LexUZ sharhi
Mazkur qaror O‘zbekiston Respublikasi Vazirlar Mahkamasining 2018-yil 3-iyuldagi 497-sonli “Fuqarolar yig‘inining “Mahalla posboni” jamoatchilik tuzilmasi faoliyatini tubdan takomillashtirish haqida”gi qaroriga asosan o‘z kuchini yo‘qotgan.
Fuqarolik jamiyatini shakllantirishda fuqarolar va ularning o‘zini o‘zi boshqarish organlari faolligini, aholining o‘zaro hamjihatligini oshirish, ularning jamoat tartibi va xavfsizligini ta’minlash, jinoyatchilikka qarshi kurash va huquqbuzarliklarning oldini olishdagi ishtiroki hamda ushbu sohada huquqni muhofaza qilish organlari bilan hamkorligini yanada takomillashtirish maqsadida Vazirlar Mahkamasi qaror qiladi:
1. Fuqarolar yig‘inining “Mahalla posboni” jamoatchilik tuzilmasi to‘g‘risidagi nizom ilovaga muvofiq tasdiqlansin.
2. “Mahalla posboni” jamoatchilik tuzilmasi rahbarlariga fuqarolarning o‘zini o‘zi boshqarish organlari raislarining lavozim maoshlariga teng miqdorda lavozim maoshlari belgilanishining amaldagi tartibi saqlab qolinsin.
3. Ichki ishlar vazirligi “Mahalla” xayriya jamoat fondi bilan birgalikda bir oy muddatda Fuqarolarning o‘zini o‘zi boshqarish organlari faoliyatini muvofiqlashtirish bo‘yicha respublika kengashiga “Mahalla posboni” jamoatchilik tuzilmasi rahbariga beriladigan guvohnoma va ko‘krak nishonining namunaviy shakllari hamda ularni berish tartibi to‘g‘risida taklif kiritsinlar.
4. O‘zbekiston Respublikasi Vazirlar Mahkamasining “Jazoni o‘tash joylaridan ozod qilingan shaxslarga ijtimoiy-maishiy jihatdan va ishga joylashishda yordam ko‘rsatish bo‘yicha Qoraqalpog‘iston Respublikasi Vazirlar Kengashi va hokimliklar huzuridagi maxsus komissiyalar, “Mahalla posboni” jamoat tuzilmalari va fuqarolarning o‘zini o‘zi boshqarish organlari huzuridagi yarashtirish komissiyalari to‘g‘risidagi nizomlarni tasdiqlash haqida” 1999-yil 19-apreldagi 180-son qarorining 2-bandi hamda qarorga 2-ilova o‘z kuchini yo‘qotgan deb hisoblansin.
5. Vazirliklar va idoralar o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.
6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.I. Ikramov zimmasiga yuklansin.
1. Ushbu Nizom “Fuqarolarning o‘zini o‘zi boshqarish organlari to‘g‘risida”gi O‘zbekiston Respublikasi Qonuniga muvofiq, Fuqarolar yig‘inining “Mahalla posboni” jamoatchilik tuzilmasining (keyingi o‘rinlarda Jamoatchilik tuzilmasi deb ataladi) asosiy vazifalarini, uning faoliyatini tashkil etish, Jamoatchilik tuzilmasi rahbari va a’zolarining vazifalari, huquq va majburiyatlarini belgilaydi.
2. Jamoatchilik tuzilmasi mamlakatimizda tinchlik, osoyishtalik, xavfsizlikni ta’minlash, jamoat tartibini saqlash, fuqarolarda ogohlik va faollikni oshirish, huquq-tartibotni mustahkamlashda fuqarolarning o‘zini o‘zi boshqarish organlari bilan davlat organlari o‘rtasidagi hamkorlikdagi ishlarni tizimli yo‘lga qo‘yish maqsadida barcha fuqarolar yig‘inlarida tashkil etiladi.
