O‘zbekiston Respublikasi Prezidentining “Butunjahon bankining Xalqaro rivojlantirish assotsiatsiyasi bilan moliyaviy hamkorlikda “Sog‘liqni saqlash tizimini takomillashtirish (Salomatlik-3)” loyihasini amalga oshirish chora-tadbirlari to‘g‘risida” 2011-yil 7-sentabrdagi PQ-1614-son qarorini bajarish yuzasidan va sog‘liqni saqlash sohasida islohotlarni yanada chuqurlashtirish maqsadida Vazirlar Mahkamasi qaror qiladi:
1. Vazirlar Mahkamasining “O‘zbekiston Respublikasi sog‘liqni saqlash muassasalarini moliyalashtirish va boshqaruv tizimini yanada takomillashtirish to‘g‘risida” 2005-yil 28-sentabrdagi 217-son qaroriga muvofiq:
Samarqand, Sirdaryo, Farg‘ona viloyatlari va Toshkent shahrining 25 ta tajriba shahar oilaviy poliklinikalarida bir nafar yashovchi hisobiga xarajatlar normatividan kelib chiqib moliyalashtirish mexanizmi joriy etilganligi;
tajriba shahar oilaviy poliklinikalarining budjeti 4,2 baravar, birkitilgan bir nafar yashovchi hisobiga xarajatlarning bazaviy normativi 4 baravar, aholini dori-darmonlar bilan ta’minlash xarajatlari 2,5 baravar ko‘paytirilganligi, shuningdek mintaqalarda aholining yosh va jins tarkibini va kasallanishni hisobga olgan holda budjet mablag‘larining bir tekis taqsimlanishi ta’minlanganligi;
diagnostika va davolashning zamonaviy standartlarini joriy etish, shahar oilaviy poliklinikalarining moddiy-texnika bazasini va kadrlar salohiyatini mustahkamlash hisobiga aholiga tekin va sifatli tibbiy xizmatlar ko‘rsatilishi yaxshilanganligi ma’lumot uchun qabul qilinsin.
2. Sog‘liqni saqlash muassasalarini moliyalashtirish tizimini isloh qilish borasida to‘plangan ijobiy tajribani hisobga olgan holda O‘zbekiston Respublikasi Sog‘liqni saqlash vazirligi va Moliya vazirligining:
respublikaning qolgan 155 ta shahar oilaviy poliklinikalarini bir nafar yashovchi hisobiga xarajatlar normatividan kelib chiqib moliyalashtirish shartlariga: Toshkent shahrida, Samarqand va Farg‘ona viloyatlarida — 2013-yildan boshlab, Qoraqalpog‘iston Respublikasida, Andijon, Namangan, Xorazm va Surxondaryo viloyatlarida — 2014-yildan boshlab, Buxoro, Jizzax, Navoiy, Qashqadaryo va Toshkent viloyatlarida 2015-yildan boshlab bosqichma-bosqich o‘tkazish;
Farg‘ona viloyatining 15 ta tuman markaziy kasalxonalarini ikki turdagi kontraktlar tuzish asosida moliyalashtirish: 3 ta kasalxonada davolab yuborilgan bir nafar bemor hisobiga xizmatlar qiymati va hajmidan kelib chiqib hamda 12 ta kasalxonada — tasdiqlangan normativ ko‘rsatkichlarga muvofiq xarajatlar smetasi bo‘yicha haq to‘lash yuzasidan eksperiment o‘tkazish to‘g‘risidagi takliflari maqullansin.
2013-yil 1-martdan boshlab Farg‘ona viloyatining tuman markaziy kasalxonalarini viloyat moliya boshqarmasi, sog‘liqni saqlash boshqarmasi va tuman tibbiyot birlashmasi o‘rtasida kontraktlar tuzish asosida moliyalashtirish bo‘yicha eksperiment amalga oshirilsin.
3. O‘zbekiston Respublikasi Sog‘liqni saqlash vazirligi 2013-yil 1-martgacha bo‘lgan muddatda Moliya vazirligi bilan birgalikda Farg‘ona viloyatidagi tuman markaziy kasalxonalarini moliyalashtirish tartibi to‘g‘risidagi Vaqtinchalik nizomni ishlab chiqsin va belgilangan tartibda tasdiqlasin, unda:
tuman markaziy kasalxonalarining xarajatlarini qoplashga budjet mablag‘lari ajratish tartibiga alohida e’tibor qaratilsin.
4. Sog‘liqni saqlash tizimini isloh qilish davlat dasturi amalga oshirilishini tashkil etish va nazorat qilish Respublika komissiyasi (A.Ikramov):
sog‘liqni saqlash sohasida moliyalashtirish islohotlarini joriy etish ishlari yuzasidan tashkiliy-metodik rahbarlikni ta’minlasin;
sog‘liqni saqlash sohasida moliyalashtirish islohotlari natijalarining tizimli monitoringi va tahlilini, islohotlarni rivojlantirishning huquqiy bazasini, uning sog‘liqni saqlashni isloh qilishning ustuvor maqsadlari va vazifalariga muvofiqligini ta’minlasin.
Keyingi tahrirga qarang.
5. O‘zbekiston Respublikasi Sog‘liqni saqlash vazirligining “Salomatlik-3” loyihasini amalga oshirish Markaziy byurosi huzurida uch shtat birligidan iborat moliyalashtirish islohotlari monitoringi bo‘limini tashkil etish, ularni Xalqaro rivojlantirish assotsiatsiyasi tomonidan beriladigan kredit mablag‘lari hisobiga ta’minlash to‘g‘risidagi taklifiga rozilik berilsin.
6. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari A.I. Ikramov zimmasiga yuklansin.