LexUZ sharhi
Mazkur qaror O‘zbekistan Respublikasi Vazirlar Mahkamasining 2022-yil 25-fevraldagi 88-sonli “Faoliyatni boshlash yoki tugatish uchun vakolatli organni xabardor qilish tartibi to‘g‘risidagi yagona nizomni tasdiqlash haqida”gi qaroriga asosan 2022-yil 1-martdan o‘z kuchini yo‘qotadi.
Mudofaa obyektlarini qurish, ulardan foydalanish va ularni ta’mirlash, shuningdek mudofaa obyektlarida rejim talablariga rioya etilishini ta’minlash maqsadida Vazirlar Mahkamasi qaror qiladi:
1. Vazirlar Mahkamasining 2003-yil 24-sentabrdagi 410-son qarori (O‘zbekiston Respublikasi QT, 2003-y., 9-son, 87-modda) bilan tasdiqlangan Mudofaa obyektlarini loyihalashtirish, qurish, ulardan foydalanish va ularni ta’mirlash faoliyatini litsenziyalash to‘g‘risidagi nizomning II bo‘limiga quyidagi mazmundagi 61-band qo‘shilsin:
“61. Mudofaa obyektlarini qurish, ulardan foydalanish va ularni ta’mirlash bo‘yicha bosh pudratchi hisoblanadigan litsenziat tomonidan mudofaa obyektlarini qurish, ulardan foydalanish va ularni ta’mirlashga doir tegishli faoliyat turlarini amalga oshirish uchun litsenziyaga ega bo‘lmagan subpudrat tashkilotlarini jalb etish quyidagi talablar va shartlarga rioya qilgan holda amalga oshiriladi:
subpudrat tashkilotlarini mudofaa obyektlarini qurish, ulardan foydalanish va ularni ta’mirlash ishlarini bajarishga jalb etishga loyiha-smeta hujjatlarining alohida bo‘limlari bo‘yicha yo‘l qo‘yiladi;
subpudrat tashkilotlariga loyiha-smeta hujjatlari faqat ularga taalluqli qismi bo‘yicha taqdim etilishi mumkin;
subpudrat tashkilotlarining xodimlari mudofaa obyektlari hududiga ularning ro‘yxatlari belgilangan tartibda kelishilgandan keyin kiritiladi;
litsenziat subpudrat tashkilotlari va ularning xodimlari tomonidan obyekt rejimi bilan belgilangan qoidalarga rioya etilishi, shuningdek davlat sirlarini saqlashning ta’minlanishi uchun to‘liq javob beradi.”.
2. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B.I. Zakirov zimmasiga yuklansin.