3. Jamoatchilik tuzilmasi o‘z faoliyatini O‘zbekiston Respublikasining Konstitutsiyasiga, qonunlariga, O‘zbekiston Respublikasi Oliy Majlisi palatalari qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, Fuqarolar yig‘ini to‘g‘risidagi nizomga, fuqarolar yig‘ini va uning kengashi qarorlariga hamda ushbu Nizomga muvofiq amalga oshiradi.
4. Jamoatchilik tuzilmasi faoliyati ixtiyoriylik, oshkoralik, ijtimoiy adolat, insonparvarlik, qonuniylik, jamoatchilik yo‘li bilan o‘zaro yordam ko‘rsatish tamoyillari asosida tashkil etiladi.
5. Jamoatchilik tuzilmasi rahbariga tegishli fuqarolar yig‘ini raisining lavozim maoshiga teng miqdorda maosh belgilanadi hamda ularning ta’minoti uchun zarur bo‘lgan mablag‘lar mahalliy budjet hisobidan ajratiladi.
6. Fuqarolar yig‘ini raisi va ichki ishlar organlarining hududiy profilaktika inspektori Jamoatchilik tuzilmasi faoliyatiga umumiy rahbarlikni o‘zaro hamkorlikda amalga oshiradilar.
tegishli hududda xavfsizlikni va jamoat tartibini saqlash, fuqarolar ogohligini oshirish, tinchlik va barqarorlikni ta’minlashda davlat organlari va nodavlat notijorat tashkilotlarining quyi tizimlari bilan hamkorlikda ish olib borish;
jamiyatda ijtimoiy-ma’naviy muhitni sog‘lomlashtirishga ko‘maklashish, huquqbuzarlik, jinoyatchilik, diniy ekstremizm va terrorizmga qarshi kurashda fuqarolar faolligini oshirish ishlarida qatnashish;
aholida, birinchi navbatda, yoshlarda huquqiy madaniyatni yuksaltirish, fuqarolar yig‘inlarida huquqiy tarbiya va huquqiy targ‘ibot ishlarini tizimli amalga oshirishda ishtirok etish;
xalqimiz ma’naviyatiga zid bo‘lgan turli salbiy ta’sirlarning oldini olish yuzasidan tushuntirish ishlarini samarali tashkil etish va o‘tkazishda qatnashish;
mamlakatimizda qaror topgan tinchlik, osoyishtalik va barqarorlik natijasida aholi farovonligi ta’minlanayotganligi, bu borada o‘zining faol ishtiroki bilan munosib hissa qo‘shish har bir fuqaroning vatanparvarlik va fuqarolik burchi ekanligini tushuntirishda qatnashish;
fuqarolar yig‘ini hududidagi ekologiya va tabiatni muhofaza qilish, obodonlashtirish hamda ko‘kalamzorlashtirish masalalari bo‘yicha qabul qilingan qonun hujjatlari talablari, umumdavlat hamda hududiy dasturlarda belgilangan chora-tadbirlar ijrosini ta’minlash va ushbu jarayonda keng jamoatchilik ko‘magini shakllantirish ishlarini tashkil etish va amalga oshirishda ishtirok etish.
