LexUZ sharhi
Mazkur qaror O‘zbekiston Respublikasi Prezidentining 2021-yil 30-apreldagi PF-6218-sonli “Milliy qonunchilik bazasini kompleks tizimlashtirish chora-tadbirlari to‘g‘risida”gi Farmoniga asosan o‘z kuchini yo‘qotgan.
O‘zbekiston xalq shoirasi Zulfiya (Zulfiya Isroilova)ning milliy adabiyotimiz va madaniyatimiz rivojiga qo‘shgan ulkan hissasini, uning betakror ijodiy merosi va ibratli ijtimoiy faoliyatining yosh avlodni Vatanga muhabbat va sadoqat, milliy va umuminsoniy qadriyatlar ruhida tarbiyalashdagi katta o‘rni va ahamiyatini inobatga olib:
1. O‘zbekiston Yozuvchilar uyushmasi, Madaniyat va sport ishlari vazirligi, Respublika Ma’naviyat targ‘ibot markazining Vatanimiz poytaxti — Toshkent shahrida O‘zbekiston xalq shoirasi Zulfiya xotirasiga haykal o‘rnatish to‘g‘risidagi taklifi ma’qullansin.
2. O‘zbekiston Badiiy akademiyasi bir oy muddatda tegishli mutasaddi tashkilotlar bilan birgalikda Zulfiya haykalini yaratish bo‘yicha ijodiy tanlov e’lon qilsin va uni belgilangan tartibda o‘tkazsin.
3. O‘zbekiston Respublikasi Moliya vazirligi haykalni yaratish va o‘rnatish bilan bog‘liq xarajatlar, Toshkent shahar hokimligi tomonidan taqdim etiladigan hisob-kitoblarga muvofiq, Vazirlar Mahkamasining zaxira jamg‘armasi hisobidan qoplanishini ta’minlasin.
4. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R. Qosimov zimmasiga yuklansin.