LexUZ sharhi
Mazkur qaror O‘zbekiston Respublikasi Prezidentining 2021-yil 18-oktabrdagi PF-6325-sonli “O‘zbekiston Respublikasi Prezidentining va O‘zbekiston Respublikasi Hukumatining ayrim hujjatlarini o‘z kuchini yo‘qotgan deb hisoblash to‘g‘risida”gi Farmoniga asosan o‘z kuchini yo‘qotgan.
Naqd pulning muomalada bo‘lishini yanada mustahkamlash, shuningdek respublika mintaqalarida pulning muomalada bo‘lishi ahvoli uchun rahbarlar va mansabdor shaxslarning mas’uliyatini oshirish maqsadida Vazirlar Mahkamasi qaror qiladi:
1. Qoraqalpog‘iston Respublikasi, Jizzax, Qashqadaryo, Navoiy, Surxondaryo va Sirdaryo viloyatlarida naqd pul emissiyasi darajasi bo‘yicha vujudga kelgan ahvol normal emas deb hisoblansin.
Bu, eng avvalo, ko‘rsatib o‘tilgan mintaqalar, iste’mol tovarlari ishlab chiqarish, savdo va servis xizmatini tashkil etish bilan shug‘ullanuvchi respublika idoralari va organlari rahbarlarining aholining zarur tovarlar va xizmatlarga bo‘lgan ehtiyojini ta’minlashga nihoyatda mas’uliyatsizlik bilan munosabatda bo‘lishi oqibati ekanligi qayd etilsin.
Qoraqalpog‘iston Respublikasi Vazirlar Kengashi Raisi, viloyatlar hokimlari Vazirlar Mahkamasining Iste’mol tovarlari ishlab chiqarish va savdo kompleksi, O‘zbekiston Respublikasi Markaziy banki va boshqa manfaatdor tuzilmalar bilan birgalikda bir oy muddatda ishlarning ahvolini to‘g‘rilash yuzasidan aniq asoslangan takliflar tayyorlasinlar va Vazirlar Mahkamasiga kiritsinlar.
O‘zbekiston Respublikasi Hukumati ushbu takliflarni belgilangan tartibda ko‘rib chiqsin va tasdiqlasin, bunda aholining iste’mol tovarlari va xizmatlarga bo‘lgan ehtiyojini qondirish muammosini tubdan hal etish nazarda tutilsin.
2. Qoraqalpog‘iston Respublikasi, viloyatlar, Toshkent shahri, shaharlar va tumanlar bo‘yicha 2001-yilgi va I chorakdagi naqd pul mablag‘lari emissiyasi darajasi va kassa rejasi parametrlariga 1 va 2- ilovalarga* muvofiq rozilik berilsin.
Qoraqalpog‘iston Respublikasi Vazirlar Kengashi Raisi, viloyatlar, shaharlar va tumanlar hokimlari naqd pul mablag‘lari emissiyasi darajasi va kassa rejalarining belgilangan parametrlari bajarilishi ustidan qattiq va ta’sirchan nazoratni ta’minlasinlar.
3. Belgilab qo‘yilsinki, Qoraqalpog‘iston Respublikasi Vazirlar Kengashi Raisi, viloyatlar, shaharlar va tumanlar hokimlari iste’mol bozorini zarur tovarlar bilan to‘ldirish, naqd pul tushumi tushishini ta’minlash hamda aholiga ish haqi, pensiyalar, nafaqalar va boshqa to‘lovlarning o‘z vaqtida berilishi uchun shaxsan javob beradilar.
4. “O‘zbeksavdo”, “O‘zbekbirlashuv” aksiyadorlik kompaniyalari, “O‘zavtotrans” korporatsiyasi, “O‘zbekiston havo yo‘llari” milliy aviakompaniyasi, “O‘zbekiston temir yo‘llari” davlat-aksiyadorlik kompaniyasi, “Toshshaharyo‘lovchitrans” uyushmasi, “O‘zkommunxizmat” agentligi, O‘zbekiston pochta va telekommunikatsiyalar agentligi, savdo shoxobchalariga ega bo‘lgan va aholiga pulli xizmatlar ko‘rsatuvchi boshqa vazirliklar va idoralar, Qoraqalpog‘iston Respublikasi Vazirlar Kengashi, viloyatlar, shaharlar va tumanlar hokimliklari mahalliy bozorlarni zarur turdagi xalq iste’mol tovarlari bilan ta’minlash va pulli xizmatlar sohasini kengaytirish bo‘yicha aniq chora-tadbirlar ko‘rsinlar.
5. O‘zbekiston Respublikasi Davlat soliq qo‘mitasi va Prokuraturasi xo‘jalik yurituvchi subyektlar tomonidan tovarlar sotishdan, ishlar va xizmatlarni amalga oshirishdan naqd pul tushumlarining banklar kassalariga o‘z vaqtida va to‘liq topshirilishini ta’minlash ustidan qattiq nazorat o‘rnatsinlar.
6. Belgilab qo‘yilsinki, O‘zbekiston Respublikasi Markaziy banki litsenziyalariga ega bo‘lgan korxonalarga import bo‘yicha keltiriladigan istyemol tovarlarini naqd pul tushumlarini banklar kassalariga belgilangan tartibda majburiy topshirish sharti bilan faqat chakana savdo tashkilotlariga sotishga ruxsat etiladi.
Keyingi tahrirga qarang.
7. Pul-kredit siyosati bo‘yicha Respublika komissiyasi ushbu qarorning bajarilishini har oyda ko‘rib chiqsin va Vazirlar Mahkamasiga mansabdor shaxslarni naqd pul mablag‘lari emissiyasi darajasining belgilangan parametrlari va kassa rejasi bajarilganligi uchun rag‘batlantirish va ularning ushbu ko‘rsatkichlarning bajarilishi uchun javobgarligini oshirish bo‘yicha takliflar kiritsin.
8. O‘zbekiston Respublikasi Vazirlar Mahkamasining “O‘zbekiston Respublikasi milliy valyutasining ichki erkin almashuvini ta’minlashga oid chora-tadbirlar to‘g‘risida” 1994-yil 21-iyuldagi 379-son qarorining 11-bandi o‘z kuchini yo‘qotgan deb hisoblansin.
9. Mazkur qarorning bajarilishini nazorat qilish O‘zbekiston Respublikasining Bosh vaziri O‘.T. Sultonov va O‘zbekiston Respublikasi Markaziy banki raisi F.M. Mullajonov zimmasiga yuklansin.