8. Jamoatchilik tuzilmasi huquqni muhofaza qilish organlarining quyidagi yo‘nalishlardagi faoliyatida bevosita ishtirok etadi va yordam ko‘rsatadi:
huquqbuzarlik va jinoyatchilikning oldini olish, bu borada aholi bilan turli profilaktika tadbirlari o‘tkazish;
fuqarolar tomonidan pasport tizimi, sanitariya, ekologiya, yong‘in va harakat xavfsizligi qoidalariga rioya etilishi yuzasidan tegishli hududda tushuntirish ishlarini tashkil qilish;
ichkilikbozlik va giyohvandlikka ruju qo‘yganlarni, oila-turmush doirasida muntazam huquqbuzarliklar sodir etuvchilarni, o‘zlarining jamiyatga zid xatti-harakatlari bilan farzandlari tarbiyasiga salbiy ta’sir ko‘rsatuvchi yoki ular tarbiyasi bilan shug‘ullanmaydigan ota-onalarni, notinch oilalarni, voyaga yetmaganlarni turli huquqbuzarliklar sodir etishga undovchi shaxslarni, yoshlar ongini zaharlab, ularni turli diniy ekstremistik g‘oyalar ta’siriga olish maqsadida bunday tashkilotlarga a’zo bo‘lishga da’vat etuvchi, turli noqonuniy targ‘ibot va tashviqot ishlari olib boruvchi shaxslarni, o‘smirlarga qonunga xilof ravishda diniy ta’lim beruvchilarni, konstitutsiyaviy tizimga qarshi turli axborotlarni tarqatuvchi shaxslarni aniqlash hamda ular bilan profilaktik-tarbiyaviy ishlar olib borish.
muqaddam sudlangan va jazoni ijro etish muassasalaridan ozod etilgan shaxslarni ijtimoiy reabilitatsiya qilish va ijtimoiy moslashtirishda ko‘maklashish;
jismoniy shaxslarning huquqbuzarlikdan jabrlanuvchiga aylanishi xavfini kamaytirishga doir chora-tadbirlarni amalga oshirish.
(8-band O‘zbekiston Respublikasi Vazirlar Mahkamasining 2017-yil 7-oktabrdagi 805-sonli qaroriga asosan oltinchi va yettinchi xatboshilar bilan to‘ldirilgan — Qonun hujjatlari ma’lumotlari milliy bazasi, 10.10.2017-y., 09/17/805/0073-son)
9. Jamoatchilik tuzilmasi o‘z vazifalarini amalga oshirishda davlat organlari va nodavlat notijorat tashkilotlarining xodimlari bilan yaqindan hamkorlikda faoliyat olib boradi.
10. Jamoatchilik tuzilmasi tabiiy ofatlar, ommaviy tartibbuzarliklar va boshqa favqulodda vaziyatlarda jamoat tartibini saqlashda, favqulodda vaziyat xavfi tug‘ilganda aholini o‘z vaqtida xabardor etishda, aholi o‘rtasida bunday vaziyatlarda to‘g‘ri harakat qilishni targ‘ib qilishda va ushbu holatlarni bartaraf etishda tegishli davlat organlariga yaqindan yordam beradi.
11. Jamoatchilik tuzilmasi fuqarolar yig‘ini kengashi tomonidan fuqarolar yig‘ini raisining taqdimnomasiga asosan hududiy ichki ishlar organlarining profilaktika inspektori bilan kelishgan holda hududda jamoat tartibini saqlash, fuqarolar xavfsizligini ta’minlash, huquqbuzarliklar va jinoyatchilik holatlarining oldini olishda huquqni muhofaza qilish organlariga ixtiyoriy ravishda yordam berish istagini bildirgan fuqarolardan iborat tarkibda shakllantiriladi.
12. Jamoatchilik tuzilmasi a’zolari soni tegishli hududning tabiiy-geografik, ijtimoiy-iqtisodiy, demografik, kriminogen xususiyatlaridan kelib chiqib, ichki ishlar organlarining profilaktika inspektori bilan kelishgan holda, fuqarolar yig‘ini kengashining qaroriga muvofiq belgilanadi va o‘zgartiriladi. Jamoatchilik tuzilmasi a’zolari soni 6 — 16 nafar bo‘lishi lozim.
13. Davlat organlari va fuqarolarning o‘zini o‘zi boshqarish organlari Jamoatchilik tuzilmasining shakllanishi va faoliyat ko‘rsatishi uchun zarur shart-sharoitlar yaratadilar.
