Bo‘sh turgan va foydalanilmayotgan davlat mulki obyektlaridan oqilona foydalanish va ularni tasarruf etishni, shu jumladan ularni sotish, kichik biznes va xususiy tadbirkorlik subyektlari biznesini rivojlantirish uchun ularning ustav fondlariga kiritish yoki ularga ijaraga berish yo‘li bilan, ta’minlash maqsadida Vazirlar Mahkamasi qaror qiladi:
1. O‘zbekiston Respublikasi Davlat mulki qo‘mitasi, Iqtisodiyot vazirligi, Moliya vazirligi, Xalq ta’limi vazirligi, Sog‘liqni saqlash vazirligi, Madaniyat va sport ishlari vazirligi, Oliy va o‘rta maxsus ta’lim vazirligi, Monopoliyadan chiqarish va raqobatni rivojlantirish davlat qo‘mitasi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining bo‘sh turgan va foydalanilmayotgan davlat mulki obyektlarini oqilona tasarruf etishni ta’minlashga doir takliflariga rozilik berilsin.
keyinchalik oqilona foydalanish va tasarruf etish uchun bo‘sh turgan va foydalanilmayotgan davlat mulki obyektlarining aniqlangan ro‘yxati 1-ilovaga* muvofiq;
bo‘sh turgan va foydalanilmayotgan davlat mulki obyektlaridan oqilona foydalanish va ularni tasarruf etish chora-tadbirlari dasturi 2-ilovaga* muvofiq belgilansin.
3. Bo‘sh turgan va foydalanilmayotgan davlat mulki obyektlaridan kelgusida oqilona foydalanish va ularni tasarruf etishga doir takliflar tayyorlash bo‘yicha ishchi komissiya (keyingi o‘rinlarda Ishchi komissiya deb ataladi) tarkibi 3-ilovaga* muvofiq tasdiqlansin.
4. O‘zbekiston Respublikasi Davlat arxitektura va qurilish qo‘mitasi tegishli vazirliklar va idoralar bilan birgalikda 2011-yil 1-dekabrgacha 1-ilovada* ko‘rsatilgan obyektlarni ulardan foydalanishning zamonaviy talablariga muvofiqligi yuzasidan texnik ko‘rikdan o‘tkazishni belgilangan tartibda ta’minlasin hamda har bir obyekt bo‘yicha ulardan bundan keyin foydalanish imkoniyatlari, shu jumladan faoliyat yo‘nalishi bo‘yicha foydalanish imkoniyati, yoxud buzib tashlash zarurligi to‘g‘risida xulosa bersin.
* 1-2 ilovalar rus tilidagi matnda berilgan.
5. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari davlat va xo‘jalik boshqaruvi organlari, shuningdek obyektlarni balansda saqlovchilar bilan birgalikda 2012-yil 1-yanvargacha bo‘lgan muddatda O‘zbekiston Respublikasi Davlat arxitektura va qurilish qo‘mitasining davlat arxitektura-qurilish nazorati hududiy inspeksiyalarining tegishli xulosalari asosida:
obyektlar bazasida mintaqalarni rivojlantirishning tasdiqlangan dasturlariga va shaharsozlik hujjatlariga muvofiq tadbirkorlik subyektlarini joylashtirish uchun ularning bazasida kichik sanoat maydonchalari barpo etish uchun — muhandislik-kommunikatsiya tarmoqlari mavjudligini hisobga olgan holda;
yosh oilalar va voyaga yetgan yetim bolalar uchun turar joylarga, shuningdek boshqa ijtimoiy infratuzilma obyektlariga qayta ixtisoslashtirish uchun — moliyalashtirish manbalari mavjudligini hisobga olgan holda;
keyinchalik sotish, ijaraga berish yoki tadbirkorlik subyektlari ishtirokida tashkil etiladigan ustav fondiga qonun hujjatlarida belgilangan tartibda davlat ulushi sifatida kiritish uchun;
bo‘shab qoladigan yer uchastkalarini keyinchalik mahalliy davlat hokimiyati organlari tasarrufiga bergan holda belgilangan tartibda buziladigan obyektlarning ro‘yxatlarini aniqlab ulardan bundan keyin oqilona foydalanish va tasarruf etish bo‘yicha Ishchi komissiyaga asosli takliflar kiritsinlar.
6. Ishchi komissiya (Xo‘jayev) 2012-yil 1-fevralgacha bo‘lgan muddatda Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining takliflarini puxta o‘rganib chiqsin hamda O‘zbekiston Respublikasi Vazirlar Mahkamasiga 1-ilovada* ko‘rsatilgan obyektlardan kelgusida samarali foydalanish va ularni tasarruf etish chora-tadbirlarini amalga oshirish bo‘yicha Hukumat qarori loyihasini kiritsin.
7. Belgilansinki, 1 va 2-ilovalarda* ko‘rsatilgan obyektlarni buzish va balansdan hisobdan chiqarish bo‘shab qoladigan yer uchastkalari mahalliy davlat hokimiyati organlariga berilgan holda belgilangan tartibda balansda saqlovchilar tomonidan mahalliy davlat hokimiyati organlari bilan birgalikda amalga oshiriladi.
* 1-2 ilovalar rus tilidagi matnda berilgan.
8. Budjet mablag‘lari va obyektlarni balansda saqlovchilarning budjetdan tashqari daromadlari, mahalliy budjetlar daromadlari prognozi oshirib bajarilishidan olingan mablag‘lar, obyektlar buzilgandan keyin qoladigan qurilish materiallarini sotishdan tushadigan mablag‘lar, shuningdek davlat mulkini sotishdan olingan Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari ixtiyorida qoladigan mablag‘lar O‘zbekiston Respublikasi Davlat arxitektura va qurilish qo‘mitasining davlat arxitektura-qurilish nazorati hududiy inspeksiyalarining xulosalarini olish va obyektlarni buzish bilan bog‘liq xarajatlarni qoplash manbalari etib belgilansin.
Keyingi tahrirga qarang.
9. O‘zbekiston Respublikasi Davlat mulki qo‘mitasi Savdo-sanoat palatasi, davlat boshqaruvi va mahalliy davlat hokimiyati manfaatdor organlari bilan birgalikda bir oy muddatda ijaraga berish yoki sotish uchun tadbirkorlik subyektlariga taklif etilayotgan foydalanilmayotgan binolar va xonalar, shuningdek qurilishi tugallanmagan obyektlar bo‘yicha Internet tarmog‘ida axborot bazasini tashkil etsin va uni doimiy ravishda yangilab borsin.
10. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.