O‘zbekiston Respublikasi Prezidentining “Ichki turizmni jadal rivojlantirishni ta’minlash chora-tadbirlari to‘g‘risida” 2018-yil 7-fevraldagi PQ-3514-son qarori ijrosini ta’minlash, shuningdek, Surxondaryo viloyatining turizm salohiyatidan foydalanish samaradorligini yanada oshirish, hududning noyob tarixiy-madaniy va me’moriy obidalari bilan turistlarni keng tanishtirish, zamonaviy turizm infratuzilmasini jadal rivojlantirish va ko‘rsatilayotgan turizm xizmatlari sifatini takomillashtirish, ichki turizmni faollashtirish, yangi ish o‘rinlari yaratish hamda aholi daromadlari o‘sishini rag‘batlantirish maqsadida Vazirlar Mahkamasi qaror qiladi:
1. Surxondaryo viloyati hokimligi O‘zbekiston Respublikasi Turizmni rivojlantirish davlat qo‘mitasi hamda manfaatdor vazirlik va idoralar bilan birgalikda bir oy muddatda:
2018-2019-yillarda Surxondaryo viloyatining turizm infratuzilmasi va namoyishi obyektlarini tashkil etish, mavjudlarini ta’mirlash, rekonstruksiya qilish bo‘yicha amalga oshiriladigan loyihalarning ro‘yxatini;
2018-yilda Surxondaryo viloyatida mehmon uylarini tashkil etish bo‘yicha amalga oshiriladigan loyihalarning ro‘yxatini;
2018-2019-yillarda Surxondaryo viloyatida o‘tkaziladigan madaniy, ko‘ngilochar va sport tadbirlari taqvimini tasdiqlasin.
2. O‘zbekiston Respublikasi Turizmni rivojlantirish davlat qo‘mitasi Surxondaryo viloyati hokimligi bilan birgalikda:
Surxondaryo viloyatida yangi tashkil etilgan turizm infratuzilmasi va namoyishi obyektlari hamda mehmon uylarini (keyingi o‘rinlarda turizm obyektlari deb yuritiladi) turizm yo‘nalishlariga kiritish maqsadida ular to‘g‘risidagi ma’lumotlarni respublikada faoliyat yuritayotgan turoperatorlarga yetkazilishini va keng targ‘ibot ishlarini amalga oshirilishini ta’minlasin;
turizm obyektlarida sifatli xizmat ko‘rsatilishini tashkil etish maqsadida tegishli o‘quv mashg‘ulotlarini o‘tkazsin;
doimiy ravishda xorijiy va mahalliy ommaviy axborot vositalari va turoperatorlar vakillari uchun tanishtiruv-axborot turlarini tashkil etsin.
3. Surxondaryo viloyati hokimligi ikki oy muddatda 2019-yilda Surxondaryo viloyatining turizm salohiyatini yanada rivojlantirish bo‘yicha chora-tadbirlarni hamda turistlar tashrif buyuradigan obyektlarga olib boruvchi yo‘llarni ta’mirlash bo‘yicha amalga oshiriladigan ishlarning manzilli dasturini ishlab chiqib, O‘zbekiston Respublikasi Prezidentining “O‘zbekiston Respublikasining rivojlanish davlat dasturlarini shakllantirish va moliyalashtirishning yangi tartibini joriy etish to‘g‘risida” 2017-yil 18-dekabrdagi PQ-3437-son va O‘zbekiston Respublikasi Prezidentining “2018-yil uchun investitsiyaviy va infratuzilmaviy loyihalar ro‘yxatini tasdiqlash to‘g‘risida” 2018-yil 3-fevraldagi PQ-3507-son qarorlari talablariga muvofiq O‘zbekiston Respublikasi Investitsiyalar bo‘yicha davlat qo‘mitasi va Iqtisodiyot vazirligiga taqdim etsin.
4. O‘zbekiston Respublikasi Turizmni rivojlantirish davlat qo‘mitasi, Qurilish vazirligi hamda Surxondaryo viloyati hokimligining:
Boysun tumanida Omonxona qishlog‘i, Zovboshi tog‘li hududi, Darband qishlog‘i hududlarini o‘z ichiga olgan — Boysun kichik turizm zonasini;
Sariosiyo va Uzun tumanlarida Xonjiza tog‘ tizmalari yon bag‘irlarida hamda Sariosiyo tumani Sangardak qishlog‘i hududlarida — Sariosiyo kichik turizm zonasini;
Sherobod tumani Shalqon qishlog‘i, Xo‘jaikon tuz koni hududlarida hamda hududdagi mevali bog‘larni o‘z ichiga olgan — Sherobod kichik turizm zonasini tashkil etish hamda ularda zamonaviy mehmonxona majmualari, madaniy-sog‘lomlashtirish, savdo-ko‘ngilochar va turizm ahamiyatiga ega bo‘lgan boshqa obyektlar qurish, shuningdek, zamonaviy muhandislik infratuzilmasi obyektlarini tashkil etish to‘g‘risidagi takliflari ma’qullansin.
O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi, Qurilish vazirligi hamda manfaatdor vazirlik va idoralar bilan birgalikda uch oy muddatda Boysun, Sariosiyo va Sherobod kichik turizm zonalarining aniq chegaralarini belgilash bo‘yicha;
O‘zbekiston Respublikasi Investitsiyalar bo‘yicha davlat qo‘mitasi, Turizmni rivojlantirish davlat qo‘mitasi, Iqtisodiyot vazirligi hamda boshqa manfaatdor vazirlik va idoralar bilan birgalikda Boysun, Sariosiyo va Sherobod kichik turizm zonalarining aniq chegaralari belgilangandan so‘ng uch oy muddatda ularning hududida yo‘l-transport, muhandislik-kommunikatsiya va ishlab chiqarish infratuzilmalarini rivojlantirish bo‘yicha takliflarini O‘zbekiston Respublikasi Prezidentining “Erkin iqtisodiy zonalar va kichik sanoat zonalari faoliyati samaradorligini oshirish borasidagi qo‘shimcha chora-tadbirlar to‘g‘risida” 2017-yil 25-oktabrdagi PQ-3356-son qarori bilan tashkil etilgan Erkin iqtisodiy zonalar va kichik sanoat zonalari ma’muriy kengashlarining faoliyatini muvofiqlashtirish bo‘yicha respublika kengashiga kiritsin.
6. O‘zbekiston Respublikasi Investitsiyalar bo‘yicha davlat qo‘mitasi Tashqi ishlar vazirligi va Turizmni rivojlantirish davlat qo‘mitasi bilan birgalikda kichik turizm zonalari hududida amalga oshiriladigan investitsiya loyihalarini moliyalashtirish maqsadida xalqaro moliya institutlari, xorijiy tashkilotlar, donor mamlakatlar va tashkilotlarning grantlari, beg‘araz moliyaviy yordamlarini hamda tijorat banklarining kreditlarini belgilangan tartibda jalb etilishini ta’minlasin.
7. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — Investitsiyalar bo‘yicha davlat qo‘mitasi raisi S.R. Xolmuradov, O‘zbekiston Respublikasi Turizmni rivojlantirish davlat qo‘mitasi raisi A.A. Abduhakimov va Surxondaryo viloyati hokimi E.O. Turdimov zimmasiga yuklansin.