14. Jamoatchilik tuzilmasi uchun fuqarolarni o‘zini o‘zi boshqarish organlari joylashgan binolarda alohida xonalar ajratiladi. Ajratilgan xonalarning moddiy-texnika ta’minotini yaxshilashda mahalliy hokimliklar tomonidan yordam ko‘rsatiladi.
15. Jamoatchilik tuzilmasi a’zoligiga jamoat tartibini saqlash, fuqarolar xavfsizligini ta’minlash, huquqbuzarlik va jinoyatchilikning oldini olishga doir profilaktika tadbirlarida ixtiyoriy ravishda ishtirok etish istagini bildirgan, jismoniy va ma’naviy sog‘lom, fuqarolarning huquq va erkinliklarini hurmat qiladigan, yuksak insoniy va axloqiy fazilatlarga ega bo‘lgan O‘zbekiston Respublikasi Qurolli Kuchlari safida muddatli harbiy xizmatni yoki safarbarlik chaqiruvi rezervidagi xizmatni o‘tagan 18 yoshdan 60 yoshgacha bo‘lgan O‘zbekiston Respublikasi fuqarolari qabul qilinadi.
16. Jamoatchilik tuzilmasiga o‘z turmush tarzi bilan fuqarolar yig‘ini a’zolari o‘rtasida salbiy tavsiflanganlar, ichki ishlar organlarining profilaktik hisobida turganlar, ruhiy kasalligi, giyohvandlikka, surunkali ichkilikbozlikka ruju qo‘yganligi uchun tegishli tibbiyot muassasalari hisobida turganlar, qasddan sodir etgan jinoyati uchun sudlanganlik holati tugallanmagan yoki sudlanganligi olib tashlanmaganlar, sud tomonidan muomalaga layoqatsiz deb topilganlar, diniy tashkilotlarning professional xizmatchilari qabul qilinmaydi.
17. Jamoatchilik tuzilmasi a’zoligiga nomzodning ushbu Nizomning 15 va 16-bandlarida ko‘rsatilgan talablarga muvofiqligini o‘rganib chiqish uchun fuqarolar yig‘ini raisi va tegishli hududdagi ichki ishlar organlarining profilaktika inspektori shaxsan mas’uldirlar.
18. Fuqarolar yig‘ini raisi va hududdagi ichki ishlar organlarining profilaktika inspektori tomonidan fuqarolarni Jamoatchilik tuzilmasi a’zoligiga qabul qilish va a’zolikdan chiqarishni qayd etish bo‘yicha maxsus daftar yuritiladi hamda a’zolar faoliyati monitoringi olib boriladi. Ushbu daftar tegishli hududdagi ichki ishlar organlari tayanch punktida saqlanadi.
(18-band O‘zbekiston Respublikasi Vazirlar Mahkamasining 2018-yil 3-maydagi 321-sonli qarori tahririda — Qonun hujjatlari ma’lumotlari milliy bazasi, 04.05.2018 g., № 09/18/321/1154)
19. O‘z vazifasini bajarmagan, faoliyati salbiy baholangan, qonunga zid xatti-harakatlar qilgan shaxslarni Jamoatchilik tuzilmasi a’zolari safidan chiqarish fuqarolar yig‘ini raisi hamda hududiy ichki ishlar organining profilaktika inspektori tavsiyasiga asosan fuqarolar yig‘ini kengashining qarori bilan amalga oshiriladi.
(19-band O‘zbekiston Respublikasi Vazirlar Mahkamasining 2017-yil 7-oktabrdagi 805-sonli qarori tahririda — Qonun hujjatlari ma’lumotlari milliy bazasi, 10.10.2017-y., 09/17/805/0073-son)
20. Jamoatchilik tuzilmasi rahbari lavozimiga nomzodlar O‘zbekiston Respublikasi fuqarolari bo‘lishi, qoida tariqasida, oliy ma’lumotli, bevosita tayinlangungacha kamida besh yil tegishli hududda doimiy yashayotgan bo‘lishi, tashkilotchilik qobiliyatiga, davlat organlarida, ta’lim muassasalarida yoki nodavlat notijorat tashkilotlarida yoxud xo‘jalik faoliyati sohasida ish tajribasiga, shuningdek hayotiy tajribaga va aholi o‘rtasida obro‘-e’tiborga ega bo‘lishi kerak.
