O‘zbekiston Respublikasi Prezidentining “O‘zbekiston Republikasi Prezidenti Administratsiyasining rahbar xodimlari, mutaxassislari va xizmatchilarini moddiy rag‘batlantirish va mehnatiga haq to‘lash tizimini takomillashtirish chora-tadbirlari to‘g‘risida” 2018-yil 16-oktabrdagi PQ-3976-son qarori ijrosini ta’minlash maqsadida Vazirlar Mahkamasi qaror qiladi:
1. O‘zbekiston Respublikasi Prezidenti Administratsiyasi huzuridagi Tibbiyot bosh boshqarmasi (keyingi o‘rinlarda Tibbiyot bosh boshqarmasi deb ataladi), O‘zbekiston Respublikasi Bandlik va mehnat munosabatlari vazirligi hamda Moliya vazirligining 2018-yil 1-dekabrdan boshlab:
mehnatga haq to‘lash bo‘yicha Tibbiyot bosh boshqarmasiga idoraviy mansub tashkilotlarning tibbiyot xodimlariga tenglashtirilgan (Sanitariya-epidemiologiya nazorati boshqarmasidan tashqari) tibbiyot va farmatsevtika xodimlariga, shu jumladan, rahbarlar, rahbarlarning o‘rinbosarlariga va oliy ma’lumotli mutaxassislarga — tarif stavkasining 15 foizidan 30 foizigacha oshirish;
mehnatga haq to‘lash bo‘yicha Sanitariya-epidimeologiya nazorati boshqarmasining tibbiyot xodimlariga tenglashtirilgan tibbiyot va farmatsevtika xodimlariga, rahbarlar, rahbarlarning o‘rinbosarlariga, oliy ma’lumotli mutaxassislarga — tarif stavkasining 15 foizidan 50 foizigacha oshirish;
ushbu band “a” kichik bandining ikkinchi va uchinchi xatboshilarida ko‘rsatilmagan boshqa xodimlarga — tarif stavkasining 10 foizidan 30 foizigacha oshirish;
b) Ixtisoslashgan avtotransport bilan ta’minlash boshqarmasi xodimlarini moddiy rag‘batlantirish Maxsus jamg‘armasi miqdorini mehnatga haq to‘lash fondining 15 foizidan 25 foizigacha oshirish to‘g‘risidagi takliflari qabul qilinsin.
2. O‘zbekiston Respublikasi Moliya vazirligi ushbu qaror ijrosi bilan bog‘liq qo‘shimcha xarajatlarni qoplash uchun 2018-yilda va kelgusi yillarda zarur budjet mablag‘larini ajratsin.
3. O‘zbekiston Respublikasi Vazirlar Mahkamasining 2005-yil 21-dekabrdagi 276-son qarori (O‘zbekiston Respublikasi QT, 2005-y., 12-son, 64-modda) bilan tasdiqlangan O‘zbekiston Respublikasi davlat muassasalari tibbiyot va farmatsevtika xodimlari mehnatiga haq to‘lash tartibi va shartlari to‘g‘risidagi nizomga ilovaga muvofiq o‘zgartirishlar kiritilsin.
4. O‘zbekiston Respublikasi Moliya vazirligi manfaatdor vazirliklar va idoralar bilan birgalikda bir oy muddatda ular qabul qilgan normativ-huquqiy hujjatlarni ushbu qarorga muvofiqlashtirsin.
5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.A. Abduhakimov va O‘zbekiston Respublikasi Prezidenti Administratsiyasi huzuridagi Tibbiyot bosh boshqarmasi boshlig‘i A.A. Xudayarov zimmasiga yuklansin.
“243. O‘zbekiston Respublikasi Prezidenti Administratsiyasi huzuridagi Tibbiyot bosh boshqarmasiga (keyingi o‘rinlarda Tibbiyot bosh boshqarmasi deb ataladi) idoraviy mansub tashkilotlar shtatidagi xodimlarga har oylik maxsus ustamalar:
mehnatga haq to‘lash bo‘yicha Tibbiyot bosh boshqarmasiga idoraviy mansub tashkilotlarning (Sanitariya-epidemiologiya nazorati boshqarmasidan tashqari) tibbiyot va farmatsevtika xodimlariga, shu jumladan, rahbarlar va rahbarlarning o‘rinbosarlariga va oliy ma’lumotli mutaxassislarga — tarif stavkasining 30 foizi;
mehnatga haq to‘lash bo‘yicha Sanitariya-epidemiologiya nazorati boshqarmasining tibbiyot xodimlariga tenglashtirilgan tibbiyot va farmatsevtika xodimlariga, shu jumladan, rahbarlar va rahbarlarning o‘rinbosarlariga va oliy ma’lumotli mutaxassislarga — tarif stavkasining 50 foizi;
ushbu bandning ikkinchi va uchinchi xatboshilarida ko‘rsatilmagan boshqa xodimlarga — tarif stavkasining 30 foizi miqdorida belgilanadi.”