LexUZ sharhi
Mazkur Farmon O‘zbekiston Respublikasi Prezidentining 2021-yil 30-apreldagi PF-6218-sonli “Milliy qonunchilik bazasini kompleks tizimlashtirish chora-tadbirlari to‘g‘risida”gi Farmoniga asosan o‘z kuchini yo‘qotgan.
Yagona to‘lov vositasi sifatida milliy valyutani mustahkamlash hamda uning xarid qobiliyatini oshirish, O‘zbekiston Respublikasi hududida naqd xorijiy valyuta muomalasi to‘g‘risida amaldagi qonunchilik talablarini so‘zsiz bajarish maqsadida:
1. 2002-yilning 1-iyulidan boshlab O‘zbekiston Respublikasi hududida yuridik hamda jismoniy rezident va norezident shaxslar tomonidan barcha turdagi tovarlar, ishlar va xizmatlar haqini to‘lashda naqd xorijiy valyuta bilan hisob-kitob va to‘lovlarni amalga oshirishlari taqiqlansin.
2. O‘zbekiston Respublikasi Prokuraturasi, Davlat soliq qo‘mitasi, Davlat bojxona qo‘mitasi, Ichki ishlar vazirligi yuridik va jismoniy shaxslar tomonidan respublika hududida naqd xorijiy valyuta muomalasi to‘g‘risidagi amaldagi qonunchilik so‘zsiz bajarilishi ustidan qattiq nazorat o‘rnatsinlar, qonunbuzarlik hollari aniqlangan taqdirda aybdor shaxslarga nisbatan jinoiy javobgarlikkacha bo‘lgan qat’iy choralar qo‘llanilsin.
3. O‘zbekiston Respublikasi Tashqi ishlar vazirligi, “O‘zbekiston havo yo‘llari” milliy aviakompaniyasi manfaatdor vazirliklar va idoralar bilan birgalikda havo qatnovi to‘g‘risida xorijiy davlatlar bilan tuzilgan hukumatlararo bitimlarni mazkur Farmon talablarini hisobga olgan holda qayta ko‘rib chiqsinlar hamda Vazirlar Mahkamasiga tegishli takliflarni kiritsinlar.
Oldingi tahrirga qarang.
(4-band O‘zbekiston Respublikasi Prezidentining 2020-yil 27-sentabrdagi PF-6075-sonli Farmoniga asosan o‘z kuchini yo‘qotgan — Qonun hujjatlari ma’lumotlari milliy bazasi, 28.09.2020-y., 06/20/6075/1330-son)
5. O‘zbekiston Respublikasi Vazirlar Mahkamasi bir hafta muddatda mazkur Farmonni ijro etish yuzasidan qaror qabul qilsin.
6. Ushbu Farmonning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov va O‘zbekiston Respublikasi Markaziy banki raisi F.M. Mullajonov zimmasiga yuklansin.