21. Jamoatchilik tuzilmasi rahbari lavozimiga fuqarolar yig‘ini raisi va hududiy ichki ishlar organining profilaktika inspektori tavsiyanomasi asosida 3 nafardan kam bo‘lmagan nomzodlar fuqarolarning o‘zini o‘zi boshqarish organlari faoliyatini muvofiqlashtirish bo‘yicha tuman (shahar) kengashi va hududiy ichki ishlar organi rahbari bilan kelishish uchun taqdim etiladi. Kelishilgan nomzodlar orasidan fuqarolar yig‘ini kengashi tomonidan Jamoatchilik tuzilmasi rahbari tanlanadi va kengash qaroriga asosan lavozimga tayinlanadi.
(21-band O‘zbekiston Respublikasi Vazirlar Mahkamasining 2017-yil 7-oktabrdagi 805-sonli qarori tahririda — Qonun hujjatlari ma’lumotlari milliy bazasi, 10.10.2017-y., 09/17/805/0073-son)
22. Fuqarolar yig‘ini raisi fuqarolar yig‘ini kengashi qarori bilan tayinlangan jamoatchilik tuzilmasi rahbari bilan mehnat shartnomasi tuzadi.
o‘ziga yuklangan vazifalarni bajarmayotgan jamoatchilik tuzilmasi a’zolarini a’zolikdan chiqarish yuzasidan fuqarolar yig‘ini raisiga taklif kiritish;
ichki ishlar va boshqa huquqni muhofaza qilish organlari xodimlaridan hamda fuqarolar yig‘ini raisidan Jamoatchilik tuzilmasi a’zolarini ushbu Nizomda ko‘rsatilmagan vazifalar va topshiriqlarni bajarishga jalb etmaslikni talab qilish.
25. Quyidagilar Jamoatchilik tuzilmasi rahbarining Jamoatchilik tuzilmasi faoliyatini tashkil etishdagi majburiyatlari hisoblanadi:
Jamoatchilik tuzilmasi ishini rejalashtirish, a’zolarini tegishli hudud va yo‘nalishlar bo‘yicha taqsimlash;
yilning har choragida ushbu Nizomda belgilangan vazifalarning amalga oshirilishi yuzasidan fuqarolar yig‘iniga (vakillar yig‘ilishiga) hisobot berish;
Jamoatchilik tuzilmasi a’zolari bilan ularning vazifalari, huquq va majburiyatlari bo‘yicha mashg‘ulotlar o‘tkazish;
Jamoatchilik tuzilmasi a’zolari tomonidan o‘zlariga yuklangan vazifalarning belgilangan tartibda bajarilishi holatini nazorat qilib borish;
Jamoatchilik tuzilmasi a’zolariga vazifalarni bajarishga jalb etishdan oldin qonuniylikka va shaxsiy xavfsizlikni ta’minlash qoidalariga rioya qilish bo‘yicha tushuntirishlar berish;
jamoat tartibini saqlash, fuqarolar xavfsizligini ta’minlash, huquqbuzarlik va jinoyatchilikning oldini olishda huquqni muhofaza qilish organlariga ko‘maklashish bo‘yicha belgilangan vazifalarni Jamoatchilik tuzilmasi a’zolariga o‘z vaqtida yetkazish hamda ularning bajarilishini ta’minlash;
ichki ishlar organlarining profilaktika inspektori va fuqarolar yig‘ini raisi bilan birgalikda Jamoatchilik tuzilmasi a’zolari faoliyatida yo‘l qo‘yilgan kamchiliklarni bartaraf etish chora-tadbirlarini ko‘rish.
