Davlat tasarrufidan chiqarish va xususiylashtirish jarayonlarini yanada rivojlantirish va chuqurlashtirish, korxonalarning investitsiyaga oid jalb etuvchanligini oshirish, to‘g‘ridan to‘g‘rixorijiy investitsiyalarni jalb etishning qulay shakllaridan foydalanish maqsadida Vazirlar Mahkamasi qaror qiladi:
1. Vazirlar Mahkamasi Komplekslari, Davlat mulki qo‘mitasi, vazirliklar, idoralar, xo‘jalik birlashmalarining Xususiylashtirish dasturiga 1 va 2-ilovalarga* muvofiq korxonalar va obyektlarni qo‘shimcha ravishda kiritish to‘g‘risidagi taklifiga rozilik berilsin.
O‘zbekiston Respublikasi Davlat mulki qo‘mitasi Vazirlar Mahkamasi Komplekslari, vazirliklar, idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda obyektlarni davlat tasarrufidan chiqarish, xususiylashtirish va sotishning kelishilgan jadvallarini bir oy muddatda tasdiqlasin, korxonalarni baholash va sotishga tayyorlashning muddatlarini yuqori darajada qisqartirgan holda jadvalning bajarilishini qattiq nazorat qilsin.
Keyingi tahrirga qarang.
2. Korxonalarni xususiylashtirish jarayoniga, eng avvalo yakka tartibdagi loyihalar bo‘yicha xususiylashtiriladigan va xorijiy investorlarga yaxlit sotiladigan korxonalarga xorijiy investitsiyalar jalb etilishini faollashtirish maqsadida O‘zbekiston Respublikasi Davlat mulki qo‘mitasi:
Keyingi tahrirga qarang.
xorijiy investorlarga sotiladigan korxonalarning texnik diagnostikasini o‘tkazish hamda ularni baholash bo‘yicha moliyaviy maslahatchilarni tanlab olish tartibotini sezilarli darajada soddalashtirish va muddatlarini qisqartirish masalalarini Jahon banki bilan ikki oy muddatda ishlab chiqsin;
ikki yil mobaynida sotilmagan korxonalar va obyektlarning (yakka tartibda aksiyalashtiriladigan korxonalardan tashqari) aksiyalarini (ulushlari, paylarini), korxonalarni moliyaviy sog‘lomlashtirish bo‘yicha investorlar tomonidan biznes-rejalar taqdim etilgan taqdirda, investorlarning investitsiya majburiyatlari qiymatini obyektning narxiga kiritgan holda tanlov asosida sotish to‘g‘risida belgilangan tartibda Vazirlar Mahkamasining Komplekslari bilan kelishgan holda qarorlar qabul qilsin;
korxonani moliyaviy sog‘lomlashtirish biznes-rejasi va aniq investitsiya majburiyatlari bo‘lgan taqdirda, sotib olish to‘lovi to‘lashni 5 yilgacha bo‘lgan muddatga uzaytirib, davlat mulki keyinchalik investor tomonidan sotib olinishi huquqini bergan holda davlat mulkini tanlov asosida ishonchli boshqaruvga berish amaliyotini joriy etsin;
Vazirlar Mahkamasining tegishli Komplekslari bilan birgalikda maqsadga muvofiq bo‘lganda yirik istiqbolsiz, zarar ko‘rib ishlayotgan korxonalarni ularning mol-mulkini qismlarga bo‘lib sotuvga qo‘yish huquqi bilan, belgilangan tartibda tarkibiy o‘zgartirsin (ularni qayta tashkil etsin).
3. O‘zbekiston Respublikasi Davlat mulki qo‘mitasi, Adliya vazirligi manfaatdor vazirliklar va idoralar bilan birgalikda bir oy muddatda:
xorijiy investorlar o‘z investitsiya majburiyatlarini to‘liq bajarguniga qadar, ularning aksiyalar paketlariga egalik qilish va ulardan foydalanish shartlari va tartibini belgilagan holda, birja va birjadan tashqari bozorlarda davlat aktivlarini sotish masalalarini tartibga soluvchi idoraviy normativ hujjatlarga belgilangan tartibda o‘zgartirish va qo‘shimchalar kiritsinlar;
xususiylashtirish va xorijiy investitsiyalarni jalb etish jarayonlarini tartibga soluvchi qonun hujjatlarini va Hukumatning qarorlarini xatlovdan o‘tkazsinlar hamda, investorlar tomonidan qabul qilingan investitsiya majburiyatlari amalga oshirilishining huquqiy ta’minlanishi masalalariga alohida e’tiborni qaratgan holda, ularni to‘ldirish yuzasidan Vazirlar Mahkamasiga takliflar kiritsinlar.
4. Xorijiy investitsiyalar ishtirokidagi korxonalar muassislariga erkin muomaladagi valyutada olingan va chet elga repatriatsiya qilishga mo‘ljallangan dividendlardan O‘zbekistonning fond bozorida korxonalarning aksiyalarini (ulushlari, paylarini) va obyektlarni yaxlit sotib olish uchun foydalanishga ruxsat etilsin.
5. Belgilab qo‘yilsinki, vazirliklar, idoralar va xo‘jalik birlashmalari tomonidan davlat mulki bo‘lgan korxonalarni qayta tashkil etish, qo‘shib yuborish va tugatish O‘zbekiston Respublikasi Davlat mulki qo‘mitasi organlari bilan albatta kelishilgan holda amalga oshiriladi.
6. O‘zbekiston Respublikasi Hukumatining 3-ilovaga* muvofiq qarorlariga o‘zgartirish va qo‘shimchalar kiritilsin.
* 3-ilova rus tilidagi matnda berilgan.
7. O‘zbekiston Respublikasi Adliya vazirligi, Davlat mulki qo‘mitasi manfaatdor vazirliklar va idoralar bilan birgalikda bir oy muddatda tegishli idoraviy normativ hujjatlarga mazkur qarordan kelib chiquvchi o‘zgartirishlar kiritilishini ta’minlasinlar.
8. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari O‘.Q. Ismoilov zimmasiga yuklansin.