LexUZ sharhi
Mazkur Farmoyish O‘zbekiston Respublikasi Prezidentining 2017-yil 1-martdagi PF-4974-sonli “O‘zbekiston Respublikasi Prezidenti devoni faoliyatini yanada takomillashtirish to‘g‘risida”gi Farmoniga asosan o‘z kuchini yo‘qotgan.
Jamiyat hayoti barcha sohalarini isloh qilish jarayonlarini chuqurlashtirishning strategiyasi, asosiy tamoyillari va ustuvor yo‘nalishlarini ishlab chiqishga ko‘maklashish, o‘tish davrida respublika iqtisodiyotining huquqiy asoslari va faoliyat shart-sharoitini shakllantirish, demokratik islohotlarni ro‘yobga chiqarishni tezlashtirish bo‘yicha ishlarni muvofiqlashtirish, O‘zbekistonning jahon tizimiga integratsiyalashuvi, xorijiy investitsiyalarni keng jalb qilish maqsadida:
1. Iqtisodiy islohotlar, tadbirkorlik va xorijiy investitsiyalar bo‘yicha idoralararo kengash tugatilib, O‘zbekiston Respublikasi Prezidenti huzurida Islohotlar va investitsiya bo‘yicha idoralararo muvofiqlashtiruvchi kengash 1-ilovaga muvofiq tashkil etilsin.
1-ilova Farmoyishning rus tilidagi matnida beriladi.
Idoralararo muvofiqlashtiruvchi kengash O‘zbekiston Respublikasi Prezidenti huzuridagi maslahat organi bo‘lib, jamoatchilik asosida ishlaydi hamda jamiyatning demokratik asoslarini mustahkamlash, qonunchilik va huquqiy-me’yoriy bazani takomillashtirish, iqtisodiy, moliyaviy, bank hamda ma’muriy islohotlar sohasiga yangi kuch bag‘ishlash maqsadida keng doiradagi muammolar bo‘yicha tavsiya tarzidagi qarorlar qabul qiladi.
2. Quyidagilar Islohotlar va investitsiyalar bo‘yicha idoralararo muvofiqlashtiruvchi kengashning asosiy vazifalari va faoliyat yo‘nalishlari etib belgilansin:
O‘zbekiston Respublikasining barqaror va olg‘a qarab ijtimoiy-iqtisodiy taraqqiyotini ta’minlash uning jahon tizimiga integratsiyalashuvi, jamiyat hayotining barcha sohalarini isloh qilish jarayonlarini chuqurlashtirishning strategiyasi va ustuvorligini shakllantirish bo‘yicha taklif va tavsiyalar ishlab chiqish;
isloh qilishning maqsadli dasturlari va aniq modellarini ishlab chiqish hamda ularni ro‘yobga chiqarish monitoringini amalga oshirish;
siyosiy, iqtisodiy, ijtimoiy va ma’naviy sohalarda islohotlarni chuqurlashtirishning me’yoriy-huquqiy bazasini takomillashtirish bo‘yicha tavsiyalar tayyorlash;
demokratik va iqtisodiy islohotlar borasida qabul qilingan qonunchilik va boshqa me’yoriy hujjatlarni amalga oshirishni tezlashtirish bo‘yicha ishlarni muvofiqlashtirish;
tashqi iqtisodiy faoliyat samaradorligini oshirish va respublika iqtisodiyoti ustuvor tarmoqlariga xorijiy investitsiyalarni faol jalb qilish bo‘yicha kompleks chora-tadbirlar tizimini ishlab chiqish.
3. Belgilab qo‘yilsinki, Idoralararo muvofiqlashtiruvchi kengash o‘z faoliyatini quyidagi masalalar bo‘yicha doimiy ishlaydigan:
iqtisodiy, moliyaviy va bank sohalarini isloh qilish, bozor tamoyillari va mexanizmlarini rivojlantirish hamda mustahkamlash;
yangilanishlarni bir maromda olib borish, mulkni davlat tasarrufidan chiqarish va xususiylashtirish, xususiy mulkni rivojlantirish hamda ko‘p ukladli iqtisodiyotni shakllantirish;
tashqi iqtisodiy siyosat hamda xorijiy investitsiyalarni jalb etish ishchi komissiyalari orqali amalga oshiriladi.
4. O‘zbekiston Respublikasi Prezidenti huzuridagi Islohotlar va investitsiyalar bo‘yicha idoralararo muvofiqlashtiruvchi kengash to‘g‘risidagi nizom 2-ilovaga muvofiq tasdiqlansin;
2-ilova Farmoyishning rus tilidagi matnida beriladi.
5. Idoralararo muvofiqlashtiruvchi kengashning ishchi apparati vazifasini bajarish O‘zbekiston Respublikasi Prezidentining ijtimoiy-iqtisodiy siyosat bo‘yicha Davlat maslahatchisi xizmati ekspertlari guruhi zimmasiga yuklansin.
6. 1994-yil 21-yanvardagi “Iqtisodiy islohotlarni yanada chuqurlashtirish, xususiy mulk manfaatlarini himoya qilish va tadbirkorlikni rivojlantirish chora-tadbirlari to‘g‘risida”gi 745-I Farmonning 1-punkti;
O‘zbekiston Respublikasi Prezidentining 1994-yil 21-fevraldagi “O‘zbekiston Respublikasi Prezidenti huzurida Iqtisodiy islohotlar, tadbirkorlik va xorijiy investitsiyalar bo‘yicha idoralararo kengash tashkil etish to‘g‘risida”gi 360-Farmoyishi o‘z kuchini yo‘qotgan deb hisoblansin.
7. Mazkur Farmoyish ijrosini nazorat qilish Idoralararo muvofiqlashtiruvchi kengash raisining o‘rinbosari, O‘zbekiston Respublikasi Bosh vaziri O‘. Sultonov zimmasiga yuklansin.