LexUZ sharhi
Mazkur qaror O‘zbekistan Respublikasi Vazirlar Mahkamasining 2024-yil 13-yanvardagi 25-sonli “Madaniyat va san’at sohasida davlat boshqaruvi takomillashtirilganligi munosabati bilan O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek, ba’zilarini o‘z kuchini yo‘qotgan deb hisoblash to‘g‘risida”gi qaroriga asosan o‘z kuchini yo‘qotgan.
Yoshlarni Vatanga muhabbat, mustaqillik g‘oyalariga sadoqat va fidoyilik ruhida tarbiyalash, yurt ravnaqiga daxldorlik tuyg‘usini mustahkamlash, ularning keng qamrovli bunyodkorlik va yaratuvchilik jarayonidagi ishtirokini kengaytirishda madaniyat va san’atning o‘rnini har tomonlama oshirish, shuningdek boy madaniy musiqiy merosimiz, zamonaviy milliy estrada va jahon san’ati durdonalari asosida ularda yuksak badiiy dunyoqarashni shakllantirish hamda yosh iqtidorlarni rag‘batlantirish tizimini yanada kengaytirish maqsadida Vazirlar Mahkamasi qaror qiladi:
1. O‘zbekiston Respublikasi Madaniyat va sport ishlari vazirligi, “O‘zbeknavo” estrada birlashmasi, O‘zbekiston “Kamolot” yoshlar ijtimoiy harakati, O‘zbekiston Respublikasi Xalq ta’limi vazirligi, Oliy va o‘rta maxsus ta’lim vazirligi, O‘rta maxsus, kasb-hunar ta’limi markazi, “Mahalla” xayriya jamoat fondining Yoshlar madaniyat va san’at markazini (keyingi o‘rinlarda Markaz deb ataladi) tashkil etish to‘g‘risidagi takliflari ma’qullansin.
o‘sib kelayotgan yosh avlodni vatanparvarlik, milliy qadriyatlarimiz ruhida tarbiyalash, madaniyat va san’at borasida yoshlarning intilishlarini qo‘llab-quvvatlash maqsadida konsert va festivallar, ko‘rik-tanlovlar, turli madaniy shou-tomosha tadbirlarini o‘tkazish;
jahon xalqlari milliy musiqa va qo‘shiqchilik san’atining noyob namunalarini yoshlar orasida keng targ‘ib qilish, O‘zbekiston Respublikasiga tashrif buyuradigan hamda yurtimizdan xorijga chiquvchi yosh xonanda, sozanda va badiiy jamoalarning gastrol safarlarini milliy xususiyatlarimizga muvofiq yuqori badiiy saviyada uyushtirish;
yosh ijodkorlarning, ayniqsa chekka qishloq va mahallalardagi iqtidorli yoshlarning noyob iste’dodini ro‘yobga chiqarish va ular faoliyatini tizimli ravishda keng targ‘ib etish, turli teleloyiha, teletanlov, ko‘rsatuv va eshittirishlar tashkil etish;
yoshlarning ijodiy birlashmalari, jamoalari va yakkaxon ijrochilarning faoliyati, repertuari, ssenariylari, dasturlarining yuqori g‘oyaviy-badiiy saviyasini ta’minlashga amaliy yordam berish, ushbu jarayonni muvofiqlashtirish va tahlil qilib borish;
turli ma’naviy tahdidlar, mafkuraviy xurujlar, “ommaviy madaniyat”ning yoshlarga zararli ta’sirini o‘rganish hamda yoshlar o‘rtasida samarali ijodiy hamkorlik muhitini yaratish;
yoshlar uchun tajriba almashish, ilmiy-ijodiy simpoziumlar, konferensiyalar, mahorat darslari tashkil etish;
teatr, konsert va tomosha sahnalari, madaniyat, san’at markazlari, madaniyat va istirohat bog‘lari, amfiteatrlar va boshqa madaniy-tomosha muassasalaridan samarali foydalanish hamda joylarda yosh iqtidor egalari va iste’dod sohiblarini qo‘llab-quvvatlash, ularga amaliy yordam ko‘rsatish.
3. “Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonunining 9-moddasiga muvofiq Markazga quyidagi faoliyat turlarini tegishli litsenziya olmasdan amalga oshirishga ruxsat berilsin:
noshirlik va ta’lim faoliyati, audiovizual asarlarni tayyorlash, dublyaj qilish va ekranda namoyish etish, audiovizual asarlarni, fonogrammalar va EHM uchun yaratilgan dasturlarni takrorlash, sotish, prokatga berish, fonogrammalarni tayyorlash hamda turizm faoliyati bilan shug‘ullanish.
4. Belgilab qo‘yilsinki, Markaz yuridik shaxs hisoblanib, Madaniyat vazirligi muassisligida davlat unitar korxonasi shaklida tashkil etiladi.
(4-band O‘zbekiston Respublikasi Vazirlar Mahkamasining 2017-yil 11-maydagi 270-sonli qarori tahririda — O‘R QHT, 2017-y., 19-son, 345-modda)
Markazning tuzilmasi va Ustavini tasdiqlasin hamda o‘rnatilgan tartibda davlat ro‘yxatidan o‘tkazsin;
O‘zbekiston Respublikasi Moliya vazirligi hamda Mehnat va aholini ijtimoiy muhofaza qilish vazirligi bilan birgalikda Markazning shtatlar jadvalini ishlab chiqsin va belgilangan tartibda tasdiqlasin.
6. O‘zbekiston Respublikasi Xususiylashtirish, monopoliyadan chiqarish va raqobatni rivojlantirish davlat qo‘mitasi, Madaniyat va sport ishlari vazirligi, Toshkent shahar hokimligi va O‘zbekiston “Kamolot” yoshlar ijtimoiy harakatining:
Toshkent shahar, Yunusobod tumani, Mustaqillik shoh ko‘chasi, 2-uy manzilida joylashgan Yoshlar ijod saroyi binosini, undagi mebel va jihozlar hamda moddiy-texnik vositalar bilan birgalikda O‘zbekiston “Kamolot” yoshlar ijtimoiy harakati Markaziy Kengashiga tasarruf etish huquqisiz bepul berish;
Yoshlar ijod saroyi binosida Markazni ijara to‘lovisiz joylashtirish, shuningdek saroyning konsert va ko‘rgazma zallari, xonalari, mebel va jihozlari hamda moddiy-texnik vositalaridan bepul foydalanishi to‘g‘risidagi takliflariga rozilik berilsin.
7. Toshkent shahar hokimligi bir oy muddatda ushbu qarorning 4-bandida ko‘rsatilgan binoni, undagi mebel va jihozlar hamda moddiy-texnik vositalar bilan birgalikda belgilangan tartibda topshirsin, O‘zbekiston “Kamolot” yoshlar ijtimoiy harakati Markaziy Kengashi o‘z balansiga qabul qilsin va undan maqsadli foydalanilishini ta’minlasin.
(8-bandning beshinchi xatboshisi O‘zbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik ma’lumotlari milliy bazasi, 05.04.2022-y., 09/22/153/0266-son)
9. O‘zbekiston Respublikasi Madaniyat vazirligi “O‘zbekkonsert” davlat muassasasi bilan birgalikda O‘zbekiston Respublikasi Madaniyat vazirligi huzuridagi budjetdan tashqari Madaniyat va san’atni rivojlantirish jamg‘armasi hamda jalb etiladigan homiylik mablag‘lari hisobidan Markaz faoliyati tashkil etilishini, shuningdek uning moddiy-texnika bazasi shakllantirilishini ta’minlasin.
(9-bandning birinchi xatboshisi O‘zbekiston Respublikasi Vazirlar Mahkamasining 2017-yil 11-maydagi 270-sonli qarori tahririda — O‘R QHT, 2017-y., 19-son, 345-modda)
O‘zbekiston Respublikasi Moliya vazirligi O‘zbekiston Respublikasi Davlat budjetining 2014-yilgi parametrlariga ushbu qarordan kelib chiqadigan o‘zgartirishlar to‘g‘risida Vazirlar Mahkamasiga takliflar kiritsin.
10. O‘zbekiston Respublikasi Aloqa, axborotlashtirish va telekommunikatsiya texnologiyalari davlat qo‘mitasi Markazning belgilangan tartibda zamonaviy aloqa vositalari, shu jumladan Internet tarmog‘i va boshqa aloqa turlari bilan ta’minlash choralarini ko‘rsin hamda uning zamonaviy talablarga javob beradigan veb-saytini yaratishga ko‘maklashsin.
11. Toshkent shahar hokimligi tomonidan ta’sis etilgan “YOSNLAR IJOD SAROYINI SAQLASN VA EKSPLUATASIYA QILISN DIREKTSIYASI” davlat unitar korxonasi (keyingi o‘rinlarda direksiya deb ataladi) qonunchilikda belgilangan tartibda tugatilishi ma’lumot uchun qabul qilinsin.
O‘zbekiston Respublikasi Xususiylashtirish, monopoliyadan chiqarish va raqobatni rivojlantirish davlat qo‘mitasi bilan birgalikda direksiya belgilangan tartibda tugatilishini;
O‘zbekiston Respublikasi Mehnat va aholini ijtimoiy muhofaza qilish vazirligi hamda O‘zbekiston “Kamolot” yoshlar ijtimoiy harakati Markaziy Kengashi bilan birgalikda tugatilayotgan direksiya xodimlarining ishga joylashtirilishini ta’minlasin.
13. Vazirliklar va idoralar o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.
14. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.I. Ikramov zimmasiga yuklansin.