26. Jamoatchilik tuzilmasi a’zolari tegishli hududda huquqni muhofaza qilish organlari xodimlari bilan hamkorlikda quyidagi vazifalarni bajaradilar:
fuqarolarning, ayniqsa, voyaga yetmaganlar va yoshlarning huquqiy madaniyatini yuksaltirish, tegishli hududda qonun ustuvorligini va osoyishtalikni ta’minlash, jamiyatda yurish-turish qoidalariga va axloq-odob mezonlariga rioya qilinishini, hududda tartib o‘rnatishda huquqni muhofaza qilish organlari xodimlariga ko‘maklashish;
ichki ishlar organlari hisobida turuvchi, tarbiyasi og‘ir voyaga yetmagan shaxslar bilan aniq maqsadli profilaktika tadbirlarini tashkillashtirish va o‘tkazishda ishtirok etish;
fuqarolar tomonidan pasport tizimi, sanitariya, yong‘in va harakat xavfsizligi qoidalariga rioya etilishi yuzasidan tegishli hududda tushuntirish ishlarini olib borishda ishtirok etish;
hududda xavfsizlikni va jamoat tartibini saqlash, fuqarolar ogohligini oshirish, jinoyat sodir bo‘lganda aybdor shaxslarni aniqlash tadbirlarida qatnashish;
konstitutsiyaviy tizimga qarshi turli axborotlarni tarqatuvchi shaxslarni aniqlash hamda ular bilan profilaktik-tarbiyaviy ishlar olib borish;
jamiyatda ijtimoiy-ma’naviy muhitni sog‘lomlashtirishga ko‘maklashish, ekologiya va tabiatni muhofaza qilish, obodonlashtirish hamda ko‘kalamzorlashtirish masalalari bo‘yicha hududiy dasturlarda belgilangan chora-tadbirlar ijrosini ta’minlash;
tegishli hududda noqonuniy istiqomat qilayotgan, uzoq muddatdan buyon uyiga kelmayotgan shaxslar hamda o‘zlariga ma’lum bo‘lgan, sodir etish uchun tayyorgarlik ko‘rilayotgan jinoyatlar to‘g‘risida tuzilma rahbarini va ichki ishlar organlarining hududiy profilaktika inspektorini yoki tegishli huquqni muhofaza qilish organlarini xabardor qilish;
27. Jamoatchilik tuzilmasi a’zolari o‘zlariga yuklangan vazifalarni bajarish jarayonida quyidagi huquqlarga ega:
jamoat tartibi, xavfsizlik, jamiyatda yurish-turish va axloq-odob hamda pasport tizimi, sanitariya va ekologiya, yong‘in va harakat xavfsizligi qoidalariga fuqarolar tomonidan rioya qilinmagan hollarda tegishli organlar bilan birgalikda tushuntirish ishlarini olib borish va tashkil etishda qatnashish;
tegishli hududda sodir etilayotgan har qanday huquqbuzarliklarni to‘xtatishni fuqarolardan talab qilish;
tegishli hududda istiqomat qiluvchi fuqarolar o‘rtasidagi turli nizolarni hal etishda, huquqbuzarlik sodir etgan shaxslarni muhokama qilishda, noqonuniy xatti-harakatlar sodir etishga moyil shaxslar bilan huquqiy-tarbiyaviy mazmundagi suhbatlarda va qonun hujjatlarida belgilangan tartibda boshqa profilaktika chora-tadbirlarida bevosita ishtirok etish;
huquq-tartibotni mustahkamlash va jamoat tartibini ta’minlash yuzasidan olib borilayotgan faoliyat samaradorligini oshirishga doir takliflarni huquqni muhofaza qilish organlariga kiritish;
jamoatchilik tuzilmasi rahbari, ichki ishlar organlarining profilaktika inspektori va fuqarolar yig‘ini raisidan o‘z xizmat vazifalarini bajarish uchun shart-sharoit yaratishni hamda amaliy yordam ko‘rsatishni talab qilish.
28. Quyidagilar Jamoatchilik tuzilmasi a’zolarining o‘z xizmat vazifalarini bajarishdagi majburiyatlari hisoblanadi:
jinoyat va boshqa huquqbuzarliklar yoki baxtsiz hodisalar sodir etilganda bu haqda zudlik bilan Jamoatchilik tuzilmasi rahbariga, ichki ishlar organlariga va boshqa tegishli tashkilotlarga xabar berish, huquqni muhofaza qilish organlari xodimlari kelgunga qadar jinoyat sodir etilgan joylarga boshqa shaxslarning kirmasligi, jinoyat izlari va jinoyatga aloqador bo‘lgan barcha ashyoviy dalillarning yo‘qolmasligi choralarini ko‘rish;
Jamoatchilik tuzilmasi rahbariga va huquqni muhofaza qilish organlarining xodimlariga ushbu Nizomda ko‘rsatilgan vazifalarni bajarishda ko‘maklashish va ularning qonuniy talablarini bajarish;
o‘z faoliyati haqida Jamoatchilik tuzilmasi rahbariga, fuqarolar yig‘ini raisiga va ichki ishlar organlarining profilaktika inspektoriga hisobot berish hamda axborot taqdim etish.
29. Jamoatchilik tuzilmasi a’zolariga o‘zlariga yuklangan vazifalarni bajarish vaqtida spirtli ichimliklar, giyohvand vositalar, psixotrop yoki odamning aql-irodasiga ta’sir etuvchi boshqa moddalar iste’mol qilish, qurol va huquq-tartibot organlari xodimlari xizmat faoliyati davomida foydalaniladigan boshqa maxsus vositalarni ishlatish taqiqlanadi.
30. O‘zbekiston Respublikasi Ichki ishlar vazirligi, Mudofaa vazirligi, Favqulodda vaziyatlar vazirligi, Milliy xavfsizlik xizmati va Davlat bojxona qo‘mitasi o‘z tizimidagi organlarda xizmat qilishga nomzodlarni Jamoatchilik tuzilmasi a’zolari hamda rahbarlari orasidan tanlashga va qabul qilishga alohida e’tibor qaratadi.
31. Jinoyatchilikning oldini olishda, fuqarolar osoyishtaligini ta’minlashda, jamoat tartibini saqlashda, shuningdek jinoyat va boshqa huquqbuzarliklarni sodir etgan shaxslarni aniqlashda hamda o‘ziga yuklangan boshqa vazifalarni bajarishda o‘rnak ko‘rsatgan Jamoatchilik tuzilmasi rahbari va a’zolari qonun hujjatlarida belgilangan tartibda davlat mukofotlariga tavsiya etilishi mumkin.
32. Mahalliy davlat hokimiyati organlari tuzilmalar faoliyatida namuna va ibrat ko‘rsatayotgan Jamoatchilik tuzilmasi rahbari va a’zolarini, homiylarni jalb qilgan holda, moddiy-ma’naviy rag‘batlantirib borishlari mumkin.
321. Jamoatchilik tuzilmasi rahbari fuqarolar yig‘ini raisi va hududiy ichki ishlar organining profilaktika inspektori tavsiyanomasiga asosan ichki ishlar organlari tomonidan kadrlar zaxirasiga kiritiladi.
sog‘lig‘ining holati va jismoniy tayyorgarligi bo‘yicha ichki ishlar organi xodimining xizmat majburiyatlarini bajarishga qodir bo‘lgan;
O‘zbekiston Respublikasi Qurolli Kuchlaridagi muddatli harbiy xizmatni yoki safarbarlik chaqiruvi rezervidagi harbiy xizmatni yoxud oliy ta’lim muassasalarida harbiy tayyorgarlikni o‘tagan Jamoatchilik tuzilmasi rahbarlari lavozimida faoliyat olib borayotgan shaxslar kiritiladi.
(VII1 bob O‘zbekiston Respublikasi Vazirlar Mahkamasining 2017-yil 7-oktabrdagi 805-sonli qaroriga asosan kiritilgan — Qonun hujjatlari ma’lumotlari milliy bazasi, 10.10.2017-y., 09/17/805/0073-son)
33. Tegishli hududda jinoyatchilikning oldini olish, fuqarolar osoyishtaligini ta’minlash, jamoat tartibini saqlash va ushbu hududda huquq-tartibotni mustahkamlashga doir vazifalarni amalga oshirish, fuqarolar bilan muomala madaniyati, ijtimoiy-ma’naviy muhitni barqarorlashtirishga qaratilgan va boshqa masalalar yuzasidan har bir ichki ishlar organining profilaktika inspektori Jamoatchilik tuzilmasi bilan hamkorlikda ish olib boradi.
34. Ichki ishlar organlarining profilaktika inspektori Jamoatchilik tuzilmasi bilan birgalikda tegishli hududda huquq-tartibotni mustahkamlash bilan bog‘liq vazifalarni bajarishda, birinchi navbatda, qonun ustuvorligini ta’minlash, qonunchilikka, jamiyatda yurish-turish qoidalariga va axloq-odob mezonlariga rioya etish zarurligi yuzasidan tushuntirish ishlarini olib boradi.
35. Tegishli hududda joylashgan davlat organlari va nodavlat notijorat tashkilotlari jinoyatchilik va huquqbuzarliklarning oldini olishda, fuqarolar osoyishtaligini ta’minlashda va jamoat tartibini saqlashda Jamoatchilik tuzilmasiga yordam berishlari lozim.
Jamoatchilik tuzilmasiga yuklangan vazifalarni bajarish tartibi to‘g‘risida aniq ko‘rsatmalar beradi, o‘zaro aloqa va hamkorlik qilish yo‘llarini belgilab beradi;
Jamoatchilik tuzilmasining olib borayotgan ishlarini, berilgan vazifalarni bajarish jarayonidagi xatti-harakatlarini muntazam nazorat qilib boradi;
Jamoatchilik tuzilmasidan olingan ma’lumotlar asosida qaror qabul qilishda ushbu ma’lumotlarning to‘g‘riligini tekshirib ko‘radi.
37. Jamoatchilik tuzilmasi faoliyatini o‘rganish, tahlil qilish, aniqlangan kamchiliklarni bartaraf etish, uning faoliyatini takomillashtirish va uni rag‘batlantirish haqidagi masalalar Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Respublika kengashi hamda uning Qoraqalpog‘iston Respublikasi, viloyatlar, tumanlar va shaharlardagi hududiy kengashlari tomonidan har yili kamida bir marta muhokama etib boriladi.
38. Mahalliy davlat hokimiyati organlari Jamoatchilik tuzilmasi yordamidan faqat ushbu Nizomda belgilangan vazifalar doirasida, ichki ishlar organlarining profilaktika inspektori, fuqarolar yig‘ini raisi, Jamoatchilik tuzilmasi rahbari bilan kelishgan holda foydalanishi mumkin.
Jamoatchilik tuzilmasini ushbu Nizomda ko‘rsatilmagan vazifalarni bajarishga jalb etish taqiqlanadi.
39. Jamoatchilik tuzilmasiga qonunga xilof topshiriqlarni berish, tarkibida jinoyat alomatlari bo‘lgan yoki jinoyatga aloqador ma’lumotlar bo‘lgan hamda bevosita ichki ishlar organlari vakolati doirasiga kiruvchi ishlarni ko‘rib chiqish va hal etishni topshirish, ularni davlat va xizmat siriga ega bo‘lgan hujjatlar bilan tanishtirish taqiqlanadi.
40. Mazkur Nizom talablarini buzgan shaxslar qonun hujjatlarida belgilangan tartibda javobgarlikka tortiladi.