Budjet mablag‘lari va Respublika maqsadli kitob fondi mablag‘lari hisobiga umumiy o‘rta hamda o‘rta maxsus, kasb-hunar ta’limi ta’lim muassasalari uchun darsliklar va o‘quv-metodik komplekslarni xarid qilishda narxlar asossiz o‘sib ketishiga yo‘l qo‘ymaslik maqsadida, Vazirlar Mahkamasining “Tovarlar (ishlar, xizmatlar)ga tartibga solinadigan narxlar (tariflar)ni deklaratsiya qilish (tasdiqlash) va belgilash tartibini yanada takomillashtirish chora-tadbirlari to‘g‘risida” 2010-yil 28-oktabrdagi 239-son qarori talablariga muvofiq Vazirlar Mahkamasi qaror qiladi:
Oldingi tahrirga qarang.
1. O‘zbekiston Respublikasi respublika budjeti mablag‘lari va Respublika maqsadli kitob fondi mablag‘lari hisobiga umumiy o‘rta hamda o‘rta maxsus, kasb-hunar ta’limi ta’lim muassasalari uchun darsliklar va o‘quv-metodik komplekslarni (keyingi o‘rinlarda o‘quv adabiyotlari deb ataladi) nashr etishda (qayta nashr etishda) rentabellikning cheklangan darajasi mahsulotning prognozlashtirilgan ishlab chiqarish tannarxiga nisbatan 15 foizdan ortiq bo‘lmagan miqdorda belgilansin.
(1-bandning birinchi xatboshisi O‘zbekiston Respublikasi Vazirlar Mahkamasining 2016-yil 26-apreldagi 122-sonli qarori tahririda — O‘R QHT, 2016-y., 17-son, 176-modda)
Rentabellik zarur foyda miqdorini (davr xarajatlari, moliyaviy faoliyat bo‘yicha xarajatlar summasi va sof foyda) o‘quv adabiyotlariga to‘g‘ri keladigan ishlab chiqarish xarajatlari summasiga bo‘lish yo‘li bilan hisoblanadi.
Oldingi tahrirga qarang.
2. O‘zbekiston Respublikasi Monopoliyaga qarshi kurashish qo‘mitasi o‘quv adabiyotlariga rentabellikning cheklangan darajasi qo‘llanilishining to‘g‘riligi ustidan belgilangan tartibda nazorat o‘rnatsin.
(2-band O‘zbekiston Respublikasi Vazirlar Mahkamasining 2019-yil 19-dekabrdagi 1014-sonli qarori tahririda — Qonun hujjatlari ma’lumotlari milliy bazasi, 20.12.2019-y., 09/19/1014/4173-son)
3. Belgilansinki, ushbu qaror bilan belgilangan rentabellikning cheklangan darajasi oshirilishi holatlari aniqlanganda Vazirlar Mahkamasining “Tovarlar (ishlar, xizmatlar)ga tartibga solinadigan narxlar (tariflar)ni deklaratsiya qilish (tasdiqlash) va belgilash tartibini yanada takomillashtirish chora-tadbirlari to‘g‘risida” 2010-yil 28-oktabrdagi 239-son qarorida nazarda tutilgan chora-tadbirlar qo‘llaniladi.
4. O‘zbekiston Respublikasi Xalq ta’limi vazirligi va Oliy va o‘rta maxsus ta’lim vazirligining O‘rta maxsus, kasb-hunar ta’limi markazi O‘zbekiston matbuot va axborot agentligi bilan birgalikda o‘quv adabiyotlarini nashr etish (qayta nashr etish) bo‘yicha tender savdolariga nashriyotlar va matbaa korxonalarini keng jalb etsinlar.
5. O‘zbekiston Respublikasi Xalq ta’limi vazirligi, O‘zbekiston matbuot va axborot agentligi, Davlat raqobat qo‘mitasi va Moliya vazirligi 2015-yilda ta’lim muassasalarini o‘quv adabiyotlari bilan ta’minlash natijalari bo‘yicha hamda nashriyotlar va matbaa korxonalarining takliflarini hisobga olib, zaruriyat bo‘lganda, O‘zbekiston Respublikasi Vazirlar Mahkamasiga o‘quv adabiyotlariga narx belgilash mexanizmini yanada takomillashtirish yuzasidan takliflar kiritsinlar.
6. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari A.I. Ikramov zimmasiga yuklansin.