LexUZ sharhi
Mazkur qaror O‘zbekiston Respublikasi Prezidentining 2019-yil 1-iyuldagi PQ-4380-sonli “O‘zbekiston Respublikasi Adliya vazirligi huzuridagi Intellektual mulk agentligi faoliyatini tashkil etish chora-tadbirlari to‘g‘risida”gi qaroriga asosan o‘z kuchini yo‘qotgan.
Intellektual mulk obyektlarini xalqaro norma va standartlarga muvofiq huquqiy himoya qilish tizimini yanada takomillashtirish, unga xos bo‘lmagan va umrini o‘tab bo‘lgan vazifalarni bekor qilish, shuningdek O‘zbekiston Respublikasining Intellektual mulk agentligi faoliyatiga zamonaviy interfaol davlat xizmatlarini joriy etish maqsadida:
1. Quyidagilar O‘zbekiston Respublikasining Intellektual mulk agentligining asosiy vazifalari va faoliyati yo‘nalishlari etib belgilansin:
intellektual mulk sohasida yagona davlat siyosatini amalga oshirishni ta’minlash, ixtirolar, foydali modellar, sanoat namunalari, tovar belgilari hamda boshqa intellektual mulk obyektlarini huquqiy himoya qilish;
ixtirolar, sanoat namunalari, foydali modellar, tovar belgilari va boshqa intellektual mulk obyektlarini ekspertizadan o‘tkazish, ro‘yxatga olish va hisobga qo‘yishni tashkillashtirish;
Davlat patent fondi va intellektual mulkning rasmiy ro‘yxatga olinganligi to‘g‘risida ma’lumotlar bazasini shakllantirish va olib borish, iqtisodiyotning real sektorining xo‘jalik yurituvchi subyektlari, ilmiy tashkilotlar, olim va mutaxassislarning ma’lumotlardan samarali foydalanishi uchun ularning saqlanishi va foydalanish qulayligini ta’minlash;
intellektual mulk sohasiga zamonaviy axborot texnologiyalarini joriy etish, tadbirkorlik subyektlari va aholiga “bir darcha” tamoyili asosida interfaol davlat xizmatlarini ko‘rsatish;
milliy intellektual mulk obyektlarini chet elda huquqiy himoya qilishni ta’minlash bo‘yicha korxonalar va tashkilotlarga konsultativ va amaliy ko‘mak berish, shuningdek intellektual mulk sohasida xalqaro hamkorlikni kengaytirish;
2. O‘zbekiston Respublikasi Intellektual mulk agentligining ijro etuvchi apparati boshqaruv xodimlarining cheklangan soni 61 kishidan iborat yangilangan tuzilmasi 1-ilovaga* muvofiq tasdiqlansin.
3. O‘zbekiston Respublikasi Vazirlar Mahkamasi ikki hafta muddatda O‘zbekiston Respublikasining Intellektual mulk agentligining yangi Nizomini tasdiqlasin, unda, mazkur qarorda belgilangan uning asosiy vazifalari va faoliyati yo‘nalishlariga muvofiq Agentlikning funksiyalari tubdan o‘zgartirilishi nazarda tutilsin, shuningdek xalqaro huquqiy me’yorlarga to‘g‘ri kelmaydigan, o‘z umrini o‘tab bo‘lgan va unga xos bo‘lmagan funksiyalar tugatilsin, shu jumladan:
ilm-fan, adabiyot va san’at asarlariga bo‘lgan avtorlik huquqining davlat ro‘yxatidan o‘tkazilishini, bunda Butunjahon intellektual mulk tashkilotining Bern konvensiyasiga muvofiq tegishli asarning yaratilgani fakti bo‘yicha avtorlik huquqining yuzaga kelishini belgilash;
O‘zbekiston Respublikasi Adliya vazirligining vakolatlarini takrorlamaslik uchun mulkiy huquqlarni ko‘pchilik asosida boshqarayotgan tashkilotlarni davlat ro‘yxatidan o‘tkazish;
intellektual mulk obyektlaridan foydalanishga litsenziya shartnomalarini ro‘yxatga olishning amaldagi mexanizmini takrorlamaslik uchun O‘zbekiston Respublikasi hududida intellektual mulk obyektlaridan foydalanayotgan yuridik va jismoniy shaxslarning hisobini yuritish.
4. O‘zbekiston Respublikasining Intellektual mulk agentligi Iqtisodiyot vazirligi, Axborot va kommunikatsiya texnologiyalarini rivojlantirish vazirligi, Adliya vazirligi, boshqa manfaatdor vazirlik va tashkilotlar bilan birgalikda bir oy muddatda mamlakatimizda intellektual mulkni himoya qilish tizimini yanada takomillashtirish, uni xalqaro standartlar va talablarga moslashtirish bo‘yicha takliflarni ishlab chiqsin va Vazirlar Mahkamasiga kiritsin.
5. O‘zbekiston Respublikasining Intellektual mulk agentligi Axborot va kommunikatsiya texnologiyalarini rivojlantirish vazirligi bilan birgalikda 2016-2017-yillarda “Intellektual mulk” axborot tizimi yaratilishini ta’minlasin, bunda quyidagilar nazarda tutilsin:
patentlarga elektron buyurtmalar berish hamda patent fondining ma’lumotlar bazasini barcha uchun foydalanishi mumkin bo‘lgan ko‘rinishda shakllantirish;
“bir darcha” tamoyili asosida intellektual mulk sohasidagi davlat interaktiv xizmatlarini joriy etish.
6.O‘zbekiston Respublikasining Intellektual mulk agentligi xodimlarini attestatsiyadan o‘tkazish bo‘yicha Komissiya 2-ilovaga* muvofiq tarkibda tashkil etilsin.
* 1-2-ilovalar rus tilidagi matnda berilgan.
Komissiya (A.N. Aripov) bir oy muddatda O‘zbekiston Respublikasining Intellektual mulk agentligi xodimlarini belgilangan tartibda attestatsiyadan o‘tkazishni hamda uni yuqori malakali tashabbuskor, intellektual mulk sohasi masalalari bo‘yicha zarur bilim va amaliy tajribaga ega kadrlar bilan butlanishini ta’minlasin.
7.O‘zbekiston Respublikasi Prezidentining “O‘zbekiston Respublikasining Intellektual mulk agentligini tashkil etish to‘g‘risida” 2011-yil 24-maydagi PQ-1536-sonli qarorining 2-bandi va 3-bandi birinchi xatboshisi, shuningdek 1 va 2-ilovasi o‘z kuchini yo‘qotgan deb hisoblansin.
Intellektual mulk agentligi Adliya vazirligi boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida Vazirlar Mahkamasiga takliflar kiritsin.
8. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari A. Aripov zimmasiga yuklansin.