Mamlakatda aholi punktlari, ayniqsa qishloqlarning qiyofasini yaxshilash, ko‘p qavatli arzon uy-joylar, muhandislik-kommunikatsiya infratuzilmasi va respublika hududlarini rivojlantirish dasturlariga kiritilgan boshqa obyektlarni qurish bo‘yicha izchil ravishda kompleks chora-tadbirlar amalga oshirilmoqda.
Shu bilan birga, mamlakatda sement ishlab chiqarish hajmi va unga narxlarning shakllanish mexanizmlari joriy yilda amalga oshirilishi rejalashtirilgan keng ko‘lamli infratuzilma loyihalari doirasida obyektlar qurilishini sifatli va o‘z vaqtida yakunlashga salbiy ta’sir ko‘rsatmoqda.
Sement ishlab chiqarish sanoatini jadal rivojlantirishni ta’minlash, ishlab chiqarish hajmini oshirish va iqtisodiyot tarmoqlarining sementga bo‘lgan ehtiyojini qondirish, shuningdek, ijtimoiy va yo‘l-transport infratuzilma obyektlari qurilishini o‘z vaqtida yakunlash maqsadida:
1. O‘zbekiston Respublikasi Iqtisodiyot vazirligi, Moliya vazirligi, Davlat soliq qo‘mitasi va “O‘zqurilishmateriallari” AJning 2018-yilda uy-joy sharoitlarini yaxshilashga muhtoj bo‘lgan fuqarolar uchun arzon uy-joylarni, ijtimoiy soha, transport infratuzilmasi va suv xo‘jaligi obyektlarini markazlashgan manbalar hisobidan qurishni amalga oshiruvchi pudrat tashkilotlariga sement ishlab chiqaruvchi monopolist korxonalar tomonidan ikki million tonna hajmdagi sementni bir tonnasi uchun 367 ming so‘m (QQS bilan) narxda ikki tomonlama shartnomalar bo‘yicha 100 foiz oldindan to‘lov asosida sotish haqidagi takliflari ma’qullansin.
2. O‘zbekiston Respublikasi Prezidentining 2017-yil 29-dekabrdagi PQ-3454-son qarori bilan tasdiqlangan Ayrim turdagi mahsulotlar bo‘yicha qo‘shimcha foyda solig‘i stavkasida:
“Sement**” pozitsiyasida “1 tonna uchun 145 000 so‘mdan yuqori” so‘zlari “1 tonna uchun 280 000*** so‘mdan yuqori” so‘zlari bilan almashtirilsin;
“Klinker**” pozitsiyasida “1 tonna uchun 120 000 so‘mdan yuqori” so‘zlari “1 tonna uchun 260 000*** so‘mdan yuqori” so‘zlari bilan almashtirilsin;
“***) O‘zbekiston Respublikasi Vazirlar Mahkamasi birja savdolaridagi narxlar konyunkturasidan kelib chiqqan holda, soliq solinadigan bazaning miqdorini qayta ko‘rib chiqish huquqiga ega”.
3. Mazkur qarorning 2-bandi hujjat rasmiy e’lon qilingan kundan boshlab o‘n kun o‘tgach kuchga kiradi.
4. Mazkur qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari — “O‘zbekiston temir yo‘llari” AJ boshqaruvi raisi A.J. Ramatov, O‘zbekiston Respublikasi Bosh vazirining o‘rinbosari — moliya vaziri J.A. Qo‘chqorov va “O‘zqurilishmateriallari” AJ boshqaruvi raisi B.K. Zaripov zimmasiga yuklansin.