalarni O‘zbekiston Respublikasi Vazirlar Mahkamasiga taqdim etish;
O‘zbekiston Respublikasi hududida va uning tashqarisida narkotik moddalar ustidan nazorat qilish masalalari bo‘yicha hamkorlik dasturlarini ishlab chiqish va amalga oshirishda qatnashish;
narkotik vositalarning noqonuniy muomalada bo‘lishiga qarshi kurash olib borish masalalari bo‘yicha MDHga kiruvchi davlatlar bilan bitimlar loyihalariga, shuningdek, boshqa xorijiy mamlakatlar bilan bitimlar loyihalariga takliflar tayyorlanishini ta’minlash;
narkotik moddalarning noqonuniy muomalada bo‘lishiga va ularni suiiste’mol qilishga qarshi kurash olib borish sohasida xalqaro bitimlarda nazarda tutilgan O‘zbekistonning majburiyatlari vazirliklar va idoralar tomonidan bajarilishi ustidan nazoratni ta’minlash;
narkotik moddalar ustidan nazorat qilish masalalari bilan shug‘ullanuvchi xalqaro tashkilotlar faoliyatida belgilangan tartibda qatnashish;
narkotik moddalar ustidan nazorat qilish bo‘yicha ish tajribasini o‘rganish uchun tegishli nomzodlarni tanlash va ularni xorijiy mamlakatlarga yuborish;
narkotik vositalarning noqonuniy muomalada bo‘lishiga qarshi kurash olib borish bo‘yicha tajriba almashish uchun milliy va xalqaro seminarlar, konferensiyalar va simpoziumlar tashkil etish.
4. Komissiya o‘z oldida turgan vazifalar va funksiyalarni bajarish uchun quyidagi huquqlarga ega bo‘ladi:
davlat boshqaruvi barcha organlari, mulkchilik shaklidan qat’i nazar, korxonalar, tashkilotlar va muassasalar hamda fuqarolarning jamoat birlashmalari tomonidan narkotik vositalarning noqonuniy muomalada bo‘lishiga qarshi kurash olib borish bo‘yicha amaldagi qonun hujjatlari, o‘z qarorlari bajarilishini tekshirish;
narkotik moddalar ustidan nazoratni tashkil etish masalalari bo‘yicha O‘zbekiston Respublikasi Hukumatiga takliflar kiritish;
narkotik moddalar ustidan nazorat qilish ishlari to‘g‘risida Qoraqalpog‘iston Respublikasi, viloyatlar va Toshkent shahar hokimliklarining tegishli komissiyalari hisobotlarini eshitish;
ichki ishlar vazirligi, adliya, bojxona boshqarmasi organlari va bo‘linmalarining hamda huquqni muhofaza qiluvchi boshqa organlarning axborotini eshitish;
mulkchilik shaklidan qat’i nazar, korxonalar, muassasalar va tashkilotlar rahbarlarining, narkotik vositalarning noqonuniy muomalada bo‘lishiga qarshi kurash olib borish bo‘yicha ko‘rilgan chora-tadbirlar bilan bog‘liq axborotlarini ko‘rib chiqish; bu ishga baho berish uchun zarur bo‘lgan hujjatlarni talab qilib olish;
narkotik vositalarning noqonuniy muomalada bo‘lishiga qarshi kurash olib borish bo‘yicha qonunchilikning buzilishiga olib keluvchi sabablar va sharoitlarni bartaraf etish to‘g‘risida tavsiyalar berish, tegishli davlat organlari, jamoat tashkilotlari va mehnat jamoalari oldiga narkotik moddalar ustidan nazorat qilish bo‘yicha o‘z majburiyatlarini bajarmayotgan mansabdor shaxslarni javobgarlikka tortish masalalarini qo‘yish;
o‘z faoliyatida xalq xo‘jaligi turli tarmoqlarining, ilmiy muassasalar va o‘quv yurtlarining mutaxassislari yordamidan foydalanish;
narkotik moddalar ustidan nazorat qilish bilan bog‘liq bo‘lgan qonunchilik va institutsional asoslarni takomillashtirish bo‘yicha, ularning narkotik vositalar bo‘yicha BMT Konvensiyasi talablariga muvofiqligini ta’minlash uchun, O‘zbekiston Respublikasi Hukumatiga takliflar kiritish.
5. Komissiya O‘zbekiston Respublikasi Vazirlar Mahkamasi tomonidan tashkil etiladi, qayta tashkil etiladi va tugatiladi.
6. Komissiyaga O‘zbekiston Respublikasi Bosh vazirining birinchi o‘rinbosari — Komissiya raisi boshchilik qiladi.
Oldingi tahrirga qarang.
7. Komissiya tarkibiga ichki ishlar organlari, Davlat xavfsizlik xizmati, bojxona organlari, sog‘liqni saqlash, xalq ta’limi va boshqa davlat organlari rahbarlari kiradilar.
(7-band O‘zbekiston Respublikasi Vazirlar Mahkamasining 2018-yil 29-maydagi 396-sonli qarori tahririda — Qonun hujjatlari ma’lumotlari milliy bazasi, 01.06.2018-y., 09/18/396/1287-son)
8. Komissiya ishi joriy va istiqbol rejalari asosida amalga oshiriladi. Komissiya majlislari, zaruriyatga ko‘ra, odatda, yilning har choragida bir marta o‘tkaziladi. Komissiya majlislari ularda a’zolarning kamida yarmi qatnashgan taqdirda qaror qabul qilishga vakolatli hisoblanadi.
9. Komissiyaning qarorlari ochiq ovoz berish yo‘li bilan qabul qilinadi. Qarorlar, agar ular uchun ko‘pchilik ovoz bergan taqdirda qabul qilingan hisoblanadi.
10. Komissiya hujjatlari qarorlar sifatida rasmiylashtiriladi va zarurat bo‘lganda ommaviy axborot vositalari orqali ommaga yetkaziladi. Komissiyaning rasmiylashtirilgan qarorlari barcha davlat boshqaruvi organlari, korxonalar, muassasalar va jamoat tashkilotlari tomonidan bajarilishi majburiydir.
Oldingi tahrirga qarang.
11. Komissiya majlislari o‘rtasidagi davrda joriy ishlar bevosita Komissiya raisiga bo‘ysunuvchi Narkotik moddalarni nazorat qilish milliy axborot-tahlil markazi tomonidan amalga oshiriladi.
(11-band O‘zbekiston Respublikasi Vazirlar Mahkamasining 1996-yil 7-noyabrdagi 382-sonli qarori tahririda)
Oldingi tahrirga qarang.
(12-band O‘zbekiston Respublikasi Vazirlar Mahkamasining 1996-yil 7-noyabrdagi 382-sonli qaroriga muvofiq o‘z kuchini yo‘qotgan)
13. Joylarda narkotik vositalarning noqonuniy muomalada bo‘lishiga qarshi kurash olib borishni muvofiqlashtirish uchun Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzurida narkotik moddalar ustidan nazorat qilish bo‘yicha mintaqa komissiyalari tashkil etiladi.
14. Narkotik moddalar ustidan nazorat qilish bo‘yicha mintaqa komissiyalariga Qoraqalpog‘iston Respublikasi Vazirlar Kengashining Raisi, viloyatlar va Toshkent shahar hokimlari boshchilik qiladilar.
15. Narkotik moddalar ustidan nazorat qilish bo‘yicha mintaqa komissiyalari o‘z faoliyatlarida O‘zbekiston Respublikasi qonunlariga, O‘zbekiston Respublikasi Prezidentining farmonlariga, Vazirlar Mahkamasining qarorlari va farmoyishlariga, mazkur Nizomga va Narkotik moddalar ustidan nazorat qilish bo‘yicha O‘zbekiston Respublikasi Davlat komissiyasining qarorlariga amal qiladilar.