Ўзбекистон Республикаси Ҳукумати билан Озарбайжон Республикаси Ҳукумати, бундан кейин «Томонлар» деб аталувчилар,

иккала давлат имкониятларидан самарали фойдаланиш ва уларнинг халқларининг фаровонлигини ошириш мақсадида савдо-иқтисодий ва илмий-техникавий ҳамкорликни ривожлантириш ва мустаҳкамлаш истагига амал қилиб,

Ўзбекистон Республикаси билан Озарбайжон Республикаси ўртасида 1996 йил 27 майда Боку шаҳрида имзоланган дўстлик ва ҳамкорлик тўғрисидаги Шартномага, Ўзбекистон Республикаси Ҳукумати билан Озарбайжон Республикаси Ҳукумати ўртасида 1996 йил 27 майда Боку шаҳрида имзоланган эркин савдо тўғрисидаги Битимга, шунингдек Ўзбекистон Республикаси Ҳукумати билан Озарбайжон Республикаси Ҳукумати ўртасида 2001 йил 18 апрелда Тошкент шаҳрида имзоланган 2001 — 2010 йилларга мўлжалланган иқтисодий ҳамкорлик тўғрисидаги Битимга ва Ўзбекистон Республикаси Ҳукумати ва Озарбайжон Республикаси Ҳукумати ўртасида 2004 йил 23 мартда Боку шаҳрида имзоланган илмий-техникавий ҳамкорлик тўғрисидаги Битим қоидаларига амал қилиб,

халқаро ҳуқуқнинг нормалари, тенг ҳуқуқлилик, ўзаро манфаатдорлик принципларига мувофиқ ҳамда ҳар бир давлатнинг амалдаги қонунчилиги доирасида,

Томонлар икки мамлакат манфаатларини кўзлаб савдо-иқтисодий ва илмий-техникавий ҳамкорликни ривожлантиришга, мустаҳкамлашга ва кенгайтиришга интиладилар.

Савдо-иқтисодий ва илмий-техникавий ҳамкорлик Томонларнинг стратегик манфаатларига жавоб берадиган узоқ муддатли шериклик, тенглик, ўзаро манфаатдорлик принципларига асосланади ва давлатларнинг ҳар бирида амал қилаётган қонунларга риоя этган ҳолда хўжалик юритувчи субъектлар ўртасида мулк шакли ва қарашлиликдан қатъи назар, тўғридан-тўғри шартномалар тузиш йўли билан амалга оширилади.

Шартномаларни бажариш учун уларни тузган хўжалик юритувчи субъектлар жавобгардирлар. Томонлар хўжалик юритувчи субъектларнинг шартномалари бўйича мажбуриятлари учун жавобгар бўлмайдилар, агар улар бу мажбуриятларга кафолат беришган бўлмаса.

Томонлар бошқа Томоннинг иқтисодий манфаатларига зарар етказиши мумкин бўлган ҳаракатлардан ўзларини тиядилар.

Томонлар ўзаро савдода Томонлар ўртасида амал қилаётган эркин савдо тўғрисидаги икки ва кўп томонлама битимлар асосида товарлар билан эркин савдо қилиш ҳеч қандай мусодарасиз ва чекламасдан тўла равишда амалга оширишни таъминлайдилар.

Томонлар товарлар эркин савдоси режими вазифаларининг қуйидаги мақсадларини эълон қиладилар:

бир Томоннинг ҳудудида ишлаб чиқариладиган ва иккинчи Томоннинг божхона ҳудудига олиб чиқиладиган (олиб кириладиган) ҳамда Томонларнинг божхона ҳудудида эркин муомала учун мўлжалланган товарларга нисбатан тариф ва миқдорий чекланмаларни қўлламаслик;

умумэътироф этилган халқаро нормалар ва қоидаларга ёки миллий қонунчиликка асосан, бир Томоннинг иккинчи Томон товарларининг олиб кирилишига нисбатан вақтинча ҳимоя чораларини қўллашига ҳеч қандай тўсқинлик қилмаслик;

хўжалик юритувчи субъектлар фаолияти ёки умумдавлат ва ҳудудий органларнинг аралашуви оқибатида келиб чиқувчи рақобат чекловларини Томонлар хўжалик юритувчи субъектларининг ўзаро савдосига таъсир кўрсатиши мумкин бўлган даражада бартараф этиш.

Томонлар ўз ҳудудларида товарларнинг эркин савдоси режимини нормал ишлашини қийинлаштирадиган маҳаллий ёки минтақавий хусусиятдаги маъмурий, фискал тўсиқларни бартараф этиш учун зарур чоралар кўрадилар.

Ушбу Битимнинг мазкур моддаси мақсадлари учун Томонлар тарафидан кириш, келиш, ишлаш, фирмалар, компаниялар ташкил этиш, жисмоний ва юридик шахсларнинг хизмат кўрсатишларига дахлдор масалаларда миллий қонунчиликни қўллашда ҳеч нарса тўсқинлик қилмайди. Шу билан бирга улар режимни ушбу Битим туфайли ҳар қандай Томонга бериладиган афзалликларни бекор қилмайдиган ёки чеклаб қўймайдиган йўл билан қўллайдилар.

Савдо-иқтисодий ва илмий-техникавий ҳамкорликда эришилган даражани инобатга олган ҳолда, Томонлар асосий йўналишларда ҳамкорликни чуқурлаштириш учун қулай имкониятлар мавжудлиги тўғрисида ҳамфикрдирлар:

— транспорт ва алоқа;

— атроф-муҳит;

— нефть-кимё саноати;

— қишлоқ хўжалиги маҳсулотини ишлаб чиқариш, қайта ишлаш ва сақлаш;

— халқ истеъмоли молларини ишлаб чиқариш;

— туризм;

— кичик ва ўрта корхоналарни ривожлантириш.

Томонлар қўллаб-қувватлаш, кўмаклашиш ва рағбатлантириш йўли билан икки мамлакат ўртасидаги ҳамкорликни ривожлантириш, мустаҳкамлаш ва кенгайтириш учун қуйидаги чора-тадбирларни кўрадилар:

ҳукумат органлари, ишбилармон доиралар вакиллари, турли профессионал ва илмий-маданий ташкилотлар, агентликлар ва ассоциациялар, савдо-саноат палаталари ўртасидаги ўзаро манфаатли ахборот алмашинувини, шунингдек уларнинг вакиллари ҳамда бошқа савдо-иқтисодий, илмий-техникавий ва гуманитар соҳадаги делегациялар ташрифларини рағбатлантиришда ҳамкорлик қилиш;

ярмарка ва кўргазмаларда иштирок этиш, ишбилармонлар учрашувлари, семинарлар, симпозиумлар, конференциялар, давра суҳбатлари ва Томонлар давлатлари ҳудудларида ўтказиладиган шу каби бошқа тадбирларни ташкил этиш;

ўзаро манфаатли соҳаларда маркетинг ва консалтинг хизматлари бўйича ҳамкорлик қилиш;

Томонлар давлатларининг молия ва банк ташкилотлари ўртасида алоқа қилиш ва ҳамкорликни мустаҳкамлаш;

инвестицион фаолиятни, шу жумладан қўшма корхоналар ташкил қилиш, компаниялар ваколатхоналари ва филиалларини, шунингдек савдо уйларини таъсис этишни йўлга қўйиш;

кичик ва хусусий тадбиркорлик субъектлари ўртасида, шу жумладан учинчи мамлакатлар ва халқаро молия институтлари томонидан молиялаштириладиган дастурлар доирасида ҳамкорлик қилиш;

Томонларнинг ўзаро келишувига кўра ҳамкорликнинг бошқа шаклларини амалга ошириш.

Икки томонлама товарлар ва хизматлар алмашинувини енгиллаштириш мақсадида, Томонлар ўз давлатларининг амалдаги миллий қонунчилигига мувофиқ, илмий ишлар натижалари ва сертификатларнинг тан олиниши учун тегишли чора-тадбирлар кўрадилар.

Томонлар, миллий қонунчиликларига асосан, илм-фан ва техника, стандартизация, метрология ва сертификация соҳаларида идоралараро ҳамкорликни рағбатлантирадилар.

Томонлар бир-бирига ушбу Битимда кўзда тутилган муносабатларни тартибга солиш бўйича қабул қилинаётган қонунчилик ҳужжатлари тўғрисида ва шунингдек бир-бирини қизиқтирадиган бошқа маълумотлар тўғрисида ахборот тақдим этадилар.

Ушбу Битим Томонлар иштирокчилари бўлган бошқа халқаро шартномалардан келиб чиқадиган ҳуқуқлари ва мажбуриятларига дахл қилмайди.

Томонларнинг ўзаро келишувига биноан ушбу Битимга унинг ажралмас қисми бўлиб ҳисобланадиган, алоҳида протоколлар билан расмийлаштириладиган ва 12-моддада кўрсатилган тартибда кучга кирадиган ўзгартиришлар ва қўшимчалар киритилиши мумкин.

Мазкур Битим қоидаларини талқин қилиш ва қўллаш билан боғлиқ бўлган мунозарали масалалар музокаралар ва маслаҳатлашувлар йўли билан ҳал этилади.

Ушбу Битим дипломатик каналлар орқали Томонларнинг Битим кучга кириши учун зарур бўлган давлат ички процедураларини бажарганлигини тасдиқловчи сўнгги ёзма хабарнома олинган санадан бошлаб кучга киради.

Мазкур Битим ноаниқ муддатга тузилади.

Томонлардан ҳар бири дипломатик каналлар орқали ёзма хабарнома юбориш йўли билан мазкур Битимнинг амал қилишини тўхтатиши мумкин. Мазкур Битимнинг амал қилиши шундай ёзма хабар олинган кундан олти ой ўтгач тўхтайди.

Боку шаҳрида 2008 йил 11 сентябрда икки асл нусхада, ҳар бири ўзбек, озарбайжон ва рус тилларида имзоланди, бунда барча матнлар бир хил кучга эга.

Мазкур Битим қоидаларини талқин қилишда келишмовчиликлар юзага келган тақдирда Томонлар рус тилидаги матнга амал қиладилар.