LexUZ sharhi
Mazkur Bitim O‘zbekiston Respublikasi Prezidentining 2006-yil 28-dekabrdagi PQ-544-sonli “Xalqaro shartnomalarni tasdiqlash to‘g‘risida”gi qarori bilan tasdiqlangan.
O‘zbekiston Respublikasi Hukumati bilan Qirg‘iziston Respublikasi Hukumati, bundan keyin “Tomonlar” deb ataluvchilar,
O‘zbekiston Respublikasi Hukumati bilan Qirg‘iziston Respublikasi Hukumati o‘rtasida fuqarolarning o‘zaro kelib-ketishlari to‘g‘risida 2000-yil 2-iyulda Toshkent shahrida imzolangan Bitimni e’tiborga olib,
O‘zbekiston Respublikasi bilan Qirg‘iziston Respublikasi o‘rtasida yaxshi qo‘shnichilik, do‘stlik va hamkorlik munosabatlarini rivojlantirish uchun qulay sharoitlarni yaratish maqsadida,
shaxslarni, yuklarni, tovarlarni, transport vositalarini, jonivorlar va boshqa mulklarni O‘zbekiston—Qirg‘iziston davlat chegarasi orqali o‘tkazish tartibini takomillashtirish zarurligiga amal qilib,
noqonuniy migratsiya, qurol-yarog‘, giyohvandlik vositalari va prekursorlar kontrabandasini fosh etish hamda oldini olish maqsadida,
O‘zbekiston—Qirg‘iziston davlat chegarasini shaxslar, yuklar, tovarlar, transport vositalari, jonivorlar va boshqa mulklar kesib o‘tishi uchun Tomonlar davlat chegarasi orqali ushbu Bitimning ajralmas qismi hisoblanadigan Ilovasida qayd etilgan xalqaro va ikki tomonlama o‘tkazish punktlari, shu jumladan yengillashtirilgan o‘tkazish punktlarini (bundan keyin — o‘tkazish punktlari) o‘rnatishga qaror qildilar.
Xalqaro o‘tkazish punktlari Tomonlar davlatlarining va boshqa davlatlarning shaxslarini, yuklarini, tovarlarini, transport vositalarini, jonivorlar hamda boshqa mulklarini o‘tkazishni amalga oshiradi.
Ikki tomonlama o‘tkazish punktlari Tomonlar davlatlarining shaxslarini, yuklarini, tovarlarini, transport vositalarini, jonivorlar va boshqa mulklarini o‘tkazishni amalga oshiradi.
Engillashtirilgan o‘tkazish punktlari Tomonlar davlatlarining fuqarolarini o‘tkazishni amalga oshiradi. Engillashtirilgan o‘tkazish punktlarining ish tartibi Tomonlar davlatlarining chegara va bojxona idoralari o‘rtasidagi ahdlashuviga ko‘ra belgilanadi.
O‘zbekiston—Qirg‘iziston davlat chegarasi orqali o‘tayotgan shaxslarni ushbu Bitimning Ilovasida qayd etilgan o‘tkazish punktlaridan o‘tkazish O‘zbekiston Respublikasi Hukumati bilan Qirg‘iziston Respublikasi Hukumati o‘rtasida fuqarolarning o‘zaro kelib-ketishlari to‘g‘risida 2000-yil 2-iyulda Toshkent shahrida imzolangan Bitimda hamda O‘zbekiston Respublikasi bilan Qirg‘iziston Respublikasi ishtirok etgan boshqa xalqaro shartnomalarda ko‘zda tutilgan shartlar asosida amaldagi hujjatlar bo‘yicha amalga oshiriladi.
O‘tkazish punktlarining ishi (ish rejimi) ushbu Bitimning Ilovasiga ko‘ra Tomonlarning ahdlashuvlariga muvofiq amalga oshiriladi.
Ish rejimining kuzatuvini nazorat qilish, shuningdek shaxslarni, yuklarni, tovarlarni, transport vositalarini, jonivorlar va boshqa mulklarni o‘tkazish tartibi Tomonlar davlatlarining chegara hamda bojxona idoralarining kelishuviga ko‘ra belgilanadi.
Shaxslarni, yuklarni, tovarlarni, transport vositalarini, jonivorlar va boshqa mulklarni chegara, bojxona va zarur hollarda nazoratning boshqa turlari (bundan keyin — nazorat) o‘tkazish punktlarida Tomonlarning milliy qonunlari va ular ishtirok etgan xalqaro shartnomalarga muvofiq amalga oshiriladi.
Zarur hollarda Tomonlar birgalikdagi nazorat uchun shart-sharoitlar yaratadilar. Birgalikdagi nazoratni tashkil etish va amalga oshirish tartibi Tomonlar davlatlarining chegara hamda bojxona idoralari o‘rtasida alohida ahdlashuvlar orqali belgilanadi.
O‘tkazish punktlarining tegishli faoliyatini ta’minlash uchun Tomonlarning har biri o‘z davlati hududida zarur infratuzilmani yaratadi.
O‘tkazish punktida birgalikdagi nazoratni o‘tkazish imkoniyati ko‘zda tutilgan bo‘lsa, o‘tkazish punktini loyihalashtirish va qurish o‘zaro kelishuvga ko‘ra amalga oshiriladi.
O‘tkazish punktlarining yangilarini ochish, mavjudlarini (shu jumladan, yengillashtirilgan o‘tkazish punktlari) berkitish yoki ularning maqomi va ish rejimini o‘zgartirish Tomonlar o‘rtasida diplomatik kanallar orqali kelishiladi hamda ushbu Bitimning ajralmas qismi hisoblanadigan bayonnomalar orqali rasmiylashtiriladi.
Ushbu Bitimning qoidalarini bajarish bo‘yicha quyidagilar Tomonlarning vakolatli organlari hisoblanadilar:
O‘zbekiston Respublikasidan — O‘zbekiston Respublikasi Milliy xavfsizlik xizmati Davlat chegaralarini himoya qilish qo‘mitasi va O‘zbekiston Respublikasi Davlat bojxona qo‘mitasi;
Qirg‘iziston Respublikasidan — Qirg‘iziston Respublikasi Chegara xizmati va Qirg‘iziston Respublikasi Moliya vazirligi Daromadlar qo‘mitasining Bojxona xizmati departamenti.
O‘zbekiston—Qirg‘iziston davlat chegarasining alohida uchastkalaridagi o‘tkazish punktlari orqali harakatlanishni vaqtincha cheklash yoki to‘xtatish Tomonlar davlatlarining milliy xavfsizligi manfaatlarida, shuningdek tabiiy ofatlar oqibatida, epidemiya va epizootiyalar davridagi sanitar-karantin sabablari bo‘yicha amalga oshirilishi mumkin.
Bunday vaqtincha cheklashlarni kiritayotgan Tomon, boshqa Tomonni ularni kiritish rejalashtirilayotgan vaqtidan kamida 5 kun ilgari cheklashning sabab va muddatlarini ko‘rsatgan holda, diplomatik kanallar orqali xabardor qiladi.
Tomonlar O‘zbekiston—Qirg‘iziston davlat chegarasi orqali harakatlanishning o‘tkazish punktlari obyektlari yoki kommunikatsiya qurilmalarida rejalashtirilgan ta’mirlash bilan bog‘liq cheklangani yoki to‘xtatilgani to‘g‘risida bir-birlarini bunday ishlar boshlanishidan kamida uch oy ilgari, ularning tugatilishi sanasi to‘g‘risidagi xabarnoma bilan birga xabardor qiladilar.
Favqulodda hollarda (tabiiy ofatlar, epidemiya, epizootiyalar, falokatlar, tibbiy tez yordam ko‘rsatish va shu kabilar), Tomonlar davlatlarining chegara hamda bojxona idoralarining o‘zaro ahdlashuviga ko‘ra, davlat chegarasi orqali shaxslarni, yuklarni, tovarlarni, transport vositalarini, jonivorlarni va boshqa mulklarni belgilangan nazorat tartibiga rioya etib, amalda bo‘lmagan o‘tkazish punktlaridan o‘tkazishlari mumkin.
Ushbu Bitim Tomonlarning ular ishtirok etgan boshqa xalqaro shartnomalardan kelib chiqadigan huquq va majburiyatlariga daxl qilmaydi.
Tomonlarning o‘zaro roziliklariga ko‘ra ushbu Bitimga o‘zgartish va to‘ldirishlar kiritilishi mumkin. Ular ushbu Bitimning ajralmas qismi hisoblanadigan va uning 12-moddasiga muvofiq kuchga kiradigan alohida bayonnomalar bilan rasmiylashtiriladilar.
Ushbu Bitimning qoidalarini qo‘llash va talqin qilish bo‘yicha bahs hamda kelishmovchiliklar yuzaga kelgan holda Tomonlar ularni muzokara va maslahatlashuvlar o‘tkazish orqali hal qiladilar.
Ushbu Bitim Tomonlar uning kuchga kirishi uchun zarur bo‘lgan davlat ichki protseduralarini bajarganliklari to‘g‘risida oxirgi yozma xabarnoma olingan sanadan boshlab kuchga kiradi.
Ushbu Bitim 5 yil davomida amal qiladi va Tomonlarning birontasi uning amal qilishini to‘xtatish niyati to‘g‘risida boshqa Tomonni navbatdagi besh yillik muddat tugashidan kamida olti oy ilgari yozma ravishda xabardor qilmasa, u har safar keyingi besh yillik muddatlarga o‘z-o‘zidan uzayaveradi.
Bishkek shahrida 2004-yil 24-iyulda ikki nusxada, har biri o‘zbek, qirg‘iz va rus tillarida tuzildi, bunda barcha matnlar bir xil kuchga ega.
O‘zbekiston Respublikasi Hukumati bilan Qirg‘iziston Respublikasi Hukumati o‘rtasida davlat chegarasi orqali o‘tkazish punktlari to‘g‘risida Bitimga
ILOVA
ILOVA
№ | O‘zbekiston Respublikasi o‘tkazish punktlari nomlanishi | O‘zbekiston Respublikasida joylashish o‘rni | Qirg‘iziston Respublikasi o‘tkazish punktlari nomlanishi | Qirg‘iziston Respublikasida joylashish o‘rni | O‘tkazish punktlari maqomi | Ish tartibi | |||||||||||||
1. | Quvasoy-temir yo‘l | Farg‘ona viloyati Quvasoy tumani | Qizil-Qiya temir yo‘l | Botken viloyati Qizil-Qiya sh. | Xalqaro | 24 soat | |||||||||||||
2. | Do‘stlik-avtoyo‘l | Andijon viloyati Xo‘jaobod tumani | Dostuk-avto yo‘l | O‘sh viloyati Qorasuv tumani | Xalqaro | 24 soat | |||||||||||||
3. | Savay-temir yo‘l | Andijon viloyati Qo‘rg‘ontepa tumani | Qorasuv temir yo‘l | O‘sh viloyati Qorasuv tumani | Xalqaro | 24 soat | |||||||||||||
4. | Xonobod-avtoyo‘l | Andijon viloyati Qo‘rg‘ontepa tumani | Bekobod-avto yo‘l | Jalolobod viloyati So‘zak tumani | Xalqaro | 24 soat | |||||||||||||
5. | Xonobod -temir yo‘l | Andijon viloyati Qo‘rg‘ontepa tumani | Jalolobod-temir yo‘l | Jalolobod viloyati Jalolobod sh. | Xalqaro | 24 soat | |||||||||||||
6. | Madaniyat-avtoyo‘l | Andijon viloyati Paxtaobod tumani | Madaniyat-avtoyo‘l | Jalolobod viloyati Nooken tumani | Xalqaro | 24 soat | |||||||||||||
7. | Uchqo‘rg‘on-temir yo‘l | Namangan viloyati Uchqo‘rg‘on tumani | Shamaldisoy-temir yo‘l | Jalolobod viloyati Nooken tumani | Xalqaro | 24 soat | |||||||||||||
8. | O‘zbekiston-avtodorojniy | Farg‘ona viloyati Quvasoy tumani | Qizil-Qiya-avtoyo‘l | Zotken viloyati Qizil-Qiya sh. | Ikki tomonlam� | 24 soat | |||||||||||||
9. | Mingtepa—avtoyo‘l | Andijon viloyati Marhamat tumani | Qora-Bag‘ish— avtoyo‘l | O‘sh viloyati Aravon tumani | Ikki tomonlama | Kunning yorug‘ vaqti | |||||||||||||
10. | Kosonsoy-avtoyo‘l | Namangan viloyati Kosonsoy tumani | Baymak-avtoyo‘l | Jalolobod viloyati Ola-Buqa tumani | Ikki tomonlama | Kunning yorug‘ vaqti | |||||||||||||
11. | Pushmon-avtoyo‘l | Andijon viloyati Paxtaobod tumani | Seydikum-avtoyo‘l | Jalolobod viloyati Bozor-Qo‘rg‘on tumani | Engillashtirilgan o‘tkazish punkti | Kunning yorug‘ vaqti | |||||||||||||
12. | Keskanyor—avtoyo‘l | Andijon viloyati Qo‘rg‘ontepa tumani | Intimak-avtoyo‘l | O‘sh viloyati Qorasuv tumani | Ikki tomonlama | Kunning yorug‘ vaqti | |||||||||||||
13. | Qoraqo‘rg‘on-avtoyo‘l | Namangan viloyati Chust tumani | Sumsar- avtoyo‘l | Jalolobod viloyati Ola-Buqa tumani | Engillashtirilgan o‘tkazish punkti | Kunning yorug‘ vaqti | |||||||||||||
14. | Uchqo‘rg‘on avtoyo‘l | Namangan viloyati Uchqo‘rg‘on tumani | Kensoy-avtoyo‘l | Jalolobod viloyati Nooken tumani | Xalqaro | 24 soat |