LexUZ sharhi
Mazkur Qonun O‘zbekiston Respublikasi Oliy Majlisining 1995-yil 6-maydagi 73-I-sonli “O‘zbekiston Respublikasining ayrim qonun hujjatlari o‘z kuchini yo‘qotgan deb hisoblash to‘g‘risida”gi qarori bilan o‘z kuchini yo‘qotdi.
Bozorga o‘tish davrida keng avj olgan va respublika iqtisodiyotiga xavf tug‘dirgan tovar-moddiy boyliklarni O‘zbekiston Respublikasidan tashqariga g‘ayriqonuniy ravishda olib chiqib ketishning oldini olish maqsadida O‘zbekiston Respublikasi Oliy Kengashi qaror qiladi:
1) 1985-yil 13-dekabrdagi O‘zbekiston Respublikasi Qonuni bilan tasdiqlangan O‘zbekiston Respublikasining Ma’muriy huquqbuzarlik to‘g‘risidagi kodeksi (O‘zbekiston Respublikasi Oliy Sovetining Vedomostlari, 1985-yil, № 35, 412-modda) quyidagi mazmunli 166-2 va 233-1-moddalar bilan to‘ldirilsin:
O‘zbekiston Respublikasidan tashqariga tovarlar, materiallar, xomashyo, qishloq xo‘jalik mahsulotlari, oziq-ovqat mahsulotlari va boshqa moddiy boyliklarni olib chiqib ketishning belgilangan tartibini buzganlik —
fuqarolarga — ikki yuz so‘mdan besh yuz so‘mgacha miqdorda, mansabdor shaxslarga — besh yuz so‘mdan bir ming so‘mgacha miqdorda jarima solinib, olib chiqib ketilayotgan tovar-moddiy boyliklarning musodara qilinishiga sabab bo‘ladi.
O‘zbekiston Respublikasi Ichki ishlar vazirligi huzuridagi Tovar-moddiy boyliklarni olib chiqib ketishni nazorat qiluvchi davlat inspeksiyasi idoralari ushbu Kodeksning 166-2-moddasida ko‘zda tutilgan ma’muriy huquqbuzarliklar to‘g‘risidagi ishlarni ko‘rib chiqadilar.
Ushbu moddaning birinchi qismida ko‘rsatilgan idoralar nomidan ma’muriy huquqbuzarliklar to‘g‘risidagi ishlarni ko‘rib chiqishga va ma’muriy jazo berishga O‘zbekiston Respublikasi Ichki ishlar vazirligi xuzuridagi Tovar-moddiy boyliklarni olib chiqib ketishni nazorat qiluvchi davlat inspeksiyasi Bosh boshqarmasining boshlig‘i va uning o‘rinbosarlari, shuningdek O‘zbekiston Respublikasi Ichki ishlar vazirligi huzuridagi Tovar-moddiy boyliklarni olib chiqib ketishni nazorat qiluvchi davlat inspeksiyasining Qoraqalpog‘iston Respublikasidagi, viloyatlar va Toshkent shahridagi bo‘linmalarining boshliqlari va boshliq o‘rinbosarlari ham haqlidirlar”;
2) 1959-yil 21-maydagi O‘zbekiston Respublikasi Qonuni bilan tasdiqlangan O‘zbekiston Respublikasi Jinoyat kodeksi (O‘zbekiston Respublikasi Oliy Sovetining Vedomostlari, 1959-yil, № 6, 2-modda) quyidagi mazmunli 179-2-modda bilan to‘ldirilsin:
O‘zbekiston Respublikasidan tashqariga tovarlar, materiallar, xomashyo qishloq xo‘jalik mahsulotlari, oziq-ovqat mahsulotlari va boshqa moddiy boyliklarni olib chiqib ketishning belgilangan tartibini buzish xuddi shunday xatti-harakat uchun ma’muriy jazo chorasi ko‘rilganidan keyin sodir etilsa, —
uch yilgacha ozodlikdan mahrum qilib, olib chiqib ketilayotgan tovar-moddiy boyliklarni musodara etish bilan yoki o‘n ming so‘mdam yigirma besh ming so‘mgacha miqdorda jarima solish bilan jazolanadi”;
3) 1959-yil 21-maydagi O‘zbekiston Respublikasi Qonuni bilan tasdiqlagan O‘zbekiston Respublikasi Jinoyat-protsessual kodeksi (O‘zbekiston Respublikasi Oliy Sovetining Vedomostlari, 1959-yil, № 6, 3-modda) 108-moddasining to‘rtinchi qismi “179-moddaning ikkinchi qismi” degan so‘zlardan keyin “179-2-moddasi” degan so‘zlar bilan to‘ldirilsin.