LexUZ sharhi
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Mulkni izchillik bilan davlat tasarrufidan chiqarish na xususiylashtirishni ta’minlash, shu asosda ijtimoiy sohaga yo‘naltirilgan ko‘p tarmoqli bozor iqtisodiyotini shakllantirish, davlatga daxldor bo‘lmagan sohaning rolini kuchaytirish va raqobat muhitni vujudga keltirish maqsadida:
1. Belgilab qo‘yilsinki, quyidagilar mulkni davlat tasarrufidan chiqarish va xususiylashtirish jarayonining ustuvor yo‘nalishlari hisoblanadi:
qimmatbaho qog‘ozlar bozorini rivojlantirish va ochiq usuldagi aksionerlik jamiyatlarini tashkil etish bilan bir vaqtda davlatga tegishli aksiyalar ulushini qisqartirish orqali aholini iqtisodiy islohotlar jarayoniga keng jalb etish;
ko‘chmas mulk bozorini, birinchi navbatda savdo, maishiy, kommunal xizmat ko‘rsatish obyektlarini va tugallanmay qolgan qurilish inshootlarini tanlov asosida sotish yo‘li bilan shunday bozorni shakllantirish;
ulgurji savdo korxonalarini xususiylashtirish jarayoniga jalb etish orqali ishlab chiqarish vositalari bozorini vujudga keltirish, shuningdek tovar-xomashyo birjalari tizimini rivojlantirish;
tarkib topgan ishlab chiqarish va boshqaruv tuzilmalari yakka hokimligini tugatish, xususiylashtirish cheklab qo‘yiladigan korxonalar sonini kamaytirish;
tendyerlar va kimoshdi savdolarini, sarmoyalarga oid savdolarni o‘tkazish, shuningdek mol-mulkni to‘g‘ridan to‘g‘ri sotish yo‘li bilan respublika iqtisodiyotiga xorijiy sarmoyalarni jalb etish;
2. Davlat o‘z ulushini saqlab qoladigan ochiq usuldagi aksionerlik jamiyatlarining nizomdagi mablag‘ini jamlash chog‘ida asosan aksiyalarning kuyidagi qismlari ko‘zda tutilsin:
— fond birjalarida va qimmatbaho qog‘ozlar bozorida, shu jumladan chet ellarda erkin sotish uchun mo‘ljallangan qismi.
3. O‘zbekiston Respublikasi Vazirlar Mahkamasining xususiylashtirish jarayonlarini chuqurlashtirish borasidagi harakatlari rejasi ilovaga* muvofiq tasdiqlansin.
4. O‘zbekiston Respublikasining Davlat mulkini boshqarish davlat qo‘mitasiga quyidagi huquqlar berilsin:
(4-bandning birinchi xatboshisi O‘zbekiston Respublikasi Prezidentining 2005-yil 19-iyuldagi PF-3626-sonli Farmoni tahririda — O‘zbekiston Respublikasi Qonun hujjatlari to‘plami, 2005-y., 28-29-son, 204-modda)
o‘z vakolati doirasida korxonalar hamda tashkilotlarni davlat tasarrufidan chiqarish va xususiylashtirish shakllarini belgilash, zarur normativ hujjatlarni va xususiylashtirish komissiyalari tuzish tartibini ishlab chiqish hamda tasdiqlash;
davlat mulki jamg‘armasi va idoralarga qarashli xo‘jalik hisobidagi bo‘linmalar orqali fond birjalarining, sarmoya banklari va jamg‘armalarining muassisi hamda ishtirokchisi bo‘lish;
(4-bandning uchinchi xatboshisi O‘zbekiston Respublikasi Prezidentining 2012-yil 21-fevraldagi PF-4424-sonli Farmoni tahririda — O‘R QHT, 2012-y., 8-9-son, 77-modda)
davlatga tegishli bo‘lgan 1994-yilgi dividend (daromad)dan tashkil etiladigan aksionerlik jamiyatlarini rivojlantirish va texnika bilan qayta qurollantirish uchun foydalanish.
ikki hafta muddat ichida yuqorida ko‘rsatilgan ustuvor yo‘nalishlarga asoslanib Respublikada mulkni davlat tasarrufidan chiqarish va xususiylashtirishga oid davlat dasturini puxta ishlab chiqib, tasdiqlasin;
bir oy muddat ichida O‘zbekiston Respublikasi Hukumatining qarorlarini ushbu Farmonga muvofiq holga keltirsin, amaldagi qonunlarni o‘zgartirish va to‘ldirish bo‘yicha belgilangan tartibda takliflar kiritsin, respublika vazirliklari, davlat qo‘mitalari va idoralarining mazkur Farmonga zid bo‘lgan hujjatlari qayta ko‘rib chiqilishi va bekor qilinishini ta’